Pangutana

◼ Karon nga atong nabatonan na ang librong Kahibalo nga Motultol sa Kinabuhing Walay Kataposan, unsa ka dugay angayng dumalahon ang usa ka pagtuon sa Bibliya sa balay?

Ang Atong Ministeryo sa Gingharian sa Septiyembre 1993 nagrekomendar nga ang usa ka pagtuon sa Bibliya sa balay ipadayon uban sa mga bag-ong interesado hangtod ang duha ka librong Ikaw Mabuhing Walay Kataposan sa Paraiso sa Yuta ug Nahiusa sa Pagsimba sa Bugtong Matuod nga Diyos mahuman sa pagtuon. Karon nga nabatonan na nato ang librong Kahibalo, daw angay ang paghimog usa ka kausaban niining paagiha, ingon sa gilaraw sa mga panid 13 ug 14 sa Enero 15, 1996, nga gula sa Ang Bantayanang Torre.

Ang Kahibalo nga libro gidesinyo sa pagtabang kanilang “sa husto nahimutang alang sa kinabuhing walay-kataposan” sa pagkat-on kon unsay angay nilang mahibaloan aron makahimog usa ka pahinungod ngadto kang Jehova ug mabawtismohan. (Buh. 13:48) Busa, human matapos kining bag-ong publikasyon, angayng dili na gikinahanglan pa ang pagtuon sa ikaduhang libro uban sa mao rang estudyante. Samtang mouswag ang imong mga estudyante sa Bibliya, imo silang madasig nga dugangan ang ilang kahibalo pinaagig pagtambong sa mga tigom maingon man sa pagbasa sa Bibliya ug lainlaing Kristohanong mga publikasyon.

Kon ikaw sinati sa mga pangutana sa mga panid 175 hangtod sa 218 sa librong Organisado sa Pagtuman sa Atong Ministeryo, kini hayan makatabang. Bisan tuod dili mo gayod ipunting kanang mga pangutanaha o repasohon kana uban sa estudyante sa Bibliya, hayan makaayo nga ipasiugda ang mga puntos diha sa librong Kahibalo aron magpaarang sa estudyante sa pagpadayag ug usa ka tukmang pagsabot sa pasukaranang mga kamatuoran sa Bibliya sa dihang ang mga ansiyano magarepaso sa mga pangutana uban sa mga kandidato sa bawtismo.

Kasagarang dili na kinahanglang dugangan ang impormasyon diha sa librong Kahibalo, nga ipasulod ang dugang mga argumento aron buntogon ang bakak nga mga doktrina. Kini magpadugay lamang sa pagtuon ngadto sa mas taas nga yugto sa panahon. Hinunoa, gilaoman nga ang libro makobrehan nga mas dali, tingali sa mga unom ka bulan. Kini nagapasiugda sa panginahanglan alang kanato sa pagtuon nga abante aron atong ikapresentar kana sa tin-aw ug mubo. Ang estudyante usab kinahanglang dasigon nga magtuon nga abante, magasusi sa gisitar nga mga kasulatan, ug mosulay sa pagsabot kon unsay ginatudlo sa matag kapitulo.

Ang Ang Bantayanang Torre nagpasiugda sa panginahanglan alang kanato sa pagdumalag dugang epektibong mga pagtuon sa Bibliya diha sa mas mubong yugto sa panahon.​—Isa. 60:22.