Pangutana

◼ Sa unsang paagi mabatonan ang personal nga mga kopya sa Ang Bantayanang Torre ug Pagmata!?

Sanglit taudtaod nang gihunong ang kahikayan sa suskrisyon para sa Ang Bantayanang Torre ug Pagmata! diha sa tanang pinulongan, ang tanang magmamantala angayng magkuha sa ilang mga magasin pinaagi sa lokal nga kongregasyon. Ang mga kongregasyon makahangyo ug mga magasin pinaagi sa pormang Congregation Requests (M-202). Ang langyawg-pinulongan ug dagkong letra nga mga edisyon angayng hangyoon usab ginamit kining pormaha.

Kon may tawo diha sa inyong teritoryo nga mohangyo nga regular nga magpahatod ug magasin, palihog paneguroa nga maatiman gilayon kini aron walay bisan usa ka gula nga masayloan. Ang mga tawong napalagpot mahimong makabaton ug mga magasin o uban pang literatura nga ilang gamiton sa personal diha sa kuhaanag magasin ug literatura sa Kingdom Hall. Ang mga magmamantala dili gayod maghatod ug mga magasin sa mga napalagpot.

Ang mga suskrisyon nga huptan lamang sa payl sa sanga sa Pilipinas maoy alang niadtong dili mahatdan sa magmamantala sa kongregasyon pinaagig ruta sa magasin. Kon ang Komite sa Pag-alagad sa Kongregasyon magpadalag hangyo sa mga suskrisyon alang sa tawo nga dili makabaton niana sa laing paagi, ang sekretaryo angayng maglakip ug mubong sulat nga magpamatuod nga ang maong hangyo sa suskrisyon gisusi na pag-ayo ug giuyonan sa Komite sa Pag-alagad sa Kongregasyon.

Kini nagpasabot nga ang mga magmamantala dili angayng mosulat sa sangang buhatan aron mohangyo ug personal nga mga suskrisyon. Ang bisan unsang mga hangyo sa mga suskrisyon nga gihimo sa mga magmamantala o sa interesadong mga tawo iuli ngadto sa kongregasyon.

◼ Sa unsang paagi ang usa ka binilanggo makabaton ug personal nga mga kopya sa mga magasin?

Kon ang kongregasyon nga nagdumala sa buluhatong pagsangyaw diha sa usa ka bilanggoan makasuplay ug mga magasin ngadto sa mga binilanggo didto, nan ang usa ka binilanggo makabaton ug personal nga mga kopya sa mga magasing Ang Bantayanang Torre ug Pagmata! pinaagi sa nagaduaw nga mga magmamantala. Kon kini dili posible, ang binilanggo mahimong personal nga mohangyog mga suskrisyon pinaagi sa pagsulat sa sangang buhatan. Palihog matikdi nga ang napalagpot nga mga binilanggo mahimong makabaton usab ug personal nga mga kopya sa mga magasin sumala sa gilaraw niining parapoha.