“Higugmaa Ninyo si Jehova, Kamong Tanan nga mga Maunongon”
Ang Kamatayon ni Jesus Saulogon sa Abril 4
1 Katuigan kanhi, sa dihang ang Ukraine ilalom pa sa Komunistang pagmando, gibantayan pag-ayo sa mga awtoridad ang mga Saksi—ilabina sa dihang nagkaduol na ang adlaw sa Panihapon sa Ginoo—tungod kay naglaom sila nga madiskobrehan ang tigomanan sa mga Saksi. Kanunay kining problema, tungod kay nahibalo man ang mga awtoridad sa gibanabanang petsa sa maong kasaulogan. Unsay gihimo sa mga igsoon? Ang balay sa usa ka igsoong babaye dunay silong nga gisanapan ug tubig. Tungod kay dili man dahomon sa mga awtoridad nga dunay mga tawong magtigom didto, ang mga igsoon nagtukod ug plataporma ibabaw sa tubig nga abot sa tuhod ang giladmon. Bisan tuod kinahanglan silang molingkod nga nagtikuko diha sa plataporma ilalom sa mubo nga kisame, walay mibalda kanila samtang ang kongregasyon malipayong nagsaulog sa Memoryal.
2 Ang determinasyon sa atong mga igsoon sa Ukraine sa pagtuman sa sugo sa pagsaulog sa kamatayon ni Jesus maoy usa ka talagsaong pasundayag sa ilang gugma sa Diyos. (Luc. 22:19; 1 Juan 5:3) Kon mag-atubang kitag mga suliran sa atong kinabuhi, hinaot madasig kita gikan sa maong mga panig-ingnan ug magmadeterminado sa pagtambong sa kasaulogan sa Panihapon sa Ginoo sa Abril 4. Sa pagbuhat niana, atong gipakita nga kita nakig-ambit sa pagbati sa salmista kinsa miawit: “Oh higugmaa ninyo si Jehova, kamong tanan nga mga maunongon kaniya.”—Sal. 31:23.
3 Tabangi ang Uban nga Motubo ang Gugma sa Diyos: Ang gugma sa Diyos motukmod usab kanato sa pagdapit sa uban sa pagsaulog uban kanato. Ang pasukip sa Pebrero nga Atong Ministeryo sa Gingharian nagdasig sa matag usa kanato sa paghimog listahan niadtong giplanohan natong dapiton ngadto sa Memoryal. Makugihon ka bang naningkamot sa pagpaabot ug imbitasyon ngadto sa matag tawo nga anaa sa imong listahan? Gahinig panahon ang pagpatin-aw sa kahinungdanon sa maong okasyon ngadto kanila. Ang mahigalaong pahinumdom labot sa adlaw ug oras sa Memoryal ug, kon nahiangay, ang pagtanyag nga ubanan sila mahimong makadasig kanila nga motambong.
4 Sa tigomanan sa maong kasaulogan, paghimog linaing paningkamot sa pagtimbaya niadtong midawat sa atong imbitasyon, ug pabatia nga sila giabiabi. Sa unsang paagi matabangan nimo sila nga motubo ang ilang gugma kang Jehova? Magmaandam sa pagtubag sa ilang mga pangutana. Magmaalisto sa pagtanyag ug pagtuon sa Bibliya kon nahiangay. Dapita sila sa pagtambong sa atong senemanang mga tigom sa kongregasyon. Ilabinang hatagag pagtagad sa mga ansiyano ang di-aktibong mga Kristohanon nga mitambong. Sila makahikay sa pagduaw sa maong mga di-aktibo ug dasigon sila sa pagpadayon sa ilang kalihokan uban sa kongregasyon, tingali magpasiugda sa mga punto nga gihisgotan sa pakigpulong sa Memoryal.—Roma 5:6-8.
5 Pagpalalom pa sa Ato Mismong Gugma Kang Jehova: Ang pagpalandong sa gasa sa lukat makapalalom pa sa atong gugma kang Jehova ug sa iyang Anak. (2 Cor. 5:14, 15) Usa ka dugay nang tigtambongan sa Memoryal miingon: “Kami nagapanglantaw sa Memoryal. Kini labi pang nagakaespesyal tuig-tuig. Nahinumdom ako nga nagbarog sa punerarya 20 ka tuig kanhi, nga nagtan-aw sa patayng lawas sa akong minahal nga papa ug mibatig matuod kinasingkasing nga apresasyon sa lukat. Ang akong kahibalo sa una maoy ordinaryo nga kahibalo lamang. Tinuod, nahibalo ako sa tanang kasulatan ug kon unsaon pagsaysay niana! Apan diha lamang nga gibati ko ang makapaguol kaayong epekto sa kamatayon nga ang akong kasingkasing milukso sa kalipay sa kon unsay mahimo unya alang kanato pinaagi niadtong bililhong lukat.”—Juan 5:28, 29.
6 Samtang nagkaduol na ang petsa sa pagsaulog sa Memoryal niining tuiga, paggahin ug panahon sa pag-andam sa imong kasingkasing alang sa maong okasyon. (2 Cron. 19:3) Palandonga ang linaing pagbasa sa Bibliya alang sa Memoryal, nga gilaraw diha sa Pagsusi sa Kasulatan sa Adlaw-Adlaw—2004 ug sa 2004 Calendar. Ang uban malingaw sa pagrepaso sa mga kapitulo 112-16 diha sa librong Labing Bantogang Tawo panahon sa ilang pagtuon sa pamilya. Ang uban mohimog dugang panukiduki ginamit ang ubang mga abag sa pagtuon nga gitagana sa matinumanon ug maalamong ulipon nga matang. (Mat. 24:45-47) Kitang tanan makahimog kinasingkasing nga pag-ampo alang sa gasa sa lukat. (Sal. 50:14, 23) Oo, niining panahon sa Memoryal, hinaot padayon natong isumbaliksilaw ang gugma ni Jehova kanato ug mangitag mga paagi sa pagpasundayag sa atong gugma kaniya.—Mar. 12:30; 1 Juan 4:10.