Gikinahanglang Makadungog sa Maayong Balita ang Atong mga Silingan
1 Maoy katuyoan sa Diyos “nga ang tanang matang sa mga tawo maluwas ug makadangat sa tukmang kahibalo sa kamatuoran.” (1 Tim. 2:4) “Tanang matang sa mga tawo” nagalakip sa tanan natong mga silingan. Ang pag-abot kanila dala ang maayong balita nagakinahanglan sa pagkahimong mapailin-ilinon sa atong mga presentasyon ug mahunahunaon kon unsay makapaikag tingali sa matag tawo nga atong ikahimamat. (1 Cor. 9:19-23) Ang organisasyon ni Jehova nagtaganag mga himan nga makatabang kanato sa pag-abot sa mga kasingkasing niadtong “sa husto nahimutang alang sa kinabuhing walay-kataposan.” (Buh. 13:48) Atong tan-awon kon sa unsang paagi atong magamit ang lainlaing mga brosyur sulod sa Hulyo ug Agosto aron tagan-an ang espirituwal nga mga panginahanglan sa atong mga silingan.
2 Gipasiugbang mga Brosyur: Gilista sa ubos imong makaplagan ang mga sugyot nga mahimong mapuslanon sa pagtanyag sa tinong mga brosyur. Ang matag sugyot nagalakip sa (1) usa ka makapalihok-hunahunang pangutana aron sa pagsugod ug panaghisgot, (2) usa ka reperensiya diin ang mga puntong igsusulti makaplagan diha sa brosyur, ug (3) usa ka tukmang kasulatan nga mahimong basahon sulod sa panaghisgot. Mapun-an mo ang nahibilin sa presentasyon sa imong kaugalingong mga pulong, sumala sa pagsanong sa tawo. Sa kadaghanan sa mga brosyur, ang kanhing isyu sa Atong Ministeryo sa Gingharian gisitar diin imong makaplagan ang mas detalyadong pasundayag alang sa brosyur.
Tinuod Bang May Pagtagad ang Diyos Kanato?
Sa imong hunahuna unsang paglaom ang anaa nga makatabang sa mga tawo nga nag-antos sa pag-abuso?—Mga panid 27-8, mga parapo 23-7; Isa. 65:17, 18; km 7/97 p. 4.
Unsa ang Katuyoan sa Kinabuhi?—Sa Unsang Paagi Makaplagan Nimo Kini?
Ngano man nga daghan kaayong tawo karong adlawa nga maorag wala matagbaw sa ilang mga kinabuhi?—Mga panid 29-30, mga parapo 2, 25-6; Sal. 145:16; km 7/96 p. 4.
Tagamtama ang Kinabuhi sa Yuta sa Walay Kataposan!
Nahibulong ka na ba kon unsay ginahimo ni Jesu-Kristo karon?—Mga hulagway 41-2; Pin. 11:15; km 8/96 p. 8.
Ang Kagamhanang Mopatunghag Paraiso.
Buot ka bang masayod bahin sa Gingharian nga gitudlo ni Jesus kanato nga iampo?—Panid 3; Mat. 6:9, 10; km 8/96 p. 8.
Sa Dihang ang Imong Minahal Mamatay.
Nahibulong ka na ba kon unsaon paghupay ang usa nga nawad-an sa usa ka minahal diha sa kamatayon?—Panid 26, mga parapo 2-5; Juan 5:28, 29; km 7/97 p. 4.
Angay ba Nimong Tuohan ang Trinidad?
Ang ato bang pagsabot sa tinuod nga kahimtang sa Diyos hinungdanon alang sa atong umaabot?—Panid 3, mga parapo 3, 7-8; Juan 17:3.
3 Brosyur nga Magpalig-on sa Pagtuo sa Bibliya: Didto sa “Pagtuo sa Pulong sa Diyos” Distritong mga Kombensiyon sa miaging Disyembre ug Enero, atong nadawat ang bag-ong brosyur nga nag-ulohang Usa ka Basahon Alang sa Tanang Tawo. Sanglit wala pa nato ikatanyag kini nga brosyur diha sa kanataran sukad sa pagluwat niini, ang kampanya sulod sa Hulyo ug Agosto mahimong ekselenteng kahigayonan sa dakong pagpanagtag niining bag-ong brosyur sa kanataran. Sanglit kini bag-o, angay nga makadani kini niadtong nakabasa na sa atong unang mga brosyur ug buot makabaton sa tanan natong ulahing mga publikasyon.
4 Kining bag-ong brosyur giandam sa pagtabang sa mga tawo nga tingali edukado kaayo apan gamay rag nahibaloan bahin sa Bibliya. Gidisenyo kini sa pagtukmod kanila nga buot mosusi sa Pulong sa Diyos. Sa dihang magtanyag niini nga brosyur, hayan buot mong gamiton ang mosunod nga sugyot:
Usa ka Basahon Alang sa Tanang Tawo.
Mouyon ka ba nga ang pagbaton ug bug-os nga edukasyon maglakip sa pagkuhag pipila ka kahibalo kon unsay anaa sa Bibliya?—Panid 3, mga parapo 1-3 ug panid 30, parapo 2; Eccl. 12:9, 10.
5 Brosyur sa Pagtuon sa Bibliya: Ang atong tumong sa ministeryo kinahanglan kanunayng mao ang pagsugod ug usa ka pagtuon sa Bibliya, sa unang duaw man o sa mosunod nga balikduaw. Sa maong tumong, aduna kita ing mosunod sayon-gamiton nga brosyur sa pagsugod ug pagdumalag mga pagtuon sa Bibliya sa balay:
Unsay Gikinahanglan sa Diyos Kanato?
Nasayod ka ba nga sa 30 minutos o ubos pa sa matag semana sulod sa 16 ka semana, makabaton kag paninugdang pagsabot sa Bibliya?—Leksiyon 2, parapo 6; 2 Tim. 3:16, 17; km 3/97 p. 4.
6 Sa ilustrasyon sa buotang Samaritano, giklaro ni Jesus nga ang tinuod nga silingan mao ang usa nga nagapakitag gugma ug kalulot sa pagtabang sa uban nga anaa sa kalisdanan. (Luc. 10:27-37) Ang atong mga silingan anaa sa espirituwal nga kalisdanan. Kinahanglang makadungog sila sa maayong balita. Atong abagahon ang kaakohan sa pagpaambit niini ngadto kanila, nga sa ingon nagapamatuod sa atong kaugalingon nga tinuod nga mga tinun-an ni Jesu-Kristo.—Mat. 24:14; Gal. 5:14.