Makab-ot ba Nato ang Atong Tumong Niining Bulana?

¹ Sa Pebrero ug Abril, 1994, ang sanga sa Pilipinas nagtahog kapin sa 100,000 ka pagtuon sa Bibliya. Sa Hulyo 1998 nga Atong Ministeryo sa Gingharian, girekomendar nga himoon nato kini nga atong tumong sa Agosto sa pagkab-ot ning gidaghanona pag-usab. Unsay atong mahimo sa tinagsatagsa sa pagkab-ot niining tumonga?

² Dawata ang Hagit: Sa daghang kongregasyon, kapin sa katunga sa mga magmamantala wala magdumalag usa ka regular nga pagtuon sa Bibliya. Kon usa ka niini nila, amo kang dasigon sa paghimo niini nga espesyal nga tumong niining bulana nga makasugod ug usa ka pagtuon sa Bibliya. Kon makasugod kag usa ka pagtuon sulod sa unang semana sa Agosto, nan kon kini magpadayon ug dugang pang duha ka higayon human niana, ikataho kini sa kataposan sa Agosto ingong usa ka bag-ong pagtuon sa Bibliya.​—Tan-awa ang “Pangutana” sa panid 7.

³ Bisan kanus-a nga makig-ambit ka diha sa ministeryo, mahimong sa buluhaton sa kadalanan, di-pormal nga pagsangyaw, o regular nga balaybalay nga buluhaton, itanyag ang pagtuon sa Bibliya sa balay. Mahimo nimo kini sa imo mismong introduksiyon. Makatabang usab kini sa mga tawo nga makaamgo nga kita dili “mga nagasuroyng-tigbaligya sa pulong sa Diyos,” o interesado lamang sa pagpahilunag mga magasin, apan nangita niadtong mahinangop sa pagkat-on bahin sa mga kinahanglanon sa Diyos. (2 Cor. 2:17) Ang Gikinahanglan nga brosyur maoy usa ka ekselenteng galamiton sa pagtanyag ug 16-semanang kurso sa Bibliya.​—Tan-awa ang Atong Ministeryo sa Gingharian, Hulyo 1998, panid 8.

⁴ Kasagaran ang mga pagtuon masugdan uban niadtong imong mga kaila, sama sa mga membro sa pamilya, mga paryente, mga kaubanan sa trabaho, mga kaubanan sa eskuylahan, mga tawo diha sa tindahan o tiyanggihan nga regular kang nakiglabot. Nganong dili maghimog listahan sa mga posibilidad ug dayon tan-awon kon usa niini nila modawat ug usa ka pagtuon sa Bibliya?

⁵ Mga Pagtuon sa Bibliya sa Pamilya: Gikataho nga daghang ulo sa pamilya wala magdumalag usa ka regular nga pagtuon sa pamilya, o, kon nagdumala silag usa, kasagaran wala nila itaho kini bisan tuod duna tingali di-bawtismadong membro sa pamilya nga presente. Kon ikaw usa ka ulo sa pamilya nga wala magtagad ning bahina sa kalihokan sa pagtuon sa Bibliya, mao kini ang maayong panahon sa pagtul-id niining butanga pinaagig pagsugod ug pagtaho sa imong pagtuon sa pamilya.

⁶ Dugang pa, among dasigon kadtong nagdumala na ug mga pagtuon, sama sa mga payunir, sa pagsulay sa pagsugod ug bag-ong pagtuon sa Agosto. Kon ang matag payunir mohimo niini, dali natong makab-ot ang kapin sa 100,000 ka pagtuon niining bulana. Busa maningkamot kitang tanan sa pagkab-ot sa atong tumong ning bulana ug dayon magpadayon sa pagtabang niadtong atong ginatun-an nga mouswag ngadto sa pagpahinungod.