Usa ka Espesyal nga Pagdinasigay
1 Kada adlaw, ang katawhan ni Jehova nag-atubang ug mga pagsulay sa ilang pagtuo. Kay nahibalo nga hamubo na lang ang iyang panahon, ang Yawa naghimog pangataposang pag-atake sa pagbungkag sa atong integridad kang Jehova. (Pin. 12:12) Hinungdanon nga kita “magpadayon sa pagbaton ug gahom diha sa Ginoo ug diha sa pagkagamhanan sa iyang kusog” aron kita “makaarang sa pagsukol sa daotang adlaw ug, human [nato] mabuhat sa bug-os ang tanang butang, sa pagbarog nga malig-on.”—Efe. 6:10, 13.
2 Ang pagpakigtigom uban sa atong mga isigkamagtutuo maoy usa ka tagana ni Jehova aron makabaton kitag kusog. Gipabilhan kini ni apostol Pablo. Nangandoy siyang makauban ang iyang Kristohanong mga igsoon aron sila ‘magdinasigay’ ug ‘malig-on.’ (Roma 1:11, 12) Aron malig-on kita sa pagbuhat sa kabubut-on sa Diyos, ang Nagamandong Lawas mahigugmaong naghikay aron mahatagan kitag kahigayonan sa pagpahimulos sa pagdinasigay sa umaabot nga “Diyosnong Pagkamasinugtanon” nga Distritong Kombensiyon.
3 Tambong Aron Makabatog Kaayohan: Himoang tumong ang pagtambong sa bug-os tulo ka adlaw. ‘Makabaton kitag kaayohan’ pinaagi sa pag-abot sa dili pa ang unang awit ug sa pagpabilin hangtod sa atong kinasingkasing nga “Amen” sa paniklop nga pag-ampo. (Isa. 48:17, 18) Daghan ang kinahanglang maghikay daan sa ilang eskedyul sa trabaho aron matambongan nila ang bug-os tulo ka adlaw. Tinuod, dili sayon ang paghangyo sa imong amo nga hatagan kag bakasyon, apan gipasaligan kita ni Jehova nga iya kitang tabangan sa pagbuhat sa iyang kabubut-on. (1 Juan 5:14, 15) Kon wala pa kita makahimo, karon na ang panahon sa paghimog tinong mga kahikayan alang sa transportasyon ug kasak-an, nga dili ipamasin ang bisan unsa. Makasalig kita nga panalanginan ni Jehova ang atong mga paningkamot nga makatambong sa bug-os tulo ka adlaw.—Prov. 10:22.
4 Dahoma ang Pagdinasigay: Nakatambong ka na tingali ug distritong kombensiyon nga sa imong pag-uli ikaw nakaingon: “Kadto ang kinamaayohang kombensiyon!” Nganong ingon tingali niana ang imong gibati? Kana tungod kay ingong dili-hingpit nga mga tawo kita anam-anam nga maluya, nga nagkinahanglag espirituwal nga pagdasig. (Isa. 40:30) Usa ka sister miingon: “Kining sistemaha nakapaluya kanako, ug ang mga kombensiyon nagtul-id sa akong espirituwal nga panglantaw, nga naghatag kanakog espirituwal nga kalig-on nga akong gikinahanglan. Ang pagdasig morag midangat sa eksaktong panahon nga akong gikinahanglan kini.” Lagmit ingon usab niana ang imong gibati.
5 Makadawat kita sa gikinahanglang pagdasig dili lang pinaagi sa mga pakigpulong ug mga interbiyo kondili pinaagi usab sa ubang tugob nga mga bahin sa atong mga kombensiyon. Usa ka brader miingon: “Nagustohan gyod nako ang tin-aw ug praktikal nga kapadapatan sa mga prinsipyo sa Bibliya. Siyempre, hinungdanon ang mga drama sa pagpakita kon sa unsang paagi kita makabatog kaayohan sa mga panig-ingnan kaniadto, maayo man ug dili maayo. Ang mga basahon nga luwatan maoy usa sa akong gikahinaman, ug malipay gayod ako niini bisag dugay na akong nakauli sa amoa.”
6 Ang mga kombensiyon maoy hinungdanong mga tagana gikan kang Jehova niining “makuyaw nga mga panahong lisod sagubangon.” (2 Tim. 3:1) Kini motabang kanato sa pagtuman sa inspiradong tambag: “Magtukaw, barog nga malig-on sa pagtuo, magpakalalaki, magmakusganon.” (1 Cor. 16:13) Busa, hinaot tambongan nato ang tanang sesyon ug tagamtamon ang tugob nga pagdinasigay panahon sa atong “Diyosnong Pagkamasinugtanon” nga Distritong Kombensiyon!
[Kahon sa panid 3]
Planoha ang Pagtambong sa Bug-os Tulo ka Adlaw
■ Hangyoa nga mobakasyon ka sa trabaho.
■ Kon gikinahanglan, pagreserba ug kasak-an didto sa dapit nga kombensiyonan.
■ Hikaya ang inyong transportasyon paingon sa kombensiyon.