Mahimong Panig-ingnan sa Sinultihan ug sa Panggawi
1 Ang apostol Pablo mitambag kang Timoteo nga mahimong panig-ingnan sa sinultihan ug sa panggawi. (1 Tim. 4:12) Angay usab kitang mopasundayag sa maayong panig-ingnan sa sinultihan ug sa panggawi, ilabina kon nagapakig-ambit sa ministeryo, kay ang pagbuhat sa ingon hayan motino kon naabot nato o wala ang kasingkasing niadtong atong ikahibalag.
2 Angay natong ipasundayag ang tanang bahin sa maayong pamatasan, lakip na ang kamatinahoron, konsiderasyon, kalulot, ug taktika. Ang maayong mga panggawi sa ministeryo ikatandi sa mga panimpla sa atong pagkaon. Kon wala kini, ang lamiang pagkaon mahimong walay lami ug di-makapagana. Ang kapakyasan sa pagpasundayag sa maayong mga panggawi adunay susamang epekto.—Col. 4:6.
3 Mahimong Panigu-ingnan sa Sinultihan: Ang mahigalaong pahiyom ug usa ka mainitong pangomosta hinungdanon sa dihang mopresentar sa maayong balita. Kon atong sambogan ang atong introduksiyon sa kainit ug katim-os, atong gipahibalo ang tagbalay nga kita tiunay nga interesado kaniya. Sa dihang siya mosulti, paminaw pag-ayo ug tahora ang iyang opinyon. Sa dihang ikaw mosulti, buhata kana uban ang taktika ug kamadanihon.—Itandi ang Buhat 6:8.
4 Usahay mahibalag nato ang indibiduwal nga di-mahigalaon, ngani maawayon. Unsaon gayod nato pagsanong? Si Pedro miawhag kanato nga mosulti uban ang “kalumo sa buot ug halawom nga pagtahod.” (1 Ped. 3:15; Roma 12:17, 18) Si Jesus miingon nga kon ang tagbalay mosalikway sa mensahe sa Gingharian, ato lamang gayod ‘itaktak ang abog gikan sa atong mga tiil.’ (Mat. 10:14) Ang atong maayong mga pamatasan ubos sa maong mga kahimtang sa kapulihay makapalukmay sa kasingkasing sa magsusupak.
5 Mahimong Panig-ingnan sa Panggawi: Ang pagsangyaw sa maayong balita sa puliki nga kadalanan ug sa publikong mga dapit nanginahanglan nga kita magmasinabtanon, dili saba o pugoso, ug nga dili kita makabalda sa agos sa mga mangagi. Sa dihang anha sa mga puy-anan sa mga tawong interesado, kinahanglang mogawi kita ingong mabinationg mga bisita. Ang bisan kinsang mga bata nga mouban kanato angay nga mopakitag pagtahod sa tagbalay ug sa iyang kabtangan ug maminaw gayod sa dihang kita makigsulti. Kon badlonganon ang kabataan, magbilin kinig di-maayong impresyon.—Prov. 29:15.
6 Ang atong kaugalingong panagway angayng magpasundayag ngadto sa uban nga kita mga ministro sa Pulong sa Diyos. Sa atong senina ug pamostura, dili kita angay nga gabulingit ug nagkalkag ni mapasigarbohon ug mapahingapinon. Ang atong panagway angay nga kanunayng “takos sa maayong balita.” (Itandi ang Filipos 1:27.) Sa pagbuhat niini, dili kita makahatag ug hinungdan sa pagkapangdol sa uban o sa pagpangitag sayop sa atong ministeryo. (2 Cor. 6:3, 4) Ang atong maayong sinultihan ug panggawi makadugang ug madanihong hiyas ngadto sa mensahe sa Gingharian, nga magdalag pasidungog kang Jehova.—1 Ped. 2:12.