‘Tigoma ang Katawhan’
1. Nganong ang mga regional convention parehas sa dakong panagkatigom sa mga Israelinhon human sila mobiya sa Ehipto?
1 Wala madugay human mobiya sa Ehipto, si Moises gisugo ni Jehova sa pagtigom sa katawhan sa Bukid sa Sinai aron maminaw sa Iyang pulong, sa ingon sila makakat-on sa pagkahadlok sa Diyos ug makatudlo sa ilang mga anak. (Deut. 4:10-13) Sa umaabot nga mga bulan, ang katawhan ni Jehova motambong sa mga regional convention aron matudloan ni Jehova. Unsay atong himoon aron bug-os tang makabenepisyo?
2. Unsay atong himoon aron ‘andam’ ta sa kombensiyon?
2 ‘Pangandam’: Gisugo ni Jehova ang mga Israelinhon sa ‘pagpangandam’ sa importanteng panagkatigom sa Bukid sa Sinai. (Ex. 19:10, 11) Kita sab kinahanglang mangandam sa atong pagtambong. Pananglitan, daghan ang kinahanglang mananghid nga mag-leave sa trabaho. Tingali parehas kag kahimtang ni Nehemias. Gusto niyang mobiya kadiyot sa iyang trabaho ingong tigtagay ni Haring Artajerjes aron makaadto sa Jerusalem, pero naghunahuna siya nga basig dili mosugot ang hari. Miampo si Nehemias ug mihangyo sa hari. Misugot ang hari ug misuportar pa gani sa iyang pagbiyahe! (Neh. 2:1-9) Naa na ba kay kasakyan ug kasak-an? Paneguroa nga makaabot kag sayo sa matag sesyon, ug pangandam sa paghatag ug “labaw pa kay sa kasagarang pagtagad” sa imong madunggan.—Heb. 2:1.
3. Unsay makatabang aron maandam ang atong kasingkasing sa programa?
3 Importante sab nga andamon ang atong kasingkasing sa pagpaminaw ug pagkat-on. (Esd. 7:10) Ang programa sa kombensiyon abanteng makita sa jw.org/ceb, ug anaa niana ang mga ulohan sa tanang pakigpulong nga ang matag usa may usa o duha ka teksto. Maayong hisgotan kini sa Pamilyahanong Pagsimba mga pipila ka semana una ang inyong kombensiyon. Ang ubang igsoon mag-print ug programa aron ilang kasulatag nota panahon sa kombensiyon.
4. Sa unsang paagi ang kombensiyon makatabang sa mga ginikanan sa pagtudlo sa ilang mga anak?
4 ‘Tudloi ang Inyong mga Anak’: Usa sa giingong katuyoan sa panagkatigom sa Bukid sa Sinai mao ang pagtudlo sa Israelinhong mga ginikanan sa “ilang mga anak.” (Deut. 4:10) Sa mga regional convention, ang mga ginikanan dunay maayong kahigayonan sa paghimo niana. Kinahanglang itapad nila ang ilang mga anak panahon sa sesyon ug tabangan sila sa pagpaminaw. Kada adlaw inig-uli sa balay o sa ila unyang pamilyahanong pagsimba, puwedeng hisgotan sa pamilya ang programa.
5. Unsay mga benepisyo sa pagtambong sa regional convention?
5 Sulod sa tulo ka adlaw, kita makagawas sa awaaw nga kalibotan ni Satanas ug makapahimulos sa makapalagsik nga panag-ubanay sa espirituwal nga paraiso. (Isa. 35:7-9) Kay nagkaduol na ang adlaw ni Jehova, hinaot nga dili nato palabyon kini nga kahigayonan nga magkatigom aron magdinasigay!—Heb. 10:24, 25.