Pangutana
◼ Sa unsang paagi ang mga atendant makaabag sa mga ginikanan sa pagtabang sa ilang mga anak sa padayong paghupot ug kaugdang diha sa mga tigom?
Ang mga bata sa kinaiya lihokan, nga wala maanad sa dugayng paglingkod. Human sa usa ka miting, ang mga bata adunay pinugngang enerhiya nga tingali magpalihok nila sa pagdagan ug paggukod sa ubang mga bata diha sa Kingdom Hall o sa ubang mga dapit nga tigomanan, sa paradahan, o sa agianan. Bisan pa niana, husto ang panultihon: ‘Ang batang pinasagdan nagapakaulaw sa iyang ginikanan.’—Prov. 29:15.
Ikasubo, pipila sa atong tigulang nga mga igsoong lalaki ug babaye grabeng nasakitan tungod kay ang mga bata nakadasmag ug nakatumba kanila. Nagpahinabo kini ug dili angay nga pag-antos maingon man sa wala kinahanglanang gasto sa mga ginikanan ug sa kongregasyon. Alang sa ila mismong seguridad ug sa kasegurohan sa uban, ang mga bata dili gayod tugotang magdagandagan ug magduladula sa sulod ug sa gawas sa Kingdom Hall.
Ang mga ginikanan adunay Kasulatanhong responsabilidad sa pagbansay sa ilang mga anak sa pagtamod sa atong mga dapit sa pagsimba uban ang hustong pagtahod. (Eccl. 5:1a) Diha sa atong Kristohanong mga tigom, mga asembliya, ug mga kombensiyon, ang mga atendant gitudlo sa pagtino nga “ipahinabo ang tanang butang nga may kahapsay” ug nga dunay ‘kahusay.’ (1 Cor. 14:40; Col. 2:5) Sila kinahanglang magpabiling igmat sa dili pa, sa panahon, ug human sa programa, diha sa sulod ug gawas sa mga tigomanan. Kon ang bata magdagandagan o mahimong badlonganon, mahimong pahunongon sa atendant ang bata sa malumong paagi, ug iyang pasabton ang bata kon nganong ang maong mga lihok dili dalawaton. Ang ginikanan sa bata angay usab nga sultihan sa malumong paagi bahin sa maong suliran ug sa panginahanglan sa pagbantay sa bata. Ang ginikanan kinahanglang mosanong sa hustong paagi.
Masabot nga usahay ang mga masuso ug gagmayng kabataan tingali mohilak ug mahimong makabalda sa panahon sa mga tigom. Ang mga atendant, nga moabot labing menos 20 minutos sa dili pa magsugod ang programa, mahimong magreserba sa duha ka laray sa lingkoranan sa likod diha sa awditoryum alang sa mga ginikanan nga buot molingkod didto uban sa ilang gagmayng kabataan. Ang uban kanato kinahanglang makigtambayayong pinaagi sa dili paglingkod sa maong mga lingkoranan aron kana ilang malingkoran.
Kon ang bata makapabalda, ang ginikanan kinahanglang molihok. Kon dili molihok ang ginikanan ug ang kabaldahan makatugaw na, ang atendant mosukna gayod sa malulotong paagi kon gusto ba sa ginikanan nga ang bata dad-on sa gawas sa awditoryum. Kon magdapit kitag mga bag-ohan uban sa ilang mga anak ngadto sa mga tigom, kinahanglang molingkod kita tupad kanila ug motanyag ug tabang sa mga anak kon sila mohilak o makabalda sa ubang mga paagi.
Maghatag kanatog kalipay ang paglantaw sa mga bata sa tanang pangedaron nga anaa sa Kingdom Hall ug sa pagmatikod sa ilang maayong pamatasan sulod sa panimalay sa Diyos. (1 Tim. 3:15) Pinaagi sa ilang pagtahod sa kahikayan ni Jehova sa pagsimba, sila makapasidungog kaniya ug ginapabilhan sa tanan diha sa kongregasyon.