Pangutana
◼ Angay bang itaho ang pamilyahanong pagtuon sa Bibliya ngadto sa kongregasyon?
Kon ang usa ka Kristohanong ginikanan nagadumala ug pamilyahanong pagtuon sa Bibliya ug dunay di-bawtismadong mga anak nga moapil sa maong pagtuon, ang maong ginikanan makataho ug labing daghan usa ka oras sa usa ka semana, usa ka balikduaw sa usa ka semana, ug usa ka pagtuon sa Bibliya sa usa ka bulan. Ingon niini ang kahimtang bisan pag ang pagtuon molungtad ug kapin sa usa ka oras, gidumala ug kapin sa usa ka higayon sa usa ka semana, o gidumala uban sa tagsatagsa ka anak.—Tan-awa ang librong Atong Ministeryo, p. 104.
Kon ang tanan diha sa panimalay maoy bawtismadong mga Saksi, nan wala nay oras o pagtuon mismo nga itaho ingong pag-alagad sa kanataran (gawas kon ang bata nagtuon pa gihapon sa ikaduhang libro human sa bawtismo). Ingon niini ang kahimtang tungod kay sa panguna ang taho sa pag-alagad sa kanataran nga iya sa kongregasyon magbanaag kon unsay nalampos sa pagsangyaw sa maayong balita ug pagtudlo sa kamatuoran sa Bibliya ngadto niadtong dili dedikado ug bawtismado nga mga alagad ni Jehova. (Mat. 24:14; 28:19, 20) Apan, kini dili gayod angayng magpamenos sa kahinungdanon sa pagdumala sa maong pagtuon nga regular.
Responsabilidad sa Kristohanong mga ginikanan ang pagtuon uban sa ilang mga anak. Kadtong nanginahanglag tabang sa pag-establisar o pagpauswag sa ilang pamilyahanong pagtuon mahimong magpatabang sa mga ansiyano. Kon tungod sa kahimtang gikinahanglan nga laing magmamantala ang modumala sa pagtuon sa Bibliya uban sa di-bawtismadong anak nga lalaki o babaye sa usa ka Kristohanong pamilya nga nakig-uban sa kongregasyon, ang nagadumalang magtatan-aw o ang magtatan-aw sa pag-alagad angayng konsultahon. Kon uyonan ang maong pagtuon, ang usa nga nagdumala mahimong magtaho niana sama sa iyang pagtaho sa ubang pagtuon sa Bibliya.
Ang pagbansay sa mga anak diha sa mga dalan ni Jehova naglangkit ug mas daghang panahon ug paningkamot kay sa makita diha sa taho sa pag-alagad sa kanataran. (Deut. 6:6-9; Prov. 22:6) Ang Kristohanong mga ginikanan angayng dayegon tungod sa pagpas-an sa ilang ugdang nga responsabilidad diha sa pagmatuto sa ilang mga anak “sa disiplina ug sa pagdumala-sa-kaisipan ni Jehova.”—Efe. 6:4.