Nagabuhat Ka ba nga Adunay Katuyoan?
1 Si Jehova maoy Diyos sa katuyoan. (Isa. 55:10, 11) Kita gitambagan sa pagsundog kaniya. (Efe. 5:1) Kini angay gayod nga ipasundayag sa paagi nga kita nagatuman sa atong ministeryo. Busa ang pangutana maoy haom: “Nagabuhat ka ba nga adunay katuyoan?”
2 Ang imong pagsangyaw sa kabalayan, pagpamatuod sa impormal nga paagi, ug pag-apod-apod sa literatura ang tanan maoy bahin sa may-katuyoang ministeryo. Apan hinumdomi nga ang atong buluhaton naglangkit dili lamang sa pagsangyaw kondili sa paghimog tinun-an usab. (Mat. 28:19, 20) Human makapugas ug mga binhi sa kamatuoran sa Gingharian, kinahanglan nga kita mobalik aron bisibisan sila ug atimanon nga regular samtang kita mosalig kang Jehova sa pagpatubo. (1 Cor. 3:6) Kinahanglan nga kita magmahunahunaon bahin sa mga pagbalikduaw ug pagsugod ug mga pagtuon sa Bibliya.
3 Padakoa ang Imong Ministeryo: Aduna kanunay ing maayong pagbati sa dihang imong mapalandong ang nahimo mo diha sa pag-alagad ug moingon sa imong kaugalingon: “Akong nalampos kon unsay gituyo nakong buhaton.” Ingon sa natala sa 2 Timoteo 4:5, si Pablo nag-awhag: “Buhata sa bug-os ang imong ministeryo.” Kana naglakip sa pagdugang sa imong mga paningkamot aron sundalon ang tanang interes nga nakaplagan. Sa imong senemanang eskedyul sa pag-alagad, pagplanog tinong panahon sa mga pagbalikduaw. Manlimbasog sa tumong nga sulayang mosugod ug mga pagtuon sa Bibliya uban niadtong nakiling sa pagkamatarong. Kini angay nga mao ang imong katuyoan sa dihang makig-ambit diha sa ministeryo.
4 Pangutan-a ang mga magmamantala kon unsay ilang gibati sa dihang ilang nakita ang ilang mga estudyante sa Bibliya nga nabawtismohan didto sa asembliya. Sila nagmaya, posible nga sama ka malipayon sa mga nabawtismohan. Ilang napalampos ang dakong katuyoan! Usa ka tighimog tinun-an nagpahayag niining paagiha: “Ang paghimog mga tinun-an nagkahulogan ug paghimog dugang mga magdadayeg ni Jehova. Kini nagkahulogan ug kinabuhi alang kanilang modawat sa kamatuoran. Basta gikalipay ko ang pagtudlo sa kamatuoran ngadto sa uban—talagsaon kaayo kini! . . . Daghan kanilang nakadangat sa paghigugma kang Jehova nahimong akong minahal kaayo nga mga higala.”
5 Handurawa nga nakatabang ug tawo sa pagkahimong usa ka dedikadong alagad ni Jehova! Pagkadakong hinungdan sa kalipay! Ang maong bunga moresulta tungod sa pagbuhat nga adunay katuyoan diha sa ministeryo.—Col. 4:17.