“Tukora ang Imong Panimalay”

¹ Sa walay duda, ang pamilyahanong kinabuhi nagakabungkag sa tanang bahin sa yuta. Ang kalibotan ni Satanas nagalunang diha sa limbong ug sa imoralidad. (1 Juan 5:19) Kini nagapasiugda sa pagkadinalian alang kanato sa ‘pagtukod sa atong panimalay’ ug sa pagtudlo sa uban kon unsaon nila sa pagbuhat ang sama niana para sa ilang kaugalingon.​—Prov. 24:3, 27.

² Usa ka Panalipob ang mga Prinsipyo sa Bibliya: Ang sekreto sa matuod nga kalipay sa pamilya makaplagan diha sa pagpadapat sa mga prinsipyo sa Bibliya. Kining mga kamatuorana makaayo sa matag membro sa panimalay. Ang pamilya nga mopadapat niini makapahimulos sa diyosnong kalinaw ug kalipay.​—Itandi ang Isaias 32:17, 18.

³ Ang mga prinsipyo nga makatabang kanato sa pagtukod sa atong panimalay gitagik diha sa bag-ong libro, Ang Sekreto sa Kalipay sa Pamilya. Ang matag kapitulo gitiklopan pinaagig kahon sa pagtudlo nga nagapasiugda sa mga prinsipyo nga kinahanglang hinumdoman sa mga membro sa pamilya. Kadaghanan niining mga kahona gisugdan sa pangutana, “Sa unsang paagi kining mga prinsipyoha sa Bibliya makatabang . . . ?” Kini makatabang kanato sa pagpunting sa mga hunahuna sa Diyos maylabot sa ulohan nga ginahisgotan.​—Isa. 48:17.

⁴ Sinatia ang maong basahon. Kat-oni ang pagpangita sa mga prinsipyo nga makatabang sa dihang motungha ang lainlaing mga suliran. Ang libro nagahisgot sa mga butang nga sama niini: kon unsay pangitaon sa dihang mamalandong sa umaabot nga kapikas sa kaminyoon (kapitulo 2), kon unsang bililhong mga yawi ang magbukas sa pultahan ngadto sa dumalayong kalipay sa kaminyoon (kapitulo 3), kon unsaon pagmatuto sa mga ginikanan ang ilang mga tin-edyer ngadto sa pagkahimong responsableng mga hamtong (kapitulo 6), kon unsaon pagpanalipod ang pamilya gikan sa makadaot nga mga impluwensiya (kapitulo 8), mga prinsipyo sa pagtabang sa nag-inusara-ginikanang mga pamilya (kapitulo 9), espirituwal nga tabang alang sa mga pamilya nga nasamok sa alkoholismo ug kapintasan (kapitulo 12), kon unsay buhaton sa dihang ang bugkos sa kaminyoon hapit nang mabugto (kapitulo 13), kon unsay mahimo sa pagpasidungog sa tigulang nga mga ginikanan (kapitulo 15), ug kon unsaon sa pagseguro sa dumalayong kaugmaon alang sa pamilya sa usa (kapitulo 16).

⁵ Gamitang Bug-os ang Bag-ong Libro: Kon wala pa nimo mahimo kana, nganong dili tun-an sa tingob ang Kalipay sa Pamilya nga libro ingong pamilya? Usab, sa dihang makasugamak ang imong pamilya sa bag-ong mga suliran o mga hagit, sublia ang mga kapitulo sa libro nga naghisgot niini, ug tagdang mainampoon kon unsaon pagpadapat ang tambag. Dugang pa, sa Marso, pag-eskedyul ug dugang panahon sa ministeryo sa kanataran aron makapahiluna sa Ang Sekreto sa Kalipay sa Pamilya ngadto sa daghang katawhan kutob sa maarangan.

⁶ Ang mga pamilya nga nagapadapat sa diyosnong debosyon mapalig-on sa espirituwal ug mahiusa ug maandam gayod sa pagbuntog sa mga atake ni Satanas. (1 Tim. 4:7, 8; 1 Ped. 5:8, 9) Pagkamapasalamaton nato nga atong nabatonan ang balaang instruksiyon gikan sa Tigmugna sa pamilya!