Gamita ang Daang mga Magasin

Walay makapahimulos kon tipigan ra o ilabay ang daang mga magasin, busa paningkamotan natong mapahimutang kana. Ang usa ka magasin basin makapainteres sa usa ka tawo sa kamatuoran ug makapadasig kaniya sa pagtawag sa ngalan ni Jehova. (Roma 10:13, 14) Aniay pipila ka sugyot kon unsaon paggamit sa daang mga magasin.

• Dihang magsangyaw sa teritoryo nga talagsa rang makobrehan, pagbilig kopya diha sa balay nga walay tawo nga dili makita sa lumalabay.

• Dihang makigbahin sa publikong pagsangyaw sa dapit nga may mga tawong naghulat, sama sa estasyon sa bus o tren, pangutana kon gusto ba nilang dunay mabasa, ipakita ang pipila ka daang magasin, ug papilia sila.

• Dihang moadto sa mga opisina, ospital, klinika, o sa susamang dapit sa inyong teritoryo, pagbilig pipila ka daang isyu sa hulatanan. Mas maayong mangayo unag permiso sa tagdumala didto sa dili pa magbilin ug mga magasin. Kon may mga magasin na didto, ayaw na pagbilig dugang kopya.

• Dihang mangandam ka sa pagbalikduaw, hunahunaa kon sa unsa interesado ang giplanohan mong duawon. May pamilya ba siya? Hilig ba siyag biyahe? Hilig ba siyag tanom? Pangitag artikulo sa daang mga gula nga basin makapainteres niya, ug ipakita kana.

• Dihang maabtan na nimo sa balay ang interesado nga kanunay nimong gibalikan, hatagi siyag daang mga magasin nga wala pa siyay kopya.