Ipaabot ang Maayong Balita sa Labing Daghang Tawo Kutob sa Mahimo
1. Unsay gihimo sa unang mga Kristohanon aron ang maayong balita makaabot sa labing daghang tawo kutob sa mahimo?
1 Madasigong gitinguha sa unang mga sumusunod ni Jesus nga ipakaylap ang mensahe sa Gingharian. Migamit silag epektibong mga paagi aron ang maayong balita makaabot sa labing daghang tawo kutob sa mahimo. Ang Kristohanong mga tagsulat sa Bibliya nagsulat sa ilang inspiradong mga sinulat ginamit ang ordinaryong Gregong pinulongan, nga mao ang internasyonal nga pinulongan sa Imperyo sa Roma. Dugang pa, ang masibotong mga magwawali sa ikaduha ug ikatulo nga mga siglo K.P. mahimong maoy unang migamit ug codex, nga mas sayon nga gamiton kay sa linukot nga basahon alang sa mga reperensiya.
2, 3. (a) Sa unsang paagi natuman ang Isaias 60:16 sa modernong mga panahon? (b) Sa unsang paagi gigamit ang teknolohiya sa pagpauswag sa maputling pagsimba?
2 Paggamit sa Teknolohiya: Pinaagi sa manalagnang si Isaias, si Jehova mitagna: “Ikaw mosuso sa gatas sa kanasoran.” (Isa. 60:16) Sa modernong-adlaw nga katumanan sa maong tagna, ang mga alagad ni Jehova nagagamit sa bililhong kahinguhaan sa kanasoran aron pauswagon ang buluhatong pagwali. Pananglitan, niadtong 1914, katuigan sa wala pay mga sine, ang mga Estudyante sa Bibliya nagpasalida na sa “Photo-Drama of Creation.” Kining walo-ka-oras nga sine ug slide presentation, nga may kolor ug tingog, nahimong dakong pamatuod sa milyonmilyong tawo.
3 Karong mga adlawa, ang katawhan sa Diyos nagagamit ug tulin-kaayong mga makina sa imprenta ug mga kompiyuter sa pagpatik sa mga Bibliya ug mga basahon sa Bibliya diha sa ginatos ka pinulongan. Ang tulin nga transportasyon nagdala sa mga basahon sa Bibliya ngadto sa lagyong mga bahin sa yuta, nga nakaabot sa katawhan sa 235 ka nasod. Pinaagi sa iyang espiritu, si Jehova nagdasig sa iyang mga alagad aron gamiton ang maong mga kasangkapan sa epektibong paagi, sa ingon ang kamatuoran sa Bibliya nakaabot sa mas daghang tawo sukad masukad sa kasaysayan.
4. Unsang mga pagpasibo ang gihimo sa pipila diha sa ilang mga kinabuhi aron ang maayong balita makaabot sa mas daghang tawo?
4 Personal nga mga Pagpasibo: Ang matuod nga mga magsisimba gidasig usab sa paghimog personal nga mga pagpasibo aron ang maayong balita makaabot sa mas daghang tawo. Gipayano sa daghan ang ilang kinabuhi aron makaambit nga mas bug-os pa sa pagsangyaw. Ang pipila namalhin aron mag-alagad sa dapit nga adunay mas dakong panginahanglan alang sa mga magmamantala sa Gingharian. Ang uban nagpauswag sa ilang ministeryo pinaagi sa pagkat-on ug langyawng pinulongan.
5, 6. Unsay mahimo aron ang maayong balita makaabot sa daghang tawo kutob sa mahimo diha sa atong teritoryo?
5 Dugang pa, ikapaabot nato ang maayong balita sa mas daghang tawo pinaagi sa pagsangyaw sa panahon nga ang mga tawo anaa sa balay ug sa dapit diin sila makaplagan. Kon ang katawhan kasagarang wala sa balay sa maadlaw diha sa inyong teritoryo, mapasibo ba nimo ang imong eskedyul aron makasangyaw sa sayong mga takna sa kagabhion? Aduna bay publikong mga dapit nga masangyawan? Nasulayan mo ba ang pagsangyaw pinaagig telepono ug pagsangyaw sa komersiyal nga teritoryo? Nangita ka bag kahigayonan sa pagsangyaw sa di-pormal nga paagi?
6 Pagkatalagsaon ang atong pribilehiyo nga makapakigbahin sa paghatag ug dakong pamatuod bahin sa ngalan ug Gingharian ni Jehova! Hinaot magpadayon kita sa pagpaambit sa nagahatag-ug-kinabuhi nga kamatuoran sa Pulong sa Diyos sa labing daghang tawo kutob sa mahimo.—Mat. 28:19, 20.