Makasugod Ka bag Pagtuon sa Bibliya sa Oktubre?

1. Unsay tanyag sa Oktubre?

¹ Ang tanyag sa Oktubre mao ang Bantayanang Torre ug Pagmata! Sa pagbalikduaw, kita gidasig sa pagtanyag sa tract nga Gusto Ka Bang Mahibalo sa Kamatuoran? ug maningkamot nga makasugod ug pagtuon sa Bibliya. Unsaon nato paghimo kana?

2. Unsaon nato pagtanyag ang tract nga Mahibalo sa Kamatuoran sa pagsugod ug pagtuon sa Bibliya sa dihang balikduawon kadtong nabinlan natog mga magasin?

² Kon Unsaon Pagtanyag ang Tract: Mahimo kitang moingon: “Ang magasin nga akong gibilin nimo nakadasig sa mga tawo nga lainlaig relihiyon ug gigikanan sa pagsusi sa Bibliya. [Hatagig tract nga Mahibalo sa Kamatuoran ang tagbalay, ug ipakita ang mga pangutana sa atubangan.] Makapainteres kining mga pangutanaha, ug ang mga tubag niini makaplagan lang sa Bibliya. Hain niini ang gusto nimong matubag?” Human makapili ang tagbalay, hisgoti ang tubag sa iyang pangutana, ug basaha ang usa sa gisitar nga mga teksto. Sultihi siya nga usa lang kini sa mga pagtulon-an sa Bibliya, ug itanyag kaniya ang libro nga Gitudlo sa Bibliya. Dayon mahimo natong isaysay ang unang mga parapo sa kapitulo nga iyang mapili diha sa kaundan. O kaha atong hisgotan ang dugang impormasyon bahin sa ulohan nga atong gihisgotan kaniya gikan sa tract. Aniay mga reperensiya nga atong magamit:

● May pagtagad ba gayod ang Diyos kanato? (p. 9-11, par. 6-10)

● Matapos pa ba ang gubat ug pag-antos? (p. 12, par. 12-13

● Unsay mahitabo kanato sa dihang kita mamatay? (p. 59-60 par. 7-8)

● Aduna pa bay paglaom ang mga patay? (p. 71, par. 13-15)

● Unsaon nako pag-ampo aron ako patalinghogan sa Diyos? (p. 166-167, par. 5-8)

● Sa unsang paagi ako magmalipayon? (p. 9, par. 4-5)

3. Unsay atong mahimo kon dili kita makasugod ug pagtuon sa Bibliya sa unang pagbalikduaw?

³ Siyempre, kon dili kita makasugod ug makapasundayag ug pagtuon sa librong Gitudlo sa Bibliya sa unang pagbalikduaw, atong hikayon nga mobalik ug ipadayon ang panaghisgot. Depende usab sa interes sa tagbalay, mahimo natong hisgotan ang dugang pangutana diha sa tract sa sunod duaw sa dili pa itanyag ang libro. Busa gamiton natog maayo kining mapuslanong tract karong Oktubre sa pagsugod ug pagtuon sa Bibliya ug pagtabang sa matinud-anog kasingkasing nga mga tawo nga “mahibalo sa kamatuoran.”—Juan 8:31, 32.