Tabangan ni Jehova Kadtong Mosalig Kaniya
1 Daghang tawo ang nag-isip sa salapi, gahom, ug tawhanong katakos ingong mga yawi sa kalamposan. (Sal. 12:4; 33:16, 17; 49:6) Apan, kadtong may kahadlok kang Jehova ug may pagsalig kaniya gipasaligan sa Bibliya nga “siya mao ang ilang tabang ug ang ilang taming.” (Sal. 115:11) Atong tagdon ang duha ka bahin nga niana kita kinahanglang magpasundayag ug pagsalig kang Jehova.
2 Ingong Kristohanong mga Ministro: Sa dihang kita magdumala ug mga bahin sa pagpanudlo diha sa kongregasyon o magtudlo diha sa ministeryo sa kanataran, kita kinahanglang mosalig sa atong Diyos. Tagda ang panig-ingnan ni Jesus. Bisan pag siya Anak sa Diyos, siya wala mosalig sa iyang kaugalingong kaalam o katakos kondili bug-os nga misalig sa iyang langitnong Amahan. (Juan 12:49; 14:10) Labaw pa nga kita kinahanglang mosalig sa atong langitnong Amahan! (Prov. 3:5-7) Pinaagi lamang sa panalangin ni Jehova nga ang atong mapaubsanong mga paningkamot makapasidungog kaniya ug makahatag ug kaayohan sa uban.—Sal. 127:1, 2.
3 Kita makapasundayag sa atong pagsalig kang Jehova pinaagi sa pag-ampo alang sa iyang giya ug sa tabang sa iyang balaang espiritu. (Sal. 105:4; Luc. 11:13) Dugang pa, kita makapasundayag sa atong pagsalig sa Diyos pinaagi sa pagpasukad sa atong pagpanudlo diha sa iyang Pulong, ang Bibliya. Ang mensahe niini adunay gahom nga makapalihok sa mga kasingkasing ug makapabag-o sa mga kinabuhi. (Heb. 4:12) Sa dihang kita ‘moalagad ingong nagasandig diha sa kusog nga gihatag sa Diyos,’ si Jehova mahimaya.—1 Ped. 4:11.
4 Pagsagubang sa mga Problema: Kinahanglan usab kitang modangop kang Jehova alang sa tabang sa dihang mag-atubang ug mga pagpit-os ug mga problema. (Sal. 46:1) Pananglitan, ang usa ka agalon mahimong magpanuko sa paghatag kanatog bakasyon aron makatambong sa asembliya, o mahimong makaatubang kitag malisod nga situwasyon diha sa atong pamilyahanong kinabuhi. Kita makapasundayag sa atong pagsalig kang Jehova pinaagi sa tim-os nga pag-ampo kaniya ug pagpadapat sa giya nga iyang gitagana pinaagi sa iyang Pulong ug organisasyon. (Sal. 62:8; 119:143, 173) Pinaagi sa pagbuhat niana, ang mga alagad ni Jehova makasinati sa iyang tabang sa ilang kinabuhi.—Sal. 37:5; 118:13, 16.
5 Si Jehova mismo nagpasalig kanato: “Bulahan ang tawo nga lig-on ug lawas nga nagbutang sa iyang pagsalig kang Jehova, ug kansang pagsalig mao si Jehova.” (Jer. 17:7) Hinaot ipasundayag nato ang atong pagsalig kaniya diha sa tanan natong pagahimoon!—Sal. 146:5.