Tabangi ang Uban sa Pagpabili sa Kahinungdanon sa Bibliya
1 Ang Lucas 24:45 nagaingon bahin kang Jesus: “Iyang bug-os gibuksan ang ilang mga kaisipan aron makasabot sa kahulogan sa mga Kasulatan.” Siya nasayod nga hinungdanon kana alang kanila ang pagtuon ug pagsabot sa Pulong sa Diyos. (Sal. 1:1, 2) Sa atong buluhatong pagsangyaw, ang atong tumong mao ang pagsugod ug mga pagtuon sa Bibliya, diin atong ‘matudloan ang katawhan sa pagsunod sa tanang butang nga gisugo ni Jesus.’ (Mat. 28:20) Ang mosunod maoy pipila ka sugyot kon unsa ang imong maisulti sa dihang ikaw mohimog mga balikduaw.
2 Kon sa miagi nahisgotan ninyo ang librong “Ang Bibliya—Pulong sa Diyos o sa Tawo?” hayan mapadayon nimo ang panaghisgot niining paagiha:
◼ “Buot nakong ipakita kanimo ang laing butang nga nagapakita sa praktikal nga bili sa tambag sa Bibliya. Daghang tawo nakakaplag nga malisod ang maayong pagpakigduyog sa uban. Unsa ang atong mahimo sa pag-ugmad sa mas maayong relasyon uban kanilang anaa sa atong palibot? [Human sa sanong, paklia ngadto sa mga panid 167-8, parapo 15, ug basaha ang Mateo 7:12. Idugang ang mga ideyang gipadayag sa parapo 16.] Kini maoy laing ehemplo sa kaalam nga makaplagan sa Bibliya. Sa sunod nakong pagduaw, buot nakong ipakita kanimo ang tambag nga gitanyag sa Bibliya bahin sa mga magtiayon aron sa pagkaplag ug mas dakong kalipay sa ilang relasyon.” Paghimog mga kahikayan sa pagbalik aron hisgotan ang mga panid 170-2 bahin sa pamilyahanong kinabuhi.
3 Kon imong naestoryahan ang usa kinsa nagpakitag interes sa Bibliya, nan tingali kining paagiha mahimong epektibo aron masugdan ang usa ka pagtuon:
◼ “Halos tanan nga imong ikasulti mosugid kanimo nga buot nilang makabaton ug malinawong kalibotan nga pagapuy-an. Kon kana ang kagustohan sa tanan, nganong atong nabatonan ang kalibotang puno sa tumang kapintasan? [Tugoting motubag.] Ang New World Translation nagapakita kanimo asa sa Bibliya imong makaplagan ang tubag nianang pangutanaha.” Paklia ang panid 1659, ug ipunting sa “Bible Topics for Discussion” No. 43a: “Who is responsible for world distress.” Basaha ang 2 Corinto 4:4. Isaysay kon sa unsang paagi laglagon sa Diyos ang Yawa ug ipatungha ang usa ka kalibotan sa walay kataposang pakigdait ug kalipay. Basaha ang Pinadayag 21:3, 4. Dayon hikaya ang dugang panaghisgot sa sunod nga duaw.
4 Kon gigamit nimo ang diretsong paagi sa pagsugod ug usa ka pagtuon ug diha ing maayong sanong, hayan imong ikabutyag kini sa imong pagbalik:
◼ “Sa pagsultihanay nato sa miagi, atong nahisgotan kon nganong makaayo ang pagtuon sa Bibliya. [Basaha ang Juan 17:3.] Among naugmad ang usa ka programa sa pagtuon sa Bibliya nga nakatabang sa mga linibo sa pagkakat-on nga mas pa bahin sa kon unsa ang gisaad sa Diyos ug kon unsaon nato sa pagpahimuot kaniya.” Ipakita ang librong Mabuhing Walay Kataposan, repasoha ang mga ulohan sa kapitulo, ug ipasundayag kon unsaon pagdumala ang usa ka pagtuon sa Bibliya.
5 Kon imong matabangan ang sinserong mga tawo sa pagpabili sa kahinungdanon sa Pulong sa Diyos, nan ang kaalam nga ilang makat-onan pinaagi sa pagtuon sa mga panid niana mahimong “usa ka kahoy sa kinabuhi,” nga maghatag kanilag dakong kalipay.—Prov. 3:18.