2 | “Paghupay Gikan sa Balaang Kasulatan”

ANG BIBLIYA NAG-INGON: “Ang tanang gisulat kaniadto gisulat aron tudloan ta, aron nga pinaagi sa atong paglahutay ug pinaagi sa paghupay gikan sa Balaang Kasulatan kita makabatog paglaom.”—ROMA 15:4.

Kon Unsay Gipasabot Niana

Ang Bibliya naay makapahupayng mga mensahe nga makapalig-on nato ug makatabang nga makalahutay ta dihang negatibo ang atong panghunahuna. Ang Bibliya naghatag pod natog paglaom nga sa dili madugay ang emosyonal nga kasakit mawala na.

Kon sa Unsang Paagi Kini Makatabang

Kitang tanan maguol gyod usahay; pero kadtong naay depresyon o anxiety disorder mag-antos tingali sa grabeng emosyonal nga kasakit kada adlaw. Sa unsang paagi makatabang ang Bibliya?

Ang Bibliya naghisgot ug daghang positibong butang nga puwedeng ipuli sa negatibong panghunahuna. (Filipos 4:8) Kini makapahupay ug makapakalma gyod nato ug motabang nga makontrolar nato ang atong emosyon.—Salmo 94:18, 19.
Ang Bibliya makatabang nato nga masuklan ang panghunahuna nga wala tay pulos.—Lucas 12:6, 7.
Daghang teksto sa Bibliya ang nagpasalig nato nga wala ta mag-inusara ug nga ang Diyos, ang atong Maglalalang, nakasabot gyod sa atong gibati.—Salmo 34:18; 1 Juan 3:19, 20.
Ang Bibliya nagsaad nga wad-on sa Diyos sa atong panumdoman ang dili maayong mga kaagi. (Isaias 65:17; Pinadayag 21:4) Kon nag-antos ta sa makapatugaw nga mga hunahuna ug emosyon, kini nga saad makahatag natog kusog nga molahutay.

Ang Bibliya Nakatabang Kang Jessica

Kon Unsay Epekto sa Depresyon Kanako

“Pagka-25 anyos nako, nagka-nervous breakdown ko ug nadayagnos nga naay grabeng depresyon. Nag-antos ko kay kalit lang nga mahinumdoman nako ang dili maayong mga kaagi, ug dili nako ni makontrolar. Gitabangan ko sa mga doktor nga masabtan nga ang hinungdan sa akong depresyon mao ang akong negatibong panghunahuna nga resulta sa dili maayong mga panghitabo sa akong kinabuhi. Gawas nga kinahanglan kong motomar ug tambal, nagkinahanglan pod kog therapy aron matabangan ko nga mailhan ang negatibong mga panghunahuna ug tul-iron kana.”

Kon sa Unsang Paagi Nakatabang Nako ang Bibliya

“Niadtong grabe kaayo ang akong depresyon, nakaeksperyensiya kog mga panic attack ug grabeng kabalaka, ug dili ko katulog. Sagad inigkagabii, kalit lang nga mosulod sa akong hunahuna ang mga butang nga makapabalaka nako ug dili nako ni makontrolar. Ang Salmo 94:19 nag-ingon nga ang Diyos makahupay nato dihang malumsan ta sa mga kabalaka. Maong naa gyod koy Bibliya ug notebook nga naay makapadasig nga mga teksto duol sa akong higdaanan. Dihang dili ko makatulog, magbasa kog mga teksto sa Bibliya aron mahupayan ko.

“Gidasig ta sa Bibliya nga suklan ang panghunahuna nga sukwahi sa atong nahibaloan bahin sa Diyos. Sa una, gibati gyod nako nga walay ganahan nako ug wala koy pulos. Pero akong nakat-onan sa Bibliya nga ang Diyos mahigugmaon ug mabination nga Amahan nga nagmahal sa matag usa kanato. Anam-anam nakong nakontrolar ang akong hunahuna imbes pasagdan kining magkontrolar nako. Nakat-onan nako nga lantawon ang kaugalingon sama sa panglantaw sa Diyos kanako. Nakatabang gyod ni nako nga mausab ang akong panglantaw sa akong kaugalingon.

“Naghinamhinam ko sa panahon nga mawala na sa panumdoman ang tanang dili maayong kaagi ug ang negatibong panghunahuna. Ang pagkahibalo nga wala nay mga mental disorder sa umaabot nakatabang nako nga makalahutay sa akong kahimtang karon ug naghatag ni nakog paglaom nga matapos ra ang akong pag-antos sa depresyon.”