Pagpangandam—Hinungdanon Alang sa Epektibong Balikduaw
1. Sa unsang paagi ang unang Kristohanong ministeryo ipakaylap?
1 Giandam pag-ayo ni Jesus ang iyang mga tinun-an aron mahimong epektibong mga magwawali sa “maayong balita sa gingharian.” (Mat. 4:23; 9:35) Iyang gibansay sila samtang nagsangyaw sa Palestina. Hinunoa, sa wala pa siya mobalik sa langit, gipadayag ni Jesus nga ang Kristohanong ministeryo kinahanglang pakaylapon pag-ayo aron sa “paghimog mga tinun-an sa katawhan sa tanang kanasoran.”—Mat. 28:19, 20.
2. Unsay nalangkit sa pagtuman sa sugo ni Jesus nga ‘maghimog mga tinun-an’?
2 Kanang buluhatona naglakip sa pagbalikduaw sa mga tawong nagpakitag interes sa maayong balita sa Gingharian sa Diyos ug sa pagtudlo kanila sa pagtuman sa tanang butang nga gisugo ni Kristo. Aron mahimong epektibo ang atong pagbalikduaw, kinahanglan kitang mangandam pag-ayo.
3. Unsay maayo tingali nimong himoon aron makabalikduaw?
3 Pagplano nga Abante: Ang pipila ka magmamantala magbilin ug pangutana sa kataposan sa unang duaw ug dayon mosaad nga tubagon kana sa ilang pagbalik. Ang paggamit sa impormasyon diha sa librong Gitudlo sa Bibliya inigbalik nila nakatabang nga masugdan dayon ang pagtuon sa Bibliya.
4. Nganong dili na nato angayng hulaton ang bag-ong mga gula sa mga magasin una kita mobalikduaw?
4 Ang pagbaton ug duha lamang ka magasin matag bulan wala magpasabot nga angay natong hulaton nga madawat ang mga magasin sa sunod bulan una ta mobalikduaw. Atong maugmad ang interes sa usa ka tawo pinaagi sa paghisgot sa impormasyon nga anaa sa magasin nga iyang nabatonan.
5. Unsay kaayohan sa paghimog tumong sa dihang mobalikduaw ka?
5 Paghimog Tumong: Sa dili ka pa mobalik, repasoha kadiyot ang imong mga nota ug tinoa kon unsay imong gustong mapalampos. Pananglitan, paghisgot ug usa ka punto gikan sa publikasyon nga imong gibilin. O pagbilin ug dugang mga basahon nga may kalabotan sa una ninyong gihisgotan. Kon may gibilin kang pangutana, ang imong tumong mao pagtubag gayod niana. Basaha gikan mismo sa Bibliya ang usa ka teksto nga naghisgot sa punto nga gusto nimong ipasiugda.
6. Unsa ang atong katuyoan sa pagbalikduaw?
6 Ang Atong Katuyoan: Siyempre, ang atong katuyoan mao ang pagsugod ug pagtuon sa Bibliya. Usa ka brader ang mitanyag ug pagtuon sa Bibliya sa usa niya ka balikduaw, apan mibalibad siya. Mibalik ang brader nga nagdalag bag-ong mga magasin ug miingon, “Dinhi mi nagsangyaw karon, ug naa miy gipangutana sa mga tawo bahin sa Bibliya.” Human makatubag ang maong tawo, mibasa ang brader ug usa ka teksto ug usa ka haom nga parapo gikan sa usa ka publikasyon nga gigamit sa mga pagtuon sa Bibliya. Miresulta kadto ug usa ka regular nga pagtuon sa Bibliya.
7. Sa unsang paagi ang maayong pagpangandam nakatabang kanimo sa pagsugod ug usa ka pagtuon sa Bibliya?
7 Ang paggahin ug panahon sa pagpangandam alang sa pagbalikduaw takos gayod sa paningkamot. Modako ang atong kalipay, ug mahimong makapribilehiyo kita sa pagtabang sa usa nga “hustong nakiling” sa dalan sa kinabuhi.—Buh. 13:48.