Gamitang mga Brosyur Aron Danihon ang Hunahuna ug Kasingkasing
1 Ang kamatuoran sa Bibliya kinahanglang ipresentar aron danihon ang hunahuna ug kasingkasing. Sa dihang gipatin-aw ni Jesus ang kamatuoran ngadto sa iyang mga mamiminaw, iyang gipili ang mga ulohan nga nakapainteres ug nakapalihok kanila. (Luc. 24:17, 27, 32, 45) Ang kalamposan sa atong ministeryo nag-agad ug dako sa atong panlimbasog sa pag-ila sa espirituwal nga mga panginahanglan sa atong mga mamiminaw.
2 Ang mga brosyur mahimong epektibong mga kahimanan sa pag-abot sa hunahuna ug kasingkasing niadtong atong ikahimamat diha sa ministeryo. Hunahunaa nga abante kon kinsay hayan mosanong nganha sa mensahe sa matag brosyur nga ginapasiugda sa Agosto:
—Usa ka Basahon Alang sa Tanang Tawo. Kadtong walay pagtuo sa Bibliya o walay bug-os nga pag-ila sa bili niini diha sa ilang kinabuhi makabenepisyo gikan sa pangatarongan niining brosyura.
—Tinuod Bang May Pagtagad ang Diyos Kanato? Ang mga tawo nga naglisod sa panginabuhi o nakasinatig katalagman moapresyar niining makapahupay nga mensahe bahin sa usa ka umaabot nga wala ing pag-antos.
—Unsa ang Katuyoan sa Kinabuhi—Sa Unsang Paagi Makaplagan Nimo Kini? Ang mga batan-on nga ugdang nga naghunahuna bahin sa ilang kaugmaon makabenepisyo gikan sa gipasukad sa Bibliya nga mga tubag nga makaplagan niining brosyura.
—Ang Kagamhanang Mopatunghag Paraiso. Ang bisan kinsa nga nagtrabaho sa kagamhanan tingali mosanong niining mensahea bahin sa paagi sa Gingharian sa Diyos sa pagsulbad sa malisod nga mga suliran sa katawhan.
—Sa Dihang ang Imong Minahal Mamatay. Daghang direktor sa paglubong moapresyar sa pagdawat ug mga kopya niining brosyura nga magamit alang sa nagbangotang mga pamilya. Ang mga magmamantala nga nagsangyaw sa mga sementeryo migamit niining brosyura sa paghupay sa mga nanagbangotan. Duha ka sister miduol sa usa ka pamilya nga may pito ka membro nga nag-ampo diha sa usa ka lubnganan. Ingong resulta sa pagpaambit sa makapahupayng mensahe gikan sa brosyur, ang usa ka pagtuon sa Bibliya nasugdan uban sa inahan sa pagkasunod adlaw!
—Angay ba Nimong Tuohan ang Trinidad? Ang usa ka relihiyoso kaayong tawo hayan mosanong sa kamatuoran nga makaplagan niining gipamatud-an-pag-ayong pagyagyag sa pangunang doktrina sa Kakristiyanohan.
3 Sinatia ang imong kaugalingon sa matag brosyur, ug tinoa kon sa unsang paagi magamit kana sa labing maayo diha sa imong teritoryo. Alang sa sinugyot nga mga presentasyon, tan-awa ang likod nga panid sa Hulyo 1998 nga isyu sa Atong Ministeryo sa Gingharian. Hinaot si Jehova magpanalangin sa imong mga panikaysikay sa pag-abot sa mga hunahuna ug mga kasingkasing sa mga tawo.—Mar. 6:34.