Gamita ang Atong Web Site Diha sa Ministeryo—“Tubag sa mga Pangutana Bahin sa Bibliya”

Makita sa seksiyong “Mga Doktrina sa Bibliya” sa jw.org/ceb ang “Tubag sa mga Pangutana Bahin sa Bibliya.” Kon pamilyar kita sa mga pangutana nga nahisgotan sa maong seksiyon, ikapakita o ikasulti nato sa tagbalay ang Web site para sa mga tubag. Kini nga mga pangutana magamit sa pagsugod ug mga panaghisgot sa pagsangyaw. Makapili kitag pangutana nga makapainteres sa mga tawo sa teritoryo, makapangayog opinyon sa tagbalay, ug dayon makasulti kaniya kon unsay giingon sa Bibliya, gamit ang mga pangatarongan gikan sa jw.org/ceb. Human niana, atong ipatin-aw o ipakita niya kon asa nato nakuha ang impormasyon. Puwede sab nga direktang ipabasa kaniya ang tubag diha sa Web site. Nakita sa asawa sa usa ka nagapanawng magtatan-aw nga epektibo ang pag-ingon: “Daghang tawo ang natingala, ‘Ang Diyos bay hinungdan sa atong pag-antos?’ Gusto ba nimong masayran ang tubag sulod lang sa 51 segundos?” Iya dayong gi-play ang audio recording sa tubag nga iyang na-download sa iyang gadyet. Gitapos niya kini pinaagig pagpakita sa kapitulo 11 sa librong Gitudlo sa Bibliya.