Makanunayon Ka ba nga Magmamantala sa Gingharian?
1 Kitang tanan nagmaya sa dihang ang sangang buhatan sa Pilipinas mitapos sa miaging tuig sa pag-alagad uban sa kinatas-ang 132,496 ka magmamantala sa Agosto 1999. Bisan pa niana ang aberids nga gidaghanon sa mga magmamantala sulod nianang tuiga maoy 128,106. Dayag nga ang uban sa atong mga magmamantala nalisdan sa pagkahimong makanunayon nga mga magmamantala sa Gingharian. Sa pagkamatuod, ang mga analysis report gikan sa mga kongregasyon nagbutyag nga kapin sa 19,000 sa aktibong mga magmamantala wala magtaho nga nakig-ambit diha sa ministeryo matag bulan. Kami nagtuo nga ang mosunod nga pagdasig makatabang sa pagsulbad sa kahimtang.
2 Pabilhi ang Pribilehiyo: Kita angayng magbaton ug dulot nga pagpabili sa pribilehiyo nga atong ipaambit ang maayong balita sa Gingharian sa uban. Kining kalihokana magpalipay sa kasingkasing ni Jehova ug magtabang sa matinud-anog-kasingkasing nga mga tawo sa pagkat-on sa dalan sa kinabuhi. (Prov. 27:11; 1 Tim. 4:16) Ang pagsangyaw nga makanunayon magpalig-on sa atong kasinatian diha sa ministeryo ug moresulta sa pagbati sa kangaya ug kalamposan.
3 Itaho ang Binuhatan: Ang pipila nga nakig-ambit sa pag-alagad sa kanataran wala magtaho sa ilang kalihokan nga untop sa panahon. Dili gayod kita angayng mobati nga ang atong paningkamot dili takos itaho. (Itandi ang Marcos 12:41-44.) Sa pagkatino, angay natong itaho kon unsay atong nahimo! Ang pagbaton ug usa ka paagi diha sa balay, sama sa paggamit ug kalendaryo, aron irekord ang oras nga gigugol sa ministeryo magsilbi ingong kanunayng pahinumdom sa paghimog tukmang taho dihadiha pagkatapos sa matag bulan.
4 Ihatag ang Gikinahanglang Tabang: Ang lokal nga mga kahikayan tingali angayng pauswagon sa pagtabang kanilang nanginahanglan sa paghimog makanunayong pagpakig-ambit diha sa ministeryo. Ang sekretaryo sa kongregasyon ug mga tagdumala sa pagtuon sa libro angayng maghikay sa eksperyensiyadong mga magmamantala sa pagtanyag ug tabang. Kon ikaw adunay mga anak o ubang mga estudyante sa Bibliya nga di-bawtismadong mga magmamantala, bansaya sila sa pagtaho sa ilang binuhatan matag bulan.
5 Hinumdomi ang sugilanon sa kinabuhi, “Mapasalamaton sa Taas nga Kinabuhi Diha sa Pag-alagad Kang Jehova,” sa Oktubre 1, 1997, Bantayanang Torre. Si sister Ottilie Mydland nga taga-Norway nahimong makanunayong magmamantala sa maayong balita una pa sa iyang bawtismo sa 1921. Kapitoag-unom ka tuig sa ulahi, sa edad nga 99, siya miingon: “Nalipay ako nga posible pa gihapon nga mahimo akong makanunayon nga magmamantala.” Pagkatalagsaong tinamdan alang sa tanang alagad ni Jehova aron sundogon!