Mahigalaong mga Panaghisgot Makatandog sa Kasingkasing
1 Ang panaghisgot maoy “usa ka binaba nga bayloanay ug mga ideya.” Ang pagsugod ug mahigalaong mga panaghisgot bahin sa ulohan nga gikabalak-an sa uban hayan makabihag sa ilang interes ug magatabang kanato nga matandog ang ilang mga kasingkasing. Maoy mas epektibo ang pakighisgot sa mga tawo diha sa mahigalaon ug relaks nga paagi kay sa pagsermon kanila.
2 Kon Unsaon Pagsugod ang Mahigalaong Panaghisgot: Ang atong pakighisgot sa uban wala magpasabot nga kinahanglan natong ipresentar ang daghang makadaning mga puntos ug mga kasulatan. Kana yanong nagapasabot nga ang laing tawo madala sa pagpakigsulti kanato. Pananglitan, sa makighisgot ta sa atong sunod-pultahang silingan kita mahigalaon man ug relaks. Kita wala maghunahuna bahin sa sunod natong mga pulong apan nagasanong nga natural kon unsay iyang ginasulti. Ang pagpakitag tiunay nga interes sa kon unsay iyang ginasulti mahimong makadasig kaniya sa padayong pagpakighisgot kanato. Kinahanglang sama gayod niana sa dihang nagapanaksi sa uban.
3 Ang mga ulohan sama sa krimen, mga problema sa mga batan-on, lokal nga mga isyu, mga kahimtang sa kalibotan, o bisan ang tiempo mahimong gamiton sa pagsugod ug mahigalaong mga panaghisgot. Ang mga ulohang diretsong nagaapektar sa mga kinabuhi sa katawhan maoy epektibo kaayo sa pagpukaw sa ilang interes. Sa dihang ang usa ka panaghisgot masugdan na, mahimong inanay nato kining makabig ngadto sa mensahe sa Gingharian.
4 Ang pagbaton ug relaks nga panaghisgot wala magpasabot nga ang abanteng pagpangandam wala kinahanglana. Gikinahanglan kini. Apan, dili kinahanglang maghimog estriktong laraw o magsag-ulo ug usa ka sermon, nga moresultag panaghisgot nga dili manunoton sa mga kahimtang nga motungha. (Itanding 1 Corinto 9:20-23.) Maayo nga mag-andam ug usa o duha ka Kasulatanhong ulohan, unya tukora ang mga panaghisgot libot niana. Ang pagrepaso sa mga ulohang makaplagan sa librong Nangatarongan mapamatud-ang makatabang niini.
5 Hinungdanong mga Hiyas Alang sa Mahigalaong Panaghisgot: Sa dihang makigsulti kita sa uban, kinahanglang mainiton ta ug sinsero. Ang usa ka pahiyom ug mangayaong panagway nagabanaag niining mga hiyasa. Nabatonan ta ang labing maayong mensahe sa kalibotan; kini maoy makadani kaayo sa mga mabuot-kasingkasing. Kon mabati nila nga ang atong interes kanila tinukmod sa sinserong tinguha nga ipaambit kanila ang pipila ka maayong balita, nan hayan matukmod silang maminaw.—2 Cor. 2:17.
6 Ang panaghisgotay angay gayod nga malipayong kasinatian. Busa, kinahanglan tang maluloton ug mataktikanhon sa pagpresentar sa mensahe sa Gingharian. (Gal. 5:22; Col. 4:6) Panlimbasog nga ibilin ang maayong impresyon bisan pa kon ang maong tawo dili mosanong.
7 Ang pagsugod ug mahigalaong panaghisgot dili bunga sa pagkahimong hanas sa usa ka sermon. Kini maoy yanong pagpukaw sa kaikag sa usa ka ulohan nga gikabalak-an sa usa ka tawo. Sulayan nato sa pagtandog ang mga kasingkasing sa katawhan pinaagig pagpaambit kanila sa maayong balita sa Gingharian.—2 Ped. 3:13.