Tabangi Kadtong “Hustong Nakiling”

1. Kinsay gitigom ni Jehova alang sa iyang kaugalingon sa atong adlaw?

¹ Ang matag tawo adunay tinamdan nga nakagamot na pag-ayo sa iyang mahulagwayong kasingkasing. (Mat. 12:35) Ang Bibliya naghisgot sa usa ka tawo kansang “kasingkasing buot makig-away.” (Sal. 55:21) Ang uban “maaligutgoton.” (Prov. 29:22) Apan adunay uban usab nga “hustong nakiling alang sa kinabuhing walay kataposan.” (Buh. 13:48) Sa atong adlaw, si Jehova nagtigom alang sa iyang kaugalingon sa mga tawo nga hustong nakiling. (Hag. 2:7) Sa unsang paagi ato silang matabangan nga mahimong mga magsisimba ni Jehova?

2. Unsay nalangkit sa atong pagtuman sa atong buluhaton sa paghimog mga tinun-an?

² Balik sa Matanlagong Paagi: Ang pagbaton ug hustong tinamdan sa pagbalikduaw maoy hinungdanon aron atong matuman ang atong buluhaton sa paghimog mga tinun-an. (Mat. 28:​19, 20) Andam ba kitang mougmad sa interes nga atong makaplagan? Balikan ba nato ang tanang modawat ug literatura o ang magpakitag interes sa maayong balita? Mapinadayonon ba kitang maningkamot sa pagtabang kanila nga mouswag sa espirituwal? Tungod kay nalangkit man ang kinabuhi, kita angayng maningkamot sa pag-ugmad sa tanang interes nga atong makaplagan.

3. Unsay angay natong himoon human makapakighisgot ug usa ka tawo diha sa ministeryo?

³ Samtang mahinumdoman pa nimo ang imong pakighisgot uban sa interesadong tawo, gahinig panahon ang pagsulat sa iyang ngalan ug adres. Isulat ang ulohan nga nahisgotan, ang bisan unsang mga teksto nga nabasa, ug kon unsang literatura ang napahimutang. Dayon, paneguroa nga mobalik dayon kutob sa mahimo.

4. Sa unsang paagi kita makahimog epektibong mga balikduaw?

⁴ Paghimog mga Balikduaw: Sa dihang ikaw mobalikduaw, makatabang ang pagkamainiton ug pagkamahigalaon ug ang pagpakitag sinserong personal nga interes sa tagbalay. Hupting yano ug Kasulatanhon ang panaghisgot. Pag-andam ug makapadaning ulohan sa Bibliya nga mahisgotan, ug sa kataposan sa maong duaw, pagpatungha ug pangutana nga pagatubagon sa sunod duaw. Labing maayo nga likayan ang pagpakig-ergo sa di-kasulatanhong mga panghunahuna nga mahimong ipahayag sa tagbalay. Paningkamoting mahisgotan ang mga butang nga gikauyonan ninyong duha.​—Col. 4:6.

5. Unsang paningkamot ang gihimo sa usa ka payunir, ug uban sa unsang mga resulta?

⁵ Ang paghimog mga balikduaw nanginahanglag paningkamot, apan ang mga balos maoy makapatagbaw. Usa ka payunir sa Japan ang mihimog tumong sa paghimog dugang mga balikduaw matag bulan. Nagsugod siya sa paghupot ug rekord sa tanan niyang mahibalag sa pagpamalaybalay, ug sulod sa pito ka adlaw, gibalikan niya sila. Nangandam siya pag-ayo kon unsay angay niyang isulti ug gibuhat ang iyang ministeryo uban ang bug-os nga pagsalig sa mensahe nga iyang dala. Sa usa sa iyang mga giduaw, nakasugod siyag pagtuon uban sa usa ka tawo nga miingon: “Kanunay ko kamong gisalikway. Kadto mao ang unang higayon nga ako naminaw.” Ang mahigugmaong paglahutay sa maong payunir dunay mga resulta. Sa kataposan sa bulan siya nakataho ug napulo ka pagtuon sa Bibliya.

6. Nganong angay kitang mopadayon sa paghimog mga balikduaw?

⁶ Ang mga kahimtang sa mga tawo kanunayng mag-usab-usab. (1 Cor. 7:31) Kasagaran nagkinahanglan kinig daghang pagsulay aron maabtan pag-usab ang interesadong tawo diha sa balay. Pinaagi sa atong paghimog mga balikduaw sa matanlagong paagi, atong matabangan kadtong mga hustong nakiling nga makasubay sa dalan padulong sa kinabuhing walay kataposan.​—Mat. 7:​13, 14.