Gamitag Maayo ang Imong Panahon
1 Si Jehova mahunahunaon sa panahon. Buot niya nga mahibalo usab kita sa panahon. Pinaagi sa iyang organisasyon iyang ginatabangan kita nga magmahunahunaon sa panahon. Kita giawhag kanunay nga may “daghang buhaton diha sa buluhaton sa Ginoo.” (1 Cor. 15:58) Niining paagiha, kita labi pang magmaepektibo sa pag-alagad kang Jehova.
2 Ang matag usa kanato adunay samang gidaghanon sa panahon kada semana—168 ka oras. Sa unsang paagi gigamit natog maayo ang atong panahon? Kita ba nagapakita nga kita nasayod kon unsa nang panahona karon gikan sa panglantaw ni Jehova? Kita ba nalinga sa di-hinungdanong mga kalihokan?
3 Maoy hinungdanon nga kita organisado kaayo. Daghan ang nagasulay sa paghupot ug listahan sa unahonon. Ang matag butang gitala sa listahan sumala sa kahinungdanon niini. Sa unsang paagi kana matino? Ang Bibliya nagaingon nga ang usa ka tawo kinahanglang “makakita ug maayo sa tanan niyang paghago.” (Eccl. 3:13) Ang pipila ka buhat nagabungag mas maayong mga resulta kay sa uban. Tagda ang mga resulta nga ipahinabo sa matag usa. Ang paghuman ba sa maong trabaho mopatunghag talagsaong mga benepisyo? Ikaw-ba “makakita ug maayo” sa imong paghago? Kon wala, hayan dili kana usa ka unahonon-gayod nga gimbuhaton.
4 Sa Atong Ministeryo: Atong ginapabilhan kon moabot ang uban sa mga tigom sa dayon nang pagsangyaw sa hustong panahon, maminaw pag-ayo sa mga pahimangno, ug untop nga mobiya ngadto sa teritoryo. Buot man natong magmapuliki sa pagsangyaw kay sa maghulathulat. Si Pablo dayag nga kusganong mibati bahin sa panginahanglan alang sa maayong kahikayan sa dihang siya misulat: “Ipahinabo ang tanang butang nga may kahapsay ug pinaagig kahikayan.”—1 Cor. 14:40.
5 Sa dihang kita atua sa pag-alagad sa kanataran, mawad-an kitag bililhong panahon diha sa mga pagmeryenda. Hinuon, ang usa ka mubong pahulay mahimong batonan human magatrabaho sa ubay-ubayng oras sa pagsangyaw. O tingali kon ang mga kahimtang sa klima dili gayod maayo, ang usa ka pahulay makarepresko kanato ug makatabang nato sa pagpadayon. Daghan, hinunoa, ang nagapalabing magpadayon nga magmapuliki sa pagsangyaw sa katawhan ug nagalikay sa pagpakig-uban sa mga igsoon sa pagmeryenda sa panahon nga gigahin alang sa ministeryo. Ang pagkatimbang gikinahanglan.
6 “Bisan ang talabong . . . nasayod pag-ayo sa tinudlong mga panahon niini” sa paglalin, ug ang hulmigas “nagaandam sa pagkaon niini bisan sa ting-init” aron magmaandam alang sa ting-ulan, nagaingon ang Bibliya. (Jer. 8:7; Prov. 6:6-8) Anaa diha ang sekreto sa paggamit ug maayo sa panahon. Kita usab kinahanglang ‘masayod sa atong tinudlong mga panahon.’ Nga dili hilabihan ra ka mapig-uton, angay nga kita mahunahunaon sa panahon. Kinahanglan kitang mahibalo dili lamang kon unsay angay natong buhaton apan usab kon kanus-a kana kinahanglang buhaton. Angay nga kita magabatasan sa paghunahuna nga abante, nga nagahimog mga pagpasibo alang sa posibleng mga kalangan. Ug kinahanglang andam usab kita sa pagpamubo sa pipila ka kalihokan aron paghatag ug panahon sa butang nga labing hinungdanon, sama sa pag-andam alang sa atong mga tigom, ministeryo sa kanataran, ug ubang teokratikanhong mga kalihokan.
7 Buot nato nga mahisama sa atong langitnong Amahan, si Jehova nga Diyos, nga nagatudlo kanato nga “sa tanang butang adunay tinudlong panahon.” (Eccl. 3:1) Pinaagig paggamit ug maayo sa atong panahon, kita ‘makabuhat sa bug-os sa atong ministeryo.’—2 Tim. 4:5.