Ang Pagpayunir—Maalamong Paggamit sa Atong Panahon!
1 ‘Daghan na ako kaayog buluhaton! Maalamon pa ba gayod alang kanako nga magpayunir niining panahona?’ Kini ang gihunahuna sa usa ka sister samtang naminaw siya sa usa ka ansiyanong payunir nga naghatag sa usa ka bahin sa sirkitong asembliya nga nag-ulohag “Makugihong Pagpadayon Pinaagig Payunir nga Ministeryo.” Usa ka batan-ong igsoong lalaki nga samang naminaw naghunahuna, ‘Unsaon niya sa paghatag ug luna alang sa pagpayunir? Di ko ansiyano, pero puno na ang akong kinabuhi sa kalihokan!’
2 Samtang gipadayon sa ansiyano ang paghisgot sa mga panalangin sa pagpayunir, iyang giinterbiyo ang pipila ka payunir gikan sa sirkito kinsa mihisgot sa mga pagpasibo nga ilang gihimo aron magpayunir ug kon sa unsang paagi madagayaong gipanalanginan ni Jehova ang ilang mga paningkamot. Ang usa maoy baldado, ang usa adunay di-magtutuong kapikas, ug ang usa mibiya sa kalibotanong karera apan nakahimo sa pagkinabuhi segun sa iyang kita. Kay nakapaminaw kon sa unsang paagi kini nga mga payunir nagmalamposon uban sa tabang ni Jehova, ang igsoong lalaki ug igsoong babaye nga naminaw misugod sa pagsusi pag-usab sa ilang kaugalingong panghunahuna ug mga kahimtang. Among gidapit kamo sa pagbuhat usab niana, ilabina kay ang gikunhorang mga kinahanglanong oras alang sa mga payunir sa pagkakaron maabot na man sa daghan dugang pang mga magmamantala sa maayong balita.
3 Kita nahibalo nga si Jehova mao ang Maglalalang ug Unibersohanong Soberano ug nga niana utang nato ang atong mga kinabuhi kaniya. (Dan. 4:17; Buh. 17:28) Maoy tin-aw kanato nga si Jehova naggamit sa usa lamang ka organisasyon. Kita nakapribilehiyo sa pag-alagad nga maunongon duyog niana, nga nagapaluyo sa “kasaligan ug mabuot nga ulipon” sa paghatag ug pamatuod sa Gingharian sa dili pa moabot ang kataposan. (Mat. 24:45; 25:40; 1 Ped. 2:9) Tungod kay nagkinabuhi sa ulahing bahin sa “kataposang mga adlaw,” atong naamgohan nga ang panahon sa pagwali talitapos na. (2 Tim. 3:1) Kasamtangan, kita kinahanglang mopaluyo sa atong mga banay sa materyal nga paagi. (1 Tim. 5:8) Ang kita sa usa ka tawo daw dili makatagana ug igong kapangabuhian sama sa kahimtang kaniadto. Tingali ang atong panglawas dili na ingon sa naandan. Ug sa pagkamatinud-anon, buot natong magbaton ug diyutayng panahon ug pipila ka kahinguhaan nga gugolon sa atong kaugalingon. (Eccl. 3:12, 13) Busa kita tingali maghunahuna kon ang pagsanong sa pagdapit nga magpayunir maalamon ba gayod.
4 Anaa na sa matag usa kanato ang pagsusi sa atong kaugalingong mga kahimtang nga mainampingon ug sa paghukom kon kita ba makapayunir. (Roma 14:12; Gal. 6:5) Makapadasig ang pagmatikod sa nagauswag nga gidaghanon kinsa misanong sa pagdapit nga magpayunir. Bisan pa sa mga pagpig-ot ug mga suliran niining kataposang mga adlaw, ang taho sa pag-alagad nga gipatik diha sa 1999 Yearbook nagpakita nga duolan sa 700,000 sa katawhan ni Jehova sa tibuok kalibotan ang makugihong nagapadayon diha sa payunir nga ministeryo. Nag-alagad man ilalom sa malisod nga mga kahimtang sa ekonomiya, kulang sa transportasyon, nakasinati sa mga suliran sa panglawas, o nakasugamak ug ubang mga kakulian ug mga kalisdanan, kini nga mga igsoong lalaki ug babaye wala magakaluya sa pagbuhat kon unsay maayo, ug kini maoy dalayegon. (Gal. 6:9) Ilang gidawat ang tanyag ni Jehova nga ibutang siya sa pagsulay. (Mal. 3:10) Ilang gibati nga ang pagpayunir maoy maalamon kaayong paggamit sa ilang limitadong panahon ug kahinguhaan ug nga niana si Jehova nagpanalangin gayod kanila sa paghimog kinahanglanong mga pagpasibo aron mosulod ug magpabilin diha sa payunir nga buluhaton.
5 Ang mga Payunir Ginapanalanginan: Usa ka sister sa Cameroon nga adunay usa ka bata pa kaayong anak nga babaye nagsaysay: “Sukad sa iyang pagkahimugso, ang akong anak nga babaye kanunayng mikuyog kanako diha sa ministeryo. Bisag dili pa siya makamaong molakaw, ako siyang gikarga sa akong likod, nga lig-ong gibugkos sa usa ka pirasong panapton. Usa ka buntag niana diha sa ministeryo, mihunong ako sa usa ka gamayng tindahan sa daplin sa dalan. Ang akong anak mibiya sa akong kilid, nga iyang gidala ang pipila ka magasin gikan sa akong bag. Siya nanglimbasog sa paglakaw ngadto sa duol nga gamayng tindahan. Bisan tuod siya dili kaayo makasulti, iyang nabutad ang atensiyon sa usa ka babaye ug mitanyag ug magasin. Ang babaye nahibulong gayod nga makita ang maong bata nga nakig-ambit niining kalihokana. Siya andam nga midawat sa magasin maingon man sa pagtuon sa Bibliya sa balay!”
6 Sa pagsanong sa awhag alang sa dugang oksilyare nga mga payunir, usa ka ansiyano ug ulo sa pamilya sa Zambia nga adunay bug-os-panahong sekular nga trabaho mihukom nga mag-oksilyare payunir bisan pa sa iyang puliki nga eskedyul. Buot niyang magpahilunag panig-ingnan alang sa kongregasyon ug sa iyang pamilya. Sa pipila ka okasyon, iyang iparada ang iyang sakyanan sa daplin sa dalan ug patokaron ang The Secret of Family Happiness diha sa audiocassette ug dapiton ang mga lumalabay sa pagduol ug maminaw kon unsay ginabasa sa makusog. Nianang paagiha, siya nakahimo sa pagpahimutang ug 16 ka librong Family Happiness ug 13 ka librong Knowledge, ug siya nakasugod ug duha ka pagtuon sa Bibliya.
7 Ang maayong espiritu sa pagpayunir namatikdan usab diha sa silingang nasod sa Zimbabwe. Sulod sa Abril 1998, usa ka kongregasyon nga may 117 ka magmamantala mitaho ug 70 ka oksilyare payunir ug 9 ka regular payunir. Laing kongregasyon nga may 94 ka magmamantala dihay 58 ka oksilyare payunir nga nagtaho. Lain pang kongregasyon, nga may 126 ka magmamantala, mitaho nga 58 ang mihukom nga mag-oksilyare payunir duyog sa 4 ka regular payunir. Ang milabayng tuig sa pag-alagad napamatud-ang talagsaon sa Zimbabwe. Bisan tuod ang mga igsoon didto puliki kaayo sa mga butang maylabot sa pamilya, mga kalihokan sa kongregasyon, ug pagtukod ug sangang buhatan, ilang gihatagan ug pagtagad ang paggugol sa ilang panahon nga maalamon diha sa ministeryo.
8 Ang mga payunir nakaamgo nga ang pagsugod sa buluhatong pagpayunir ug paglahutay diha niana wala magdepende sa ilang kaugalingong kusog. Sila ang unang modawat nga bisan unsay ilang maarangang buhaton maoy posible tungod kay sila “nagasandig diha sa kusog nga ginahatag sa Diyos.” (1 Ped. 4:11) Ang ilang pagtuo nagpaarang kanila sa pagpadayon sa ilang ministeryo sa adlaw-adlaw. Inay kay pangitaon ang ilang kaugalingong kasayon ug mga kaharuhay, ang malamposong mga payunir nakaamgo nga aron makapadayong makugihon, “ang kusganon nga pakigbisog” tingali gikinahanglan, apan ilang dawaton ang daghang panalangin ingong resulta.—1 Tes. 2:2.
9 Ang Panig-ingnan ni Pablo Takos Sundogon: Ang Bibliya nagrekord sa mga kalamposan ni apostol Pablo sa ministeryo ug sa maayong tabang nga iyang gihatag sa daghan kaayong tawo. Bisan pa niana, kon ang si bisan kinsa nabug-atan, mao usab si Pablo. Iyang giantos ang paglutos ug pisikal nga mga kalisdanan aron sa pagsangyaw sa maayong balita ug sa pagpalig-on sa mga kongregasyon. Siya usab miagwanta gayod sa grabeng suliran sa panglawas. (2 Cor. 11:21-29; 12:7-10) Siya determinado sa paggugol sa iyang panahon nga maalamon. Siya miila nga iyang gibuhat ang tanan niyang buluhaton uban sa tabang ni Jehova. (Filip. 4:13) Walay usa niadtong giabagan ni Pablo ang mangatarongan sa paghinapos nga ang iyang panahon ug mga panlimbasog diha sa pag-alagad kang Jehova ang nausik o naggamit unta nga mas maayo pa. Ngani, kita sa gihapon nabenepisyohan karong adlawa gikan sa maalamong paggamit ni Pablo sa iyang panahon! Pagkadako sa atong pagpabili sa iyang dinasig nga tambag nga motabang kanato sa pagsusi sa atong mga unahonon ug motapot sa kamatuoran niining malisod nga mga panahon!
10 Karon nga dili gayod sama kaniadto, ‘ang panahong nahibilin sa pagsangyaw sa maayong balita mubo na.’ (1 Cor. 7:29; Mat. 24:14) Busa, haom nga pangutan-on ang atong kaugalingon, ‘Kon ang akong kinabuhi matapos nga wala dahoma ugma, makaingon ba ako kang Jehova karon nga akong gigamit ang akong panahon nga maalamon?’ (Sant. 4:14) Nganong dili ipakigsulti kang Jehova diha sa pag-ampo karon, nga pasaligan siya sa imong tinguha nga gamiton ang imong panahon nga maalamon ingong usa sa iyang mga Saksi? (Sal. 90:12) Pag-ampo alang sa tabang ni Jehova aron sa pagpayano sa imong kinabuhi. Bisan tuod ikaw tingali sa miagi nakahukom na nga dili makapayunir, mahimo kahang sa pagkakaron imo nang nakaplagan nga ang pagpayunir ikapahaom sa imong kinabuhi?
11 Pahimusli ang Imong mga Kahimtang: Masabtan, tungod sa mga kahimtang dili tanang nagtinguha sa ingon ang makaeskedyul ug 70 ka oras sa usa ka bulan sa pag-alagad ingong regular nga mga payunir. Hinunoa, daghang magmamantala ang nagahikay sa paggugol ug 50 ka oras sa usa ka bulan diha sa ministeryo ingong oksilyare nga mga payunir sa masubsob kutob sa maarangan o mapinadayonon. Kon ang imong mga kahimtang mao nga ikaw sa pagkakaron dili makaoksilyare o regular payunir, ayawg kaluya. Padayong iampo nga ang imong mga kahimtang mausab. Sa kasamtangan, kon ang mga pagpasibo dili gayod posible, hupti ang kahupayan sa pagkahibalo nga si Jehova nahimuot pag-ayo sa bisan unsa nga imong maarangan nga buhaton sa bug-os-kalag sa pag-alagad kaniya. (Mat. 13:23) Siya nagmatikod nga ikaw lig-ong nagabarog sa iyang kiliran ug nga ikaw makugihong nanikaysikay nga mahimong matinumanong magmamantala nga dili gayod tugotang molabay ang bulan nga isalindot ang kahigayonan nga mohatag ug pamatuod. Tingali ikaw mahimong mouswag pinaagig pagpalantip sa imong mga katakos sa pagsangyaw, nga nagabuhat aron mouswag ingong usa ka magwawali ug magtutudlo sa maayong balita.—1 Tim. 4:16.
12 Kay ang “dako ug makalilisang nga adlaw ni Jehova” haduol na kaayo, kinahanglan natong gamiton ang nahibiling panahon nga maalamon kon buot natong taposon ang buluhaton nga kita gisugo sa pagbuhat. (Joel 2:31) Si Satanas nahibalo nga ang iyang panahon mubo na, ug dili gayod sama kaniadto, siya naningkamot sa tanan niyang gahom aron magkalamukat ang atong mga kinabuhi ug aron malisdan kita sa pagpunting gayod diha sa tinuod nga hinungdanong mga butang. (Filip. 1:10; Pin. 12:12) Ayaw gayod pakamenosa ang interes kanimo sa Diyos. Si Jehova makatabang kanimo sa pagpayano sa imong kinabuhi ug sa pagpangagpas kutob sa imong maarangan diha sa ministeryo. (Sal. 145:16) Sa pagkamalipayon, daghan ang nakakaplag, diha sa pagsusi pag-usab sa ilang mga kahimtang, nga sila makaduyog sa mga ranggo sa oksilyare o regular nga mga payunir. Sa pagkamatuod, ang mga payunir nakakaplag ug dulot nga katagbawan sa paggamit sa ilang panahon nga maalamon. Mahimo ka bang usa kanila?