Ayaw Pagpanuko
1. Nganong gikinahanglan ang kaisog sa pagsangyaw?
1 Nagpanuko ka ba sa pagsangyaw sa eskuylahan kay basig biaybiayon ka? Gikinahanglan gayod ang kaisog sa pagsangyaw ilabina kon maulawon ka. Unsay makatabang nimo?
2. Nganong magmataktikanhon sa pagsangyaw sa eskuylahan?
2 Magmataktikanhon: Bisan tuod ang eskuylahan haom nga himoong personal nga teritoryo, hinumdomi nga dili kini sama sa pagpamalaybalay diin sangyawan nimo ang tanan. Magmataktikanhon kon kanus-a ka mosangyaw. (Eccl. 3:1, 7) Ang inyong gihisgotan sa klase o asaynment tingali maghatag kanimog kahigayonan sa pagsangyaw. O lagmit mangutana ang imong klasmet kon nganong dili ka moapil sa pipila ka kalihokan. Sa pagsugod sa klase, gipahibalo sa ubang mga Kristohanon ang ilang mga magtutudlo nga sila mga Saksi ni Jehova ug gihatagan silag mga basahon nga nagpatin-aw sa atong tinuohan. Ang uban nagbilig mga basahon diha sa ilang lingkoranan aron maaghat ang ilang eskolmet nga mangutana.
3. Unsaon nimo pagpangandam aron makasangyaw ka sa eskuylahan?
3 Pangandam: Mas kompiyansa ka kon mangandam ka. (1 Ped. 3:15) Busa dahoma ang mga pangutana nga posibleng motungha ug kon unsaon kini pagtubag. (Prov. 15:28) Kon mahimo, pagdalag Bibliya ug mga publikasyon, sama sa Nangatarongan, Gisukna sa mga Batan-on, ug ubang basahon nga naghisgot sa paglalang, aron imo kining magamit kon gikinahanglan. Hangyoa ang imong ginikanan nga magpraktis mo niini sa inyong pamilyahanong pagsimba.
4. Nganong angay kang magpadayon sa pagsangyaw sa eskuylahan?
4 Magmapositibo: Ayawg hunahunaa nga pirme kang biaybiayon sa imong mga eskolmet kon maghisgot ka sa kamatuoran. Ang uban tingali makadayeg sa imong kaisog ug maminaw nimo. Apan ayawg kaluya kon walay mosanong. Si Jehova malipay nga ikaw naningkamot. (Heb. 13;15, 16) Hangyoa siya kanunay sa pagtabang kanimo aron ‘ikaw padayong makasulti uban ang bug-os nga kaisog.’ (Buh. 4:29; 2 Tim. 1:7, 8) Handurawa ang imong kalipay sa dihang may maminaw kanimo ug sa ulahi siya mahimong isigkaalagad ni Jehova!