Pagpangandam—Yawi sa Kalamposan
1 Ang abanteng pagpangandam magatabang sa pagbuntog sa bisan unsang kakulba nga hayan imong bation maylabot sa pakig-ambit sa pag-alagad sa kanataran. Samtang mopadulong ka sa mga pultahan, ikaw nahibalo na kon unsa ang buot nimong isulti ngadto sa mga tagbalay. Dili kinahanglang magapanuko ka bahin sa pagtubag sa mga pagsupak. Oo, ang bug-os nga pagpangandam mao ang yawi sa pagpahait sa atong mga katakos sa pagsangyaw ug pagpanudlo.
2 Si Pablo nag-agda kanato nga “masul-oban ang atong mga tiil sa kasangkapan sa maayong balita sa pakigdait.” (Efe. 6:15) Kini nagalakip sa pag-andam sa atong hunahuna ug kasingkasing ug pagbaton ug positibong tinamdan. Sa dihang kita andam, kita magantihan uban sa mga bunga sa Gingharian, nga magpalipay kanato.—Buh. 20:35.
3 Kon Unsaon sa Pagpangandam Alang sa Buluhatong Pagsangyaw: Kinahanglang atong pilion ang usa ka presentasyon nga bation natong komportable kanato, tingali gikan nianang anaa sa librong Nangatarongan o kanang anaa sa kataposang panid sa Atong Ministeryo sa Gingharian. Hatagi ug maapingong hunahuna ang kasulatang giplano nimong gamiton, nga nagatino kon unsang mga pulonga o prase ang imong igapasiugda aron mapatugbaw ang imong pangunang punto. Dili maayo ang pagsag-ulo sa presentasyon; hinuon, maoy maayo ang pagsilsil sa ideya sa hunahuna ug ibungat kini sa imong kaugalingong mga pulong diha sa makapadaning paagi.
4 Bug-os tan-awa ang publikasyon nga imong giplanong itanyag, ug pilia ang mga puntos nga gibati nimong magpainteres sa katawhan sa imong teritoryo. Hunahunaa kon sa unsang paagi tingali imong mapahaom ang imong presentasyon alang sa lainlaing mga tagbalay—usa ka lalaki, usa ka babaye, usa ka tigulang nga tawo, o usa ka batan-on.
5 Nasulayan na ba nimo ang paghimog mga praktis sesyon? Magtigom duyog sa mga membro sa pamilya o ubang mga magmamantala sa paghisgot kon unsang mga presentasyona ang hayan epektibo, ug unya duyog kanang bansayon aron ang tanan makahupot nianag maayo sa hunahuna. Sulaying gamiton ang aktuwal nga mga kahimtang ug mga pagsupak nga mahibalag sa ministeryo. Ang maong pagbansay magapauswag sa imong pagkalarino sa pagsulti, magpatubo sa imong pagka-epektibo sa pagsangyaw, ug magpalig-on sa imong pagsalig.
6 Ingong dugang sa pagpangandam ug pagbansay sa imong presentasyon, kinahanglang imong suknaon usab ang imong kaugalingon, ‘Ang sinina ba nga giplano nakong gamiton haom alang sa ministeryo? Anaa ba sa akong bag sa libro ang akong gikinahanglan, lakip sa literatura nga giplano nakong gamiton? Kini ba anaa sa maayong kahimtang? Dala ko ba ang akong librong Nangatarongan, tracts, house-to-house records, ug lapis?’ Ang mahunahunaong pagplano nga abante magaamot sa mas mabungahong adlaw diha sa kanataran.
7 Human nato mahimo ang labing maayong maarangan ta sa pag-andam sa atong mga kaugalingon, kinahanglang moampo kita sa espiritu ni Jehova sa pagtabang kanatong mahimong malamposon. (1 Juan 5:14, 15) Ang paghatag ug pagtagad sa pagpangandam moresulta sa pagkaplag ug mas dakong kalipay sa atong buluhaton, samtang kita ‘bug-os nagabuhat sa atong ministeryo.’—2 Tim. 4:5.