Paneguroa nga Mobalik Ka!
1 “Pagkamaayong panaghisgot! Kinahanglan nakong hinumdoman nga mohimog balikduaw didto.” Nakasulti ka na ba nianang mga pulonga ug sa ulahi nakalimot kon asa nagpuyo ang tawo? Kon mao, ikaw nasayod nga ang bugtong paagi nga ikaw makaseguro nga mobalik ka maoy sa pagtala niana.
2 Isulat Kanang Tanan: Samtang ang panaghisgot sa interesadong tawo lunhaw pa sa imong hunahuna, dalikyati sa pagsulat sa tanang hinungdanong impormasyon bahin sa duaw. Ilista ang ngalan sa tawo ug kon unsaon nimo siya pag-ila. Isulat ang iyang adres, apan ayawg panaghap niana—susiha aron maseguro nga ang imong gisulat maoy husto. Itala ang ulohan nga inyong gihisgotan, ang tanang teksto nga imong gibasa, ug kon unsang literatura ang napahimutang.
3 Kon ikaw nagbilin sa tawo ug usa ka pangutana nga tubagon sa sunod nga pagduaw, isulat kana. May nasayran ka ba bahin sa maong tawo, sa iyang pamilya, o sa iyang relihiyon? Kon mao, maghimog nota niini. Dayon sa sunod higayon nga ikaw moduaw, ang imong paghisgot niana magpasundayag sa imong personal nga interes sa indibiduwal. Sa kataposan, ilakip ang adlaw ug takna sa imong unang pagduaw ug kon kanus-a ang imong giingon nga ikaw mobalik. Pinaagi sa paghimog tukmang mga nota, ikaw makabaton ug tin-awng mga pahinumdom ug lagmit dili makalimot sa imong saad nga mobalik.—1 Tim. 1:12.
4 Sa dihang kompleto na ang imong rekord, ibutang kana duyog sa uban nimong mga gamit sa pag-alagad sa kanataran—bag sa libro, Bibliya, librong Nangatarongan, ug literatura—aron kana kanunayng daling madala. Labing maayo nga isulat ang mga wala sa balay diha sa house-to-house nga mga rekord nga bulag gikan niadtong imong gigamit sa pagnota sa imong mga balikduaw. Siyempre, bisan unsa pay imong paningkamot sa pagtipig ug tukmang rekord sa mga balikduaw, ang hinungdanong butang mao ang pagseguro nga mobalik ka!
5 Maghunahuna Bahin sa Tawo: Sa dihang mangandam alang sa ministeryo, sublia ang imong mga nota sa balikduaw. Palandonga ang matag indibiduwal ug kon unsa ang labing maayong paaging himoon sa dihang moduaw pag-usab. Hunahunaa kon unsaon sa pag-ugmad sa interes sa tawo ngadto sa usa ka pagtuon sa Bibliya sa balay. Ang maong pagplano makapauswag sa imong pagkamabungahon ingong ministro sa maayong balita ug, sa ingon, sa imong personal nga kangaya.—Prov. 21:5a.
6 Busa sa sunod higayon nga ikaw makakaplag ug usa nga mapatalinghogon, ayawg pangatarongan nga dali ka nga makahinumdom sa duawonon. Hinunoa, isulat kana, sublia ang imong mga nota, kanunayng maghunahuna labot sa maong tawo, ug dayon paneguroa nga mobalik ka!