“Kanus-a nga Ako Makahigayon Gayod?”
1 Mao kana ang reklamo sa kadaghanan nato, tungod kay ang atong mga kinabuhi punog mga kalihokan. Gikaingon nga ang panahon mao ang labing bililhon ug ang labing dali nga molabay sa atong mga kabtangan. Busa kanus-a man kita makahigayon gayod alang sa mga butang nga mahinungdanon kaayo, sama sa pagbasa ug pagtuon sa Pulong sa Diyos?—Filip. 1:10.
2 Ang yawi mao, dili ang pagpangita ug dugang panahon, kondili ang paghukom kon unsay buot natong himoon sa panahon nga atong nabatonan. Kitang tanan adunay 168 ka oras sa usa ka semana, nga mga 100 niini mahimong gugolon sa pagkatulog ug sa pagtrabaho. Busa sa unsang paagi atong gamiton ang nahibiling mga oras sa labing mapuslanong paagi? Ang Efeso 5:15-17 nag-awhag nga kita maglakaw “dili ingon sa dili-maalamon kondili ingon sa maalamon nga mga tawo, nga magapalit sa nahiangay nga panahon . . . , sabta kon unsa ang kabubut-on ni Jehova.” Kini nagpakita sa panginahanglan nga pahimuslan ang matag kahigayonan sa pagbuhat sa mga butang nga giingon ni Jehova nga mahinungdanon.
3 Gitandi ni Jesus ang atong mga adlaw niadtong sa panahon ni Noe. (Luc. 17:26, 27) Ang mga tawo niadto puliki sa adlaw-adlawng mga kalihokan sa kinabuhi. Apan, gihatagag higayon ni Noe ang pagtukod ug dakong arka ug ang pagsangyaw. (Heb. 11:7; 2 Ped. 2:5) Sa unsang paagi? Pinaagi sa pag-una sa kabubut-on sa Diyos ug sa pagsugot kaniya sa pagbuhat sa mga butang nga “ingon gayod.”—Gen. 6:22.
4 Unsay Angayng Unahon? Si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mat. 4:4) Matag semana, atong madawat ang “taganang [espirituwal] pagkaon sa hustong panahon.” (Luc. 12:42) Kini nagkinahanglag regular, personal nga eskedyul sa pagbasa ug pagtuon aron mahilis kining tanan kon kita makabaton gayod ug kaayohan. Tungod sa pagpabili sa espirituwal nga pagkaon, dili nato isipon kini samag fast food, nga dalidaliog kaon samag tawo nga nagadali sa pagkaon sa pisikal nga kalan-on. Hinunoa, ang angay nga pagpabili magpalihok kanato nga maggahin ug panahon sa pagtuon ug tagamtamon ang espirituwal nga mga butang.
5 Ang pagkuhag espirituwal nga pagkaon motultol sa kinabuhing walay kataposan. (Juan 17:3) Takos kining unahon sa atong eskedyul sa adlaw-adlaw. Makahigayon ba kita sa paghatag ug luna alang sa adlaw-adlaw nga pagbasa sa Bibliya ug pagpangandam sa Kristohanong mga tigom? Oo, makahigayon kita. Nan, atong madawat ang “dakong ganti” nga magsumikad sa pagkahibalo ug sa pagbuhat sa kabubut-on sa Diyos.—Sal. 19:7-11.