Abril—Panahon nga Magmasiboton sa Maayong mga Buhat!
1 Samtang ang bagyo nagakaduol sa gipuy-ang dapit, ang panginahanglan sa pagpasidaan sa mga tawo sa umaabot nga kapeligrohan kinahanglang tagdon. Kon mas nagakaduol ang bagyo, kinahanglang mas kusganon ang mga pasidaan. Ngano? Tungod kay nameligro ang mga kinabuhi! Ang pipila ka tawo tingali wala makapaminaw sa miaging mga pasidaan. Ang uban tingali nakapaminaw apan wala molihok. Matuod usab kana sa balaang pasidaan nga kita gisugo sa pagpalanog sa dili pa ang “unos” sa matarong nga kasuko sa Diyos mohuros sa tanang timaan niining daotang kalibotan. (Prov. 10:25) Ang kinabuhing walay kataposan sa bilyonbilyon ka tawo nameligro! Ang pasidaan kinahanglang ipalanog. Kinahanglan kitang “masiboton sa maayong mga buhat.”—Tito 2:11-14.
2 Sulod sa mga dekada, ang katawhan ni Jehova napalihok sa paghimo sa panahon sa Memoryal ingong higayon alang sa linaing kasibot sa ministeryo. Sa tingpamulak sa 1939, ang Informant, mag-uuna sa Atong Ministeryo sa Gingharian, mitagana niini nga pagdasig: “Kay nagasingabot ang tingpamulak, ug maayong klima, angay natong dahomon nga doblehon sa mga magmamantala [sa kongregasyon] ang mga oras sa kanataran, ug ang oras sa mga payunir mouswag ug dako. Ang Abril maoy lima-ka-Dominggo nga bulan. Adunay lima ka Sabado usab kini. Himoa ang matag Sabado ug Dominggo sulod sa Abril . . . nga usa ka panahon sa linaing pagsangyaw.” Kana maoy mahagiton nga tumong nga gipahiluna alang sa mga igsoon 60 ka tuig kanhi! Niining tuiga, sama niadtong 1939, ang bulan sa Abril adunay lima ka bug-os nga mga hinapos sa semana. Unsay imong mga plano niining bulana? Unsang mga marka ang imong gihimo diha sa imong kalendaryo alang sa Abril 2000? Pagplano sa pagbaton ug makahuloganong pagpakig-ambit sa maayong mga buhat duyog sa ubang katawhan ni Jehova sulod niining linaing bulan sa gipauswag nga kalihokang espirituwal.
3 Kon Unsay Atong Gilaomang Malampos: Ang labing hinungdanong adlaw sa tuig 2000 maatol niining bulana. Kini maoy Abril 19, ang anibersaryo sa kamatayon ni Jesus. Atong himoon ang linaing paningkamot nga dapiton ang daghang tawo kutob sa maarangan ngadto sa Memoryal. Sumala sa gisugyot sa miaging bulan, paghimog listahan sa tanang posibleng motambong sa Memoryal ug susiha nga walay nasayloan. Kadtong dapiton angayng maglakip ni bisan kinsang di-aktibo nga mga magmamantala, mga gitun-an sa Bibliya, mga balikduaw, kadtong nagtuon sa nangagi, mga kauban sa trabaho, mga eskolmet, mga silingan, mga paryente, ug ubang mga kaila. Kadto bang buot motambong adunay sakyanan? Kon wala, ikaw ba sa mahigugmaon makaabag? Sa gabii sa Memoryal, ang tanan kanato adunay pribilehiyo sa pagpabati kanilang motambong nga giabiabi. Human sa Memoryal, kita makapaloap ug dugang espirituwal nga tabang alang sa maong mga interesado.
4 Ang pagkahimong “masiboton sa maayong mga buhat” sulod sa mga adlaw sa dili pa ug human sa Memoryal maoy usa ka maayong paagi sa pagpakita kang Jehova nga atong gipabilhan gayod ang tanang nabuhat niya alang kanato. Ang mas taas nga oras sa maadlaw ug mas maayong klima sa kadaghanang dapit magpaarang sa daghan kanato nga dugangan ang atong mga paningkamot diha sa buluhatong pag-ebanghelyo. Kon ikaw nag-oksilyare payunir, buot mong buhaton ang imong kinamaayohan sa paggugol ug 50 ka oras o mas pa diha sa ministeryo. (Mat. 5:37) Tapot gayod sa eskedyul nga imong gisunod sa pagsugod sa bulan. (Eccl. 3:1; 1 Cor. 14:40) Hinaot ang uban kanato mobuhat kutob sa atong maarangan sa pagpaluyo sa tanang payunir, pinaagi sa pagdasig kanila ug pinaagi sa pag-uban kanila diha sa kanataran. (Itandi ang 2 Hari 10:15, 16.) Kon kita masibotong magpugas sulod sa Abril, atong madahom ang dakong kalipay ug panalangin gikan kang Jehova. (Mal. 3:10) Hayan magsilbi kini ingong usa ka tikanganan ngadto sa padayong pag-oksilyare payunir o ngadto sa pagkaregular payunir. Hinaot ang espirituwal nga panukmod nga atong maangkon sa Abril magpadayon sa mosunod nga mga bulan samtang kita mopadayon sa pagkahimong regular nga mga magmamantala sa Gingharian.
5 Sa walay duhaduha, libolibo sa katawhan ni Jehova niining bulana magsugod ug dugang mga pagtuon sa Bibliya sa balay. Buot ba nimong magsugod ug usa? Pag-ampo nga espesipiko alang sa usa ka pagtuon, ug pagbuhat nga uyon sa imong mga pag-ampo. Ikaw makaseguro nga pabilhan ni Jehova ang imong mapainubsanong mga hangyo alang sa tabang sa pagpangitag matinud-anog-kasingkasing nga tawo aron tudloan.—1 Juan 3:22.
6 Ania ang usa ka nasulayan na sa kanataran nga paagi nga malamposong gigamit sa pagsugod ug mga panaghisgot. Mosugod ka pinaagig pagsukna: “Ikaw ba naghunahuna nga ang tanang kapintasan diha sa publikong mga tunghaan maoy resulta sa demonyohanong kalihokan, o kini ba naggikan sa kakulang sa ginikananong pagbansay?” Tugoting motubag. Kon ang tawo moingon nga “demonyohanong kalihokan,” basaha ang Pinadayag 12:9, 12, ug ipunting ang papel sa Yawa sa pagpasiugdag kagubot sa kalibotan. Dayon buksi ang brosyur nga Gikinahanglan sa leksiyon 4, ug suknaa kon ang tawo nahibulong sukad kon diin gikan ang Yawa. Padayon nga basahon ug hisgotan ang unang duha ka parapo. Kon pilion sa tawo ang “kakulang sa ginikananong pagbansay” ingong hinungdan sa kapintasan diha sa mga tunghaan, basaha ang 2 Timoteo 3:1-3 ug puntinga ang mga taras nga dayag nga nakadugang niining problemaha. Dayon buksi ang brosyur nga Gikinahanglan sa leksiyon 8, basaha ang parapo 5, ug ipadayon ang panaghisgot. Kon mahikay mo nga mobalik, mahimong may igong purohan ka sa pagbatog regular nga pagtuon sa Bibliya uban sa maong tawo. Sulod sa mosunod nga duaw, pangutan-a siya kon aduna bay si bisan kinsa nga iyang nahibaloan nga tingali interesado sa pagpatalinghog sa iyang nakat-onan.
7 Ang laing paagi nga mahimong “masiboton sa maayong mga buhat” sulod sa Abril mao ang pagpakig-ambit sa lainlaing mga paagi sa pagsangyaw. Naghunahuna ka ba bahin sa pagsangyaw diha sa parke o paradahan? Sa hunonganan sa bus o estasyon sa tren? O buot ba nimong mosulay sa pagsangyaw pinaagi sa telepono, diha sa dalan, o sa negosyohanan nga teritoryo? Nganong dili ipadapat kanang mga hunahunaa niining bulana? Si Jehova motabang nimo nga makahupot sa gikinahanglang kaisog. (Buh. 4:31; 1 Tes. 2:2b) Hayan makigsabot ka sa pagkuyog sa usa ka payunir o magmamantala nga may kasinatian niining mga matanga sa ministeryo.
8 Ang si bisan kinsa nga matinguhaon sa pagpauswag sa iyang pagpakig-ambit diha sa buluhatong pagsangyaw buot nga moambit sa impormal nga pagsangyaw. Sagad ang gikinahanglan lang mao nga ikasulti ang usa ka tawo diha sa mahigalaong panaghisgot. Ipatungha lang ang usa ka ulohan nga makapainteres sa kadaghanan, hayan gamiton ang paagi nga gipasiugda sa parapo 6. Panlimbasogi nga gamiton ug maayo ang bisan gamayng mga bahin sa panahon nga mausik sa laing paagi. Dili nato ilabay ang mga singko sentabos, mga diyes sentabos, o mga bayente-singko sentabos tungod lamang kay kini dili tibuok nga mga piso. Nganong dili gamiton nga mabungahon ang bisan singko minutos, diyes minutos, o kinse minutos sa impormal nga pagsangyaw?
9 Usa ka Panahon sa Pagpamalandong: Hunahunaa ug balik ang kusganong mga puntos nga gipasiugda sa drama sa di pa dugayng “Matagnaong Pulong sa Diyos” nga Distritong Kombensiyon. Ang drama, nga nag-ulohang Pagpabili sa Atong Espirituwal nga Panulondon, nagpahunahuna pag-ayo kanato bahin sa kalainan tali ni Jacob ug Esau. Si Esau miingon nga sama kang Jacob, siya adunay interes sa espirituwal nga mga butang, apan ang mga buhat ni Esau wala magpasundayag niana. (Gen. 25:29-34) Pagkagamhanang pasidaan alang kanato! Sama ni Jacob, magmaandam kita sa pagpakigbisog, bisan sa pagpakigbugno, alang sa panalangin ni Jehova. (Gen. 32:24-29) Nganong dili gamiton ang Abril ug ang tanang mosunod nga mga bulan sa pagpalagsik pag-usab sa atong kasibot, nga dili gayod yanoyanohon ang atong talagsaong espirituwal nga panulondon?
10 “Ang dakong adlaw ni Jehova haduol na. Kini haduol na, ug nagadali pag-ayo.” (Sof. 1:14) Ang maayong balita sa Gingharian kinahanglang ipalanog. Ang mga kinabuhi nameligro! Hinaot kining bulana mapamatud-ang linain nga gipanalanginan alang sa tanang katawhan ni Jehova samtang kita nahiusang magpasundayag nga kita “masiboton sa maayong mga buhat.”
[Kahon sa panid 4]
Mga Pahinumdom sa Memoryal
Ang pagsaulog sa Memoryal niining tuiga matunong sa Miyerkoles, Abril 19. Ang mga ansiyano kinahanglang magtagad sa mosunod nga mga butang:
◼ Sa pagtino sa oras alang sa tigom, seguroha nga ang mga emblema dili ipasa hangtod pagkahuman sa pagsalop sa adlaw.
◼ Ang tanan, lakip ang mamumulong, kinahanglang mapahibalo sa tukmang oras ug dapit sa pagsaulog.
◼ Ang tukmang matang sa tinapay ug bino kinahanglang mabatonan ug maandam.—Tan-awa ang Agosto 15, 1985, Bantayanang Torre, panid 19 (Pebrero 15, 1985 sa Ingles).
◼ Ang mga plato, mga baso, ug haom nga lamesa ug mantel kinahanglang dad-on ngadto sa tigomanan ug ipahiluna nga abante.
◼ Ang Kingdom Hall o ubang dapit nga tigomanan kinahanglang mahinloan pag-ayo nga abante sa panahon.
◼ Ang mga atendant ug mga tigsilbi kinahanglang pilion ug matudloan nga abante bahin sa ilang mga kaakohan ug tukmang pamaagi.
◼ Ang mga kahikayan kinahanglang himoon aron masilbihan ang bisan kinsa sa dinihogan nga baldado ug dili makatambong.
◼ Kon kapin sa usa ka kongregasyon ang naeskedyul nga mogamit sa samang Kingdom Hall, kinahanglang adunay maayong koordinasyon taliwala sa mga kongregasyon aron malikayan ang wala-kinahanglanang paghuot diha sa lawak hulatanan o ganghaan, sa publikong mga agianan, ug sa parkinganan.