Ipakita ang Personal nga Interes—Pinaagi sa Pagsangyaw nga Dili Mapihigon
1 Diha sa usa ka panan-awon, nakita ni apostol Juan ang usa ka manulonda nga naglupad sa kinatung-an sa langit nga nagpahayag ug walay kataposang maayong balita ngadto sa mga tawo sa “matag nasod ug tribo ug katawhan.” (Pin. 14:6) Ato bang gisundog ang panig-ingnan sa manulonda pinaagi sa pagsangyaw nga dili mapihigon? Nga dili tuyoon, kita lagmit adunay mapihigong panghunahuna. Ang atong tinamdan sa mga tawo nga atong mahibalag makaapektar sa paagi sa atong pagpresentar sa maayong balita ngadto kanila. Busa, kita kinahanglang magpasundayag ug tinuod nga mahigugmaong kahingawa sa dihang magsangyaw sa mga tawo nga lainlain ug kagikan.
2 Susiha ang Inyong Teritoryo: Aduna bay mga lalin o kagiw nga nagpuyo sa inyong teritoryo? Dali ra silang malaktawan. Pangitaa sila ug paningkamoti nga mas mailhan nimo sila. Unsay ilang mga panginahanglan ug mga gikabalak-an, mga gusto ug dili gusto, mga gikahadlokan ug sayop nga mga pagtuo? Paningkamoting ipasibo ang imong presentasyon sa mensahe sa Gingharian sumala niana. (1 Cor. 9:19-23) Sama kang apostol Pablo, kita angayng mobating obligado sa pagpaambit sa maayong balita sa tanan diha sa atong teritoryo, lakip niadtong gikan sa laing nasod, lahi ug kultura, lain ug pinulongan, ug mga adunahan kaayo.—Roma 1:14.
3 Apan, unsaon nimo pagsangyaw sa usa ka tawo nga lain ug pinulongan? Gamita ang pulyeto nga Good News for People of All Nations. Makadala ka usab ug mga tract o brosyur sa mga pinulongan nga kasagarang gilitok diha sa inyong teritoryo. (Tan-awa ang Hulyo 2003 nga Atong Ministeryo sa Gingharian, p. 4, par. 2-3.) Dugang pa, ang ubang mga magmamantala naningkamot sa pagkat-on ug usa ka paagi sa pagtimbaya ug usa ka yanong presentasyon diha sa laing mga pinulongan. Ang mga tawo sagad makadayeg kon makabati sa laing tawo nga naningkamot sa pagpakigsulti kanila sa ilang pinulongan, bisan tuod sa limitado kaayong paagi, ug kini hayan makadani kanila sa maayong balita.
4 Sundoga si Jehova: Pinaagi sa pagsangyaw sa mga tawo nga lainlain ug kagikan, atong gisundog ang atong dili-mapihigong Diyos, si Jehova, “kansang kabubut-on mao nga ang tanang matang sa mga tawo mangaluwas unta ug makadangat sa tukmang kahibalo sa kamatuoran.”—1 Tim. 2:3, 4.