Andam Ka Bang Mopailin-ilin?
1. Tungod sa mga kausaban sa kalibotan, unsang mga pagpasibo ang kinahanglan natong himoon?
1 Sa 1 Corinto 7:31, gitandi sa Bibliya ang kalibotan ngadto sa entablado nga may lainlaing esena ug mga magdudula. Tungod sa mga kausaban sa kalibotan, kinahanglan tang magpasibo sa atong paagi sa pagsangyaw, eskedyul, ug sa atong presentasyon. Andam ka bang mopailin-ilin?
2. Nganong kinahanglan tang mapailin-ilinon aron makanunot sa organisasyon?
2 Imong mga Paagi sa Pagsangyaw: Ang Kristohanong kongregasyon mapailin-ilinon. Sa sinugdan, sa gisugo ni Jesus ang iyang mga tinun-an sa pagsangyaw, iyang giingnan sila nga dili magdalag puyo sa pagkaon o salapi. (Mat. 10:9, 10) Apan, sa ulahi, gibag-o niya kining sugoa kay iyang napanan-aw nga sa umaabot ang mga tawo dili na madinawaton sa iyang mga tinun-an ug mokaylap na ang pagsangyaw ngadto sa lainlaing dapit. (Luc. 22:36) Sa miaging siglo, gigamit sa organisasyon ni Jehova ang lainlaing paagi sa pagsangyaw, sama sa paggamit ug mga testimony card, mga sakyanang may trompa, ug pagsibya sa radyo. Karon, sanglit ang mga tawo sa daghang dapit sagad wala sa balay, giawhag tang himoon sab nato ang publiko ug di-pormal nga pagsangyaw gawas pa sa pagpamalaybalay. Gidasig usab kita sa pagsangyaw sa sayo sa gabii kon ang mga tagbalay may trabaho sa maadlaw. Kon asa ang direksiyon sa langitnong karo ni Jehova, ikaw ba monunot niini?—Ezeq. 1:20, 21.
3. Sa unsang paagi ang pagkamapailin-ilinon makatabang nato nga mahimong mas epektibo diha sa atong teritoryo?
3 Imong Presentasyon: Unsay gikabalak-an karon sa mga tawo sa inyong teritoryo? Ang ekonomiya? Pamilya? Gubat? Hinungdanong masayod ta sa mga problema ug kahimtang nga komon sa atong teritoryo aron makaandam tag haom nga presentasyon. (1 Cor. 9:20-23) Kon makig-estorya ang tagbalay, mas maayong mapailin-ilinon ta ug tagdon ang ilang panginahanglan inay nga isulti ang naandang tubag ug magpadayon sa atong naandam nga presentasyon.
4. Nganong dinalian nga kita magmapailin-ilinon?
4 Sa dili madugay tiklopan na ang kataposang “talan-awon” o esena niining kalibotana, ug mosugod na ang dakong kasakitan. “Ang panahong nabilin mubo na.” (1 Cor. 7:29) Busa, hinungdanon gayod nga kita mapailin-ilinon, aron dako tag mahimo niining mubong panahon nga nahibilin!