Magpalipay ang Abanteng Pagpangandam
1 Ang pagpakig-ambit diha sa ministeryo sa kanataran magpalipay natog dako. (Sal. 89:15, 16) Siyempre, ang pagpangandam mao ang yawing butang aron matagamtam sa bug-os ang maong kalipay. Kon mas maayo ang atong pag-andam, mas dako ang malampos ta, ug kon mas dako ang atong malampos, mas labaw ang kalipay ta.
2 Gamita ang mga Himan nga Gitagana: Sugdi ang imong pagpangandam pinaagi sa pagbasa ug pagsusi sa materyal diha sa Atong Ministeryo sa Gingharian. Kasagaran magtagana kinig maayong-pagkahan-ay nga mga presentasyon nga gidisenyo sa pagtabang kanimo sa pagpresentar sa mensahe sa Gingharian nga sayon ug epektibo. Imong makaplagan ang mga panig-ingnan kon unsaon sa pagbuntog sa komon nga mga pagtutol. Ang espesipikong mga ideya gitagana kon unsaon sa paghimog epektibong pagbalikduaw, uban sa tumong sa pagsugod ug usa ka pagtuon sa Bibliya. Ikaw aduna ing kagawasan sa pagpasibo niining mga sugyota ngadto sa punto diin ganahan ka sa paggamit niana. Dugang niini, aduna ka ing Nangatarongan nga libro, nga nagtaganag nagkadaiya kaayong mga introduksiyon maingon man sa mga tubag sa mga tigsumpo sa panaghisgot, busa magtabang nimo sa pagkahimong mas epektibo diha sa daghang kahimtang nga imong maatubang.
3 Susiha ang publikasyon nga imong itanyag, ug pilia ang usa o duha ka makapainteres pag-ayo nga mga puntos nga ikapakita mo sa tagbalay. Ang makapukaw-sa-hunahuna nga balita nga imong nadungog o nabasa tingali magamit nimo ingong paagi sa pagsugod sa usa ka panaghisgot. Pangandam daan sa kasagarang mga pagtutol nga lagmit imong maatubang, ug batoni ang pipila ka ideya diha sa hunahuna kon sa unsang paagi mahimong motubag ka. Dayon gahini ug pipila ka minutos sa pag-ensayo kon unsay imong isulti diha sa pultahan.
4 Tambong sa Matag Tigom sa Pag-alagad: Paminawg maayo panahon sa Tigom sa Pag-alagad sa dihang ang mga sugyot nga gipresentar diha sa Atong Ministeryo sa Gingharian hisgotan, repasohon, ug ipasundayag. Matikdi ang mga ideya nga gibati nimong ikalangkob ngadto sa imong presentasyon. Hinumdomi ang pipila sa komon nga mga kahimtang nga imong naatubang diha sa ministeryo, ug hunahunaa ang mga paagi nga niana ikaw makapamatuod nga mas pang epektibo. Ipakigsulti kining mga butanga sa ubang mga magmamantala sa dili pa ug human sa tigom.
5 Makaseguro ka nga kon ikaw “naandam alang sa tanang maayong buhat,” pagagantihan ka sa mas dakong kalipay ug kalamposan sa pagtabang sa uban sa pagkaplag sa dalan sa kinabuhi.—2 Tim. 2:21.