Atong Opisyal nga Web Site—Gidisenyo Aron Kita ug ang Uban Makabenepisyo

Si Jesus nagsugo kanato sa pagwali sa maayong balita sa Gingharian “sa tibuok gipuy-ang yuta ingon nga pagpamatuod ngadto sa tanang kanasoran.” (Mat. 24:14) Aron matabangan kita nga ‘matuman sa bug-os ang atong ministeryo,’ ang watchtower.org, jw-media.org, ug jw.org giusa diha sa bag-og disenyo nga jw.org nga Web site.—2 Tim. 4:5.

“Tibuok Gipuy-ang Yuta”: Mga 33 porsiyento sa populasyon sa yuta naggamit ug Internet. Kini nahimong pangunang tinubdan sa impormasyon alang sa daghan, ilabina ang mga batan-on. Ang atong site naghatag sa mga tiggamit ug Internet ug tinuod nga mga tubag sa mga pangutana bahin sa Bibliya. Pinaagi niini, masinati nila ang organisasyon ni Jehova, sayon silang makahangyog libreng pagtuon sa Bibliya, ug ang maayong balita makaabot na sa mga bahin sa yuta diin ang mga tawo gamay rag kahigayonan nga makadungog sa mensahe sa Gingharian.

“Tanang Kanasoran”: Aron mahatagag pamatuod ang “tanang kanasoran,” kinahanglang ipahayag nato ang kamatuoran sa Bibliya sa lainlaing pinulongan. Ang mga moabri sa jw.org daling makakaplag ug impormasyon diha sa mga 400 ka pinulongan, nga mas daghan kay sa ubang Web site.

Pahimusli Kinig Maayo: Ang katuyoan sa bag-og disenyo nga jw.org nga Web site dili lang aron masangyawan ang mga dili magtutuo. Kini gidisenyo usab alang sa mga Saksi ni Jehova. Kon duna kay koneksiyon sa Internet, gidasig ka namo nga masinati sa jw.org. Ang mosunod maoy mga sugyot kon unsaon kini paggamit.

[Dayagram sa panid 3]

(Alang sa aktuwal nga pagkahan-ay, tan-awa ang publikasyon)

Sulayi Kini

1 I-type ang www.jw.org diha sa address field sa Internet browser sa imong computer.

2 Aron masinati ka sa site, i-click ang mga section heading, menu option, ug link.

3 Sulayi paggamit ang jw.org diha sa imong cellphone o tablet nga may koneksiyon sa Internet. Ang page layout niini mapasibo sa mas gamay nga eskrin, apan ang impormasyon pareho ra.