Bag-ong Kahikayan sa mga Librarya sa Kingdom Hall
Sulod na sa daghang tuig karon, ang mga kongregasyon sa tibuok kalibotan nakabenepisyo gikan sa paggamit sa ilang librarya sa Kingdom Hall, nga kanhi gitawag ug librarya sa Teokratikanhong Tunghaan sa Ministeryo. Kaniadto, gitagad nga kinahanglang magbaton ang matag kongregasyon ug kaugalingon niining librarya. Apan, tungod kay daghan na mang mga Kingdom Hall karon ang gigamit sa kapin sa usa ka kongregasyon, nga ang pipila niana maoy langyaw ug pinulongan nga mga kongregasyon, labing maayo nga magbaton lamang ug usa ka nasangkapan pag-ayo, nunot-sa-panahon nga librarya sa Kingdom Hall kada grupo sa pinulongan diha sa matag Kingdom Hall. Diha sa mga Kingdom Hall nga may kapin sa usa ka awditoryum, ang matag awditoryum angayng may usa ka librarya alang sa matag grupo sa pinulongan nga magtigom niana.
Gidahom nga kining maong kahikayan makatabang sa pagdaginot sa lugar ug gasto. Dugang pa, ang pagtapo sa mga librarya sa duha o kapin pa nga mga kongregasyon lagmit makapatunghag mas maayong mga librarya. Sa dihang kini matapo na, ang ekstrang mga kopya sa mga basahon mahimong tipigan ug gamiton sa ulahi kon may bag-ong mga Kingdom Hall nga tukoron. Kon masangkapan ang Kingdom Hall ug usa ka kompiyuter nga may Watchtower Library diha sa CD-ROM, tingali makaplagan kini sa pipila nga mapuslanon kaayo.
Sa matag librarya sa Kingdom Hall, usa ka igsoong lalaki, labing maayo kon usa sa mga magtatan-aw sa Teokratikanhong Tunghaan sa Ministeryo, mao ang modumala sa librarya. Angayng anam-anam niyang dugangan ug nahiangayng mga publikasyon ang nabatonan na, nga hapsayng magmarka sa sulod sa hapin sa matag basahon aron mahibaloan nga kini gipanag-iya sa librarya sa Kingdom Hall. Labing menos kas-a sa usa ka tuig, angay niyang susihon ang librarya kon kompleto ba kini ug paneguroon nga maayo pa ang kahimtang sa mga publikasyon. Ang mga publikasyon nga gikan niining maong mga librarya dili angayng dad-on sa gawas sa Kingdom Hall.
Ang librarya sa Kingdom Hall pabilhan gayod kanunay sa tanang nakig-uban sa maong kongregasyon. Hinaot ipakita nato nga kita personal nga nagpabili sa maong tagana pinaagi sa pag-amping niana ug sa paggamit niana aron pangitaon “ang mismong kahibalo sa Diyos.”—Prov. 2:5.