‘Himoa ang Tanang Butang Tungod sa Maayong Balita’
1. Unsa ang andam buhaton sa usa ka magsasangyaw sa Gingharian alang sa uban, ug ngano?
1 Gibati ni apostol Pablo nga siya obligado sa pagmantala sa maayong balita ngadto sa uban. (1 Cor. 9:16, 19, 23) Sa samang paagi, ang atong interes alang sa dumalayong kaayohan sa mga tawo mopalihok kanato nga maningkamot gayod sa pagpaambit kanila sa maayong balita.
2. Sa dihang magsangyaw, unsa nga mga pagpasibo ang andam natong buhaton, ug ngano?
2 Pagsangyaw sa Dapit ug Oras Diin ang mga Tawo Makaplagan: Ang usa ka maayong mangingisda mamasol o magtaktak sa iyang pukot dili sa dapit o oras nga kombenyente alang kaniya, kondili sa dapit o oras diin adunay isda. Kita usab, isip “mga mangingisda ug mga tawo,” tingali kinahanglang mohimog mga pagpasibo aron atong makaplagan ang mga tawo sa atong teritoryo ug sa ingon kita mas magmatagbawon sa buluhatong pagpanigom sa “tanang matang sa isda.” (Mat. 4:19; 13:47) Mahimo ba natong gamiton ang mga oras sa sayong kagabhion aron masangyawan ang mga tawo sa ilang mga balay o ang sayong mga oras sa buntag sa pagsangyaw sa kadalanan? Tumong ni Pablo nga siya ‘bug-os makapamatuod sa maayong balita,’ ug iyang gipahimuslan ang haom nga mga kahigayonan sa pagbuhat niana.—Buh. 17:17; 20:20, 24.
3, 4. Samtang kita nagasangyaw, sa unsang paagi kita makapaangay-angay, ug unsa ang mga resulta niana?
3 Ipaangay-angay ang Imong Presentasyon Sumala sa Panginahanglan: Ang mga mangingisda sagad mopailin-ilin sa ilang mga paagi aron makakuha ug usa ka matang sa isda. Sa unsang paagi atong ikapresentar ang maayong balita sa Gingharian sa paagi nga makadani sa mga tawo sa atong teritoryo? Kinahanglang mataktikanhon natong ipresentar ang tema nga makapainteres sa mga tawo sa teritoryo ug maminaw kita pag-ayo sa ilang mga komento bahin niana. (Sant. 1:19) Mahimo natong pangayoon ang ilang opinyon bahin sa maong tema aron masugdan ang panaghisgot. (Prov. 20:5) Pinaagi niini, atong ikapaangay ang atong presentasyon sa maayong balita sa paagi nga makapainteres gayod kanila. Si Pablo nahimong “tanang butang ngadto sa tanang matang sa katawhan.” (1 Cor. 9:22) Ang pagpaangay-angay hinungdanon gayod aron atong maabot ang kasingkasing sa mga tawo.
4 Malipayon gayod kita sa dihang atong ipaambit ngadto sa mga tawo ang “maayong balita sa butang nga mas maayo”! (Isa. 52:7) Hinaot nga atong ‘himoon ang tanang butang tungod sa maayong balita’ aron masangyawan ang mas daghan kutob sa maarangan.—1 Cor. 9:23.