Moundang Ka ba Dayon?

Sa dihang mosangyaw sa kanataran, naandan sa pipila ka magmamantala nga moundang sa gitakdang oras, tingali sa udto. Siyempre, may mga kahimtang nga ang pipila kinahanglang moundang sa pagsangyaw sa gitakdang oras. Apan moundang ka ba sa pagsangyaw tungod lang kay ang uban sa grupo miundang na o tungod kay ang inyong kongregasyon may naandan nang oras sa pag-undang? Puwede ka bang mopadayon sa pipila ka minutos ug makigbahin sa pagsangyaw sa publiko, sama sa pagsangyaw sa kadalanan? Puwede ka bang mobalikduaw sa usa o duha ka interesado sa dili pa ka mouli? Palandonga kon unsa ka dako ang imong malampos kon maabtan nimo sa balay ang usa ka interesado o makapahimutang kag pipila ka magasin sa usa nga imong masangyawan sa dalan! Kon kita dili dayon moundang ug mopadayon sa pipila ka minutos, madugangan ang atong “halad sa pagdayeg.”—Heb. 13:15.