JW.ORG—“Pagpamatuod Ngadto sa Tanang Kanasoran”

Si Jesus miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.” (Mat. 24:14) Ang Web site nga jw.org maoy epektibo kaayong paagi aron maabot ang “tanang kanasoran” sa mubong panahong nahibilin una moabot ang kataposan.

Usa ka magtiayong misyonaryo sa Solomon Islands nagsangyaw sa usa ka balangay daplin sa dagat. Didto ilang nahibalag ang upat ka edarang lalaki nga may mga cellphone. Busa ang mga misyonaryo nangutana kon antigo ba silang mag-Internet. Kamao sila. Gitudloan sila sa magtiayon kon unsaon pag-abli ang jw.org, pagpangita sa ilang pinulongan, pag-download sa magasin ug Bibliya, ug kon unsaon paggamit ang seksiyon para sa pamilya ug mga anak. Dihang magsangyaw ang maong magtiayon, ilang ipasalida sa mga bata ang video nga Pray Anytime. Human kini matan-aw sa usa ka grupo sa mga bata, sila nalipay ug nanagan sa lasang nga nangantag “Anytime, anywhere, I can pray . . . ”

Aniay pipila sa daghang sulat-pasalamat nga nadawat sa atong hedkuwarter sa New York:

“Kaming magtiayon mibalhin sa Mexico, ug nagtuon mig Kinatsila aron makasangyaw sa tanan namong mahibalag. Kada abli nako sa jw.org, magpasalamat ko kang Jehova kay nakatabang kini nako sa pagpamati ug pagkat-on. Daghan kaayo kinig magasin, libro, musika, ug drama sa daghang pinulongan. Gimahal ko kamo ug salamat sa tanan ninyong paghago.”​—D.H., Mexico.

“Buta ko, ug nagustohan gyod nako ang inyong Web site kay daghan kinig rekording nga akong mapaminawan. Hinaot magpadayon mo sa paggamag MP3 format (audio files) sa daghan pa ninyong libro, brosyur, ug ubang basahon aron makapaminaw ko niana sa tibuok adlaw.”​—K.G., United States.

“Ganahan kaayo ko sa jw.org! Kini sayon gamiton ug nakadasig nako nga mas magkugi sa pagtuon ug pagsangyaw. Ako 72 anyos na, 47 ka tuig nga bawtismado, ug kapig 30 ka tuig nang payunir. Inahan ko sa 9 ka bawtismadong anak ug may 16 ka apo ug 3 ka apo sa tuhod. Upat na ka henerasyon sa among pamilya ang nagregular payunir. Nagpasalamat ko kang Jehova niining espirituwal nga pagkaon sa hustong panahon.”​—M.T., United States.

“Alas 4:00 karon sa kadlawon samtang nagsulat ko niini. Sagad di ko makatulog sa gabii tungod sa akong sakit nga multiple sclerosis ug ubang bikil sa lawas, sama ra sa daghan natong igsoon sa pagtuo sa tibuok kalibotan. Si Jehova padayong nag-atiman kanato sa espirituwal nga paagi, ug tungod niini ako nagpasalamat kaninyo. Mga hulagway na lang ang sagad nakong hunahunaon, mao nga ang lay-out sa Web site haom sa akong kahimtang. Nagustohan ko gayod ang mga dayagram, video clip, ug mga hulagway nga may klarong mga komento.”​—B.B., New Zealand.

“Nagsulat ko aron magpasalamat kaninyo. Doktor ko sa usa ka hilit nga dapit sa Sri Lanka, diin walay mabatonang magasin sa akong pinulongan. Apan tungod sa inyong Web site, ako maka-download ug makabasa niana sa akong pinulongan. Ang inyong Web site maoy usa sa maayo kaayong mga gasa ni Jehova alang sa mga tawong sama kanako.”​—N.F., Sri Lanka.

“Nagsulat ko sa pagpasalamat kaninyo sa inyong mga paghago aron tabangan ang mga tawo nga makakat-on bahin kang Jehova. Palihog padayon sa paggamag video diha sa jw.org. Kini nakatabang sa akong mga problema ug sa among pamilya. Nakatabang kaayo kanako ang video nga Beat a Bully Without Using Your Fists. Sa makausa pa, salamat sa inyong paghago.”​—Y.S., 9 anyos, United States.

“Gusto kong magpasalamat kaninyo ug kang Jehova sa nadawat namong espirituwal nga pagkaon. Nakatabang nakog dako ang Web site nga jw.org, ilabina ang seksiyong ‘Mga Tin-edyer.’ Nakadayeg sab ko sa seryeng Mahimong Higala ni Jehova. Duna koy tulo ka manghod nga babaye, ug nakita ko nga maayo kinig epekto kanila. Bisag layo mi kaninyo, kita nagkahiusa ingong mga igsoon tungod sa atong gugma kang Jehova. Salamat.”​—A.B., Peru.