Padayona ang Pagkuhag Kaayohan Gikan sa Ang Bantayanang Torre ug Pagmata!
Karon nga ang mga suskrisyon pinaagig koreyo sa mga magasing Bantayanang Torre ug Pagmata! giputol na, gikinahanglan ang paningkamot aron maseguro nga kita, ug kadtong atong masangyawan, dili mapakyas sa pagdawat bisag usa ka gula.
Personal nga mga Kopya: Sa dihang ang imong personal nga suskrisyon matapos na, dugangi ang imong presenteng order diha sa talad sa magasin. Ang mga ginikanan kinahanglang mag-order ug igong mga magasin aron ang matag membro sa pamilya adunay iyang kaugalingong kopya. Sulati sa imong ngalan ang imong personal nga kopya aron maseguro nga dili kana ikatanyag sa kanataran nga wala tuyoa. Sa dihang moabot na ang mga magasin nga gipadala, ang mga igsoon nga nagdumala niana magpaigo nga ang kada gula mabatonan gilayon diha sa Kingdom Hall.
Mga Ruta sa Magasin: Ang mga magmamantala kinahanglang maningkamot nga makapundar ug ruta sa magasin sa tanang interesado nga buot makadawat sa kada gula. Ang personal nga paghatod sa mga magasin ngadto sa maong mga tawo maghatag kanato ug mga kahigayonan sa pag-ugmad sa interes nga gipakita ug sa pagsugod ug mga pagtuon sa Bibliya.—Tan-awa ang Atong Ministeryo sa Gingharian, Oktubre 1998, panid 8.
Adunay Linaing mga Panginahanglan: Kon ang usa ka tawo nagpakitag tiunay nga interes apan nagpuyo sa wala-maasayn nga teritoryo, usa ka eksepsiyon ang himoon aron makadawat siya sa mga magasin pinaagig koreyo nga suskrisyon. Kon ang usa ka tawo nga nagpuyo diha sa teritoryo sa kongregasyon dili maalagaran pinaagig ruta sa magasin apan interesado gayod nga makadawat ug mga magasin, hisgoti ang maong kahimtang uban sa Komite sa Pag-alagad sa Kongregasyon. Kon ilang uyonan, usa ka suskrisyon ang ipadala alang sa maong interesadong tawo. Ang naandang mga porma sa suskrisyon (M-1 ug M-101) mahimong gamiton alang niining katuyoana.
Kita makasalig nga si Jehova padayong magapanalangin sa tanan natong mga panikaysikay sa pagmantala sa Gingharian pinaagi sa Ang Bantayanang Torre ug Pagmata!