Ang Basahon sa Job Makatabang Nimo Dihang Mohatag Kag Tambag

1-2. Unsay gustong himoon sa upat ka lalaki nga mibisita kang Job, pero nganong lisod to para nila?

PASPAS nga nabaniog ang balita. Si Job, nga nailhang dato kaayo, nawad-an sa tanan niyang nabatonan. Dihang nahibaloan ni sa iyang tulo ka higala nga si Elipaz, Bildad, ug Zopar, mibiyahe sila paingon sa Uz aron hupayon siya. Pero wala sila magdahom kon unsa ka grabe ang ilang makita didto.

² Imadyina ang nahitabo. Si Job nawad-an sa tanan niyang nabatonan. Wala na ang daghan niyang karnero, baka, kamelyo, ug mga asno. Kadaghanan sa iyang mga sulugoon gipamatay. Ang tanan niyang anak nangamatay pod, ug ang balay diin nagtapoktapok ang iyang mga anak puwerte nang gubaa. Ang nakapait pa gyod kay si Job gihampak ug ngutngot kaayong mga hubag sa tibuok niyang lawas. Layo pa lang, nakita na siya sa iyang tulo ka higala nga naglingkod na lang sa yuta ug puwerteng guola. Unsay ilang gihimo para kang Job? Sulod sa pito ka adlaw, wala gyod silay gisulti sa ilang higala nga grabeng nag-antos. (Job 2:​12, 13) Unya, diha poy miabot nga batan-ong lalaki nga ginganlag Elihu, ug milingkod siya duol nila. Sa ulahi, miestorya si Job. Iyang gitunglo ang adlaw nga natawo siya ug miingon nga maayo pag namatay na lang siya. (Job 3:​1-3, 11) Nagkinahanglan gyog paghupay si Job! Ang isulti niini nga mga lalaki ug kon unsaon nila ni pagsulti magpakita kon tinuod ba gyod silang higala ni Job ug kon naghunahuna ba gyod sila sa iyang kaayohan.

3. Unsay atong hisgotan niini nga artikulo?

³ Gipasulat ni Jehova kang Moises ang gipanulti ug gihimo niining tulo ka lalaki ug ni Elihu. Matikdi nga ang gipanulti ni Elihu naggikan kang Jehova, pero ang uban sa gipanulti ni Elipaz posibleng naggikan sa demonyo. (Job 4:​12-16; 33:​24, 25) Maong dili ikatingala nga sa basahon sa Job, makabasa tag maayo kaayo nga mga tambag, pero naa pod dinhi ang pipila sa wala gyoy ayo nga mga tambag. Busa ang basahon sa Job makatabang gyod nato dihang motambag ta sa uban. Karon, atong konsiderahon ang dili maayong ehemplo sa tulo ka higala ni Job, dayon hisgotan nato ang maayong ehemplo ni Elihu. Ato pong hisgotan kon unsay posibleng nakat-onan sa mga Israelinhon sa estorya ni Job ug kon unsa poy atong makat-onan gikan ani.

KON GIUNSA PAGTAMBAG SI JOB SA IYANG TULO KA HIGALA

4. Nganong ang tulo ka higala ni Job wala makahupay niya? (Tan-awa sab ang hulagway.)

⁴ Ang Bibliya nag-ingon nga dihang nabalitaan sa tulo ka higala ni Job ang mga nahitabo niya, miadto sila aron “mosimpatiya kaniya ug hupayon siya.” (Job 2:11) Pero wala nila mahimo kon unsa untay ilang tuyo. Ngano? Tungod sa pipila ka rason. Una, gihukman dayon nila si Job bisag wala gyod sila kasabot sa iyang situwasyon. Tungod ana, sayop ang ilang hunahuna bahin niya. Pananglitan, nagtuo sila nga si Job gisilotan tungod sa mga sala nga iyang nahimo.a (Job 4:7; 11:14) Ikaduha, kadaghanan sa ilang mga tambag sakit ug dili gyod makapahupay. Pananglitan, silang tulo naay gipang-ingon nga morag maalamon paminawon pero wala diay pulos. (Job 13:12) Si Bildad kaduha miingon nga si Job nagsige ra dawg estorya. (Job 8:2; 18:2) Ug gipadungogdungogan ni Zopar si Job nga mora siyag “tawong walay utok.” (Job 11:12) Ikatulo, bisag wala nila singkahi si Job, ang ilang paagi sa pag-estorya walay tahod, sarkastiko, ug morag nangakusar. (Job 15:​7-11) Klaro nga kining mga tawhana mas nagpokus sa pagpamatuod nga sayop si Job imbes nga hupayon siya o palig-onon ang iyang pagtuo.

5. Unsay gibati ni Job sa tambag ni Elipaz, Bildad, ug Zopar?

⁵ Siyempre, dili gyod maayog resulta ang tambag nga gihatag niining tulo ka lalaki. Nasakitan kaayo si Job sa ilang gipanulti. (Job 19:2) Maong masabtan nato kon nganong mibati si Job nga kinahanglan niyang depensahan ang iyang reputasyon. Tungod adto, dili na balanse ang iyang panghunahuna ug nakasulti siyag dili maayo. (Job 6:​3, 26) Ang tambag ni Elipaz, Bildad, ug Zopar wala mahiuyon sa panghunahuna ni Jehova, ug wala pod nila trataha si Job sa mahigugmaong paagi. Tungod ana, wala sila kabantay nga gigamit na diay sila ni Satanas aron paluyahon si Job. (Job 2:​4, 6) Unsay posibleng nakat-onan sa mga Israelinhon kaniadto bahin ani, ug unsa poy atong makat-onan gikan niini karon?

6. Unsa tingali ang nakat-onan sa mga ansiyano sa Israel gikan sa gihimo sa tulo ka nagpakaaron-ingnong higala ni Job?

⁶ Kon unsay nakat-onan sa mga Israelinhon. Human matukod ang nasod sa Israel, si Jehova nagtudlog mga ansiyano nga maghukom sa iyang katawhan sumala sa iyang matarong nga mga sukdanan. (Deut. 1:​15-18; 27:1) Kini nga mga lalaki kinahanglang maminaw pag-ayo sa dili pa motambag o mohatag ug paghukom. (2 Cron. 19:6) Kinahanglan pod silang mangutana imbes nga maghunahuna nga nahibalo na sila sa tanang detalye. (Deut. 19:18) Likayan pod nila ang pagsultig sakit ngadto sa mga tawo nga moduol nila alang sa tabang. Ngano? Kay kon kini nga mga magtatambag sakit ug sinultihan ug daling masuko, dili na hinuon madasig ang mga tawo nga mosulti sa ilang gibati. (Ex. 22:​22-24) Daghan gyod tingalig nakat-onan ang mga ansiyano sa Israel gikan sa estorya ni Job.

7. Gawas pa sa mga ansiyano sa Israel, kinsa pay makahatag ug tambag, ug unsa tingali ang ilang nakat-onan sa estorya ni Job? (Proverbio 27:9)

⁷ Dili lang mga ansiyano sa Israel ang makahatag ug tambag. Bisag kinsa nga Israelinhon—batan-on man o tigulang, lalaki man o babaye—puwedeng motambag sa ilang higala nga naluya sa pag-alagad o nakahimog dili maayo. (Sal. 141:5) Ang paghatag ug sinserong tambag maoy ilhanan nga ang usa tinuod gyod nga higala. (Basaha ang Proverbio 27:9.) Ang mga Israelinhon posibleng nakakat-on gikan sa tulo ka nagpakaaron-ingnong higala ni Job kon unsay dili angayng isulti ug buhaton dihang mohatag ug tambag.

8. Unsay angay natong likayan dihang mohatag ug tambag? (Tan-awa sab ang mga hulagway.)

⁸ Kon unsay atong makat-onan. Ingong mga Kristohanon, gusto natong tabangan ang atong mga igsoon dihang makaatubang silag mga problema. Pero angay natong likayan ang gihimo sa tulo ka nagpakaaron-ingnong higala ni Job. Una, dili ta mohatag ug tambag kon wala pa ta mahibalo sa tanang detalye. Ikaduha, dili nato ibase ang atong tambag sa personal ra nato nga mga opinyon o eksperyensiya, nga maoy sagad gihimo ni Elipaz. Hinuon, ato ning ibase sa kasaligang mga pulong ni Jehova nga naa sa Bibliya. (Job 4:8; 5:​3, 27) Ikatulo, likayan nato ang way tahod ug sakit nga sinultihan. Hinumdomi nga si Elipaz ug ang iyang mga kauban naa poy gisulti nga tinuod. Gani ang usa sa ilang giingon gikutlo sa laing magsusulat sa Bibliya. (Itandi ang Job 5:13 sa 1 Corinto 3:19.) Pero sagad, bakak ang ilang gisulti bahin sa Diyos ug ilang gipasakitan si Job. Maong si Jehova miingon nga wala sila magsulti sa kamatuoran. (Job 42:​7, 8) Dili gyod ingon ana ang maayong tambag, maong mag-amping ta dihang motambag. Dili nato gustong bation sa atong gitambagan nga dili siya angayang higugmaon o nga dili makataronganon si Jehova. Karon, atong hisgotan kon unsay atong makat-onan sa ehemplo ni Elihu.

KON GIUNSA PAGTAMBAG NI ELIHU SI JOB

9. Dihang nahuman nag estorya ang tulo ka nagpakaaron-ingnong higala ni Job, nganong nagkinahanglan gihapon siyag tabang, ug giunsa na paghatag ni Jehova?

⁹ Nahuman ra gyod ang panaglalis ni Job ug sa iyang tulo ka nagpakaaron-ingnong higala. Pero dili gihapon maayo ang ilang buot. Hunahunaa ra god: Miabot ug 28 ka kapitulo sa Bibliya ang ilang lalis, ug kadaghanan sa ilang gipanulti punog kalagot ug kasuko. Maong wala gyod mawala ang kasakit nga gibati ni Job. Nagkinahanglan gihapon siyag paghupay ug pagtul-id. Giunsa siya pagtabang ni Jehova? Gigamit ni Jehova si Elihu aron tambagan siya. Nganong gihulat pa man ni Elihu nga mahumag estorya ang upat ayha siya mitingog? Siya miingon: “Ako batan-on pa ug kamo tigulang na. Mao nga agig pagtahod naghilom lang una ko.” (Job 32:​6, 7) Nasabtan sa batan-ong si Elihu nga ang mga tigulang mas daghan nag eksperyensiya sa kinabuhi ug mas daghag nahibaloan. Maong kasagaran, mas maalamon sila kon itandi sa mga batan-on. Pero human sa taastaas nga panahon nga naminaw si Elihu kang Job ug sa iyang tulo ka nagpakaaron-ingnong higala, wala na gyod siya kapugong ug mitingog na siya. Siya miingon: “Dili lang edad ang makapahimo sa usa nga maalamon, ug dili lang mga tigulang ang makasabot kon unsay husto.” (Job 32:9) Unsay sunod nga giingon ni Elihu, ug giunsa na niya pagsulti?

10. Unsay gihimo ni Elihu sa wala pa niya tambagi si Job? (Job 33:​6, 7)

¹⁰ Sa wala pa tambagi ni Elihu si Job, iya unang giseguro nga maandam si Job sa pagdawat sa iyang isulti. Unsay iyang gihimo? Una, iyang gipakalma ang iyang kaugalingon. Nahibalo ta ani kay ang Bibliya nag-ingon nga sa primero, nasuko pag-ayo si Elihu. (Job 32:​2-5) Pero wala tay mabasa nga misulti siyag sakit kang Job tungod sa iyang kasuko. Hinuon, buotan siyang nakig-estorya niya. Pananglitan, iyang giingnan si Job: “Ako sama ra kanimo sa atubangan sa matuod nga Diyos.” (Basaha ang Job 33:​6, 7.) Dayon gipasaligan ni Elihu si Job nga naminaw siya pag-ayo niya. Gani, iyang gisumaryo ang pangunang mga punto sa gisulti ni Job. (Job 32:11; 33:​8-11) Iya pod nang gihimo sa ubang mga higayon dihang iyang gitambagan si Job.—Job 34:​5, 6, 9; 35:​1-4.

11. Giunsa pagtambag ni Elihu si Job? (Job 33:1)

¹¹ Dihang gitambagan ni Elihu ang matinumanong si Job, iya nang gihimo uban ang pagtahod. Pananglitan, iyang gigamit ang ngalan ni Job, nga wala gyod himoa niadtong tulo ka lalaki. (Basaha ang Job 33:1.) Gihatagan pod ni Elihu si Job ug higayon nga motubag niya. Kahinumdom tingali siya sa iyang gibati niadtong kasultihon na kaayo siya samtang naglalis si Job ug ang tulo ka lalaki. (Job 32:4; 33:32) Gipasidan-an pod ni Elihu si Job sa dili maayong mga resulta kon magpadayon siya sa iyang sayop nga mga panglantaw, ug iya siyang gipahinumdoman sa kaalam, gahom, hustisya, ug maunongong gugma ni Jehova. (Job 36:​18, 21-26; 37:​23, 24) Tungod sa maayong tambag ni Elihu, mas naandam si Job nga modawat ug dugang disiplina—niining higayona, gikan mismo kang Jehova. (Job 38:​1-3) Unsay posibleng nakat-onan sa mga Israelinhon sa ehemplo ni Elihu, ug unsa poy atong makat-onan niana karon?

12. Giunsa paggamit ni Jehova ang mga propeta aron tabangan ang iyang katawhan, ug unsa tingali ang nakat-onan sa mga Israelinhon sa maayong ehemplo ni Elihu?

¹² Kon unsay nakat-onan sa mga Israelinhon. Si Jehova nagtudlog mga propeta aron tabangan ang iyang katawhan nga mahibalo sa iyang katuyoan. Pananglitan, panahon sa mga Maghuhukom, ang propetang si Debora nahimong samag inahan nga naggiya sa katawhan sa Israel. Gigamit pod ni Jehova si Samuel sukad niadtong bata pa siya aron tudloan ang mga Israelinhon. (Maghu. 4:​4-7; 5:7; 1 Sam. 3:​19, 20) Ug panahon sa mga hari, daghang propeta ang gigamit ni Jehova aron palig-onon ang iyang katawhan sa espirituwal ug tambagan kadtong mga wala na magmatinumanon kaniya. (2 Sam. 12:​1-4; Buh. 3:24) Ang ehemplo ni Elihu diha sa basahon sa Job nakatabang gyod tingali sa matinumanong mga Israelinhon sa paghatag ug maayong tambag, kay nagtudlo ni nila kon unsay angayng isulti ug kon unsaon ni pagsulti.

13. Sa unsang paagi nato madasig ang mga igsoon?

¹³ Kon unsay atong makat-onan. Ingong mga Kristohanon, gipahibalo nato ang katuyoan sa Diyos pinaagi sa pagsulti sa iyang mensahe nga naa sa Bibliya. Mahimo pod nato na pinaagi sa pagpalig-on ug pagdasig sa mga igsoon. (1 Cor. 14:3) Ang mga ansiyano ilabinang angayng maningkamot nga “hupayon” ang naguol nga mga igsoon, bisan kadtong negatibo na tingalig inestoryahan o ‘nagpasagad na lag sulti.’—1 Tes. 5:14; Job 6:3.

14-15. Sa unsang paagi masundog sa mga ansiyano si Elihu dihang motambag sila? Paghatag ug pananglitan.

¹⁴ Hunahunaa ni nga pananglitan: Nahibaloan sa usa ka ansiyano nga naay sister sa ilang kongregasyon nga naguol pag-ayo. Tungod ana, gibisita niya ug sa usa pa ka brader ang maong sister aron dasigon siya. Panahon sa ilang pagbisita, gisulti sa sister ang iyang mga kaguol. Miingon siya nga bisag pirme siyang motambong sa tigom ug mosangyaw, dili gihapon siya malipayon. Unsa may maayong himoon sa maong ansiyano?

¹⁵ Una, maningkamot siya nga mahibaloan kon nganong ingon adto ang gibati sa sister. Aron mahimo na, kinahanglan siyang maminaw pag-ayo. Pananglitan, mibati kaha ang sister nga dili siya takos higugmaon ni Jehova? Nabug-atan kaha siya sa “mga kabalaka sa kinabuhi”? (Luc. 21:34) Ikaduha, maningkamot ang ansiyano nga komendahan ang sister kay bisag na-depress siya, wala gihapon siya mohunong sa pagtambong sa tigom ug pagsangyaw. Ug ikatulo, dihang masabtan na sa ansiyano ang situwasyon ug kon nganong naguol ang sister, gamiton niya ang Bibliya aron palig-onon ang pagsalig sa sister nga gimahal siya sa Diyos.—Gal. 2:20.

PADAYON SA PAGKAT-ON GIKAN SA BASAHON SA JOB

16. Unsay atong mahimo aron padayon tang makabenepisyo sa basahon sa Job?

¹⁶ Daghan gyod tag nakat-onan sa atong paghisgot sa basahon sa Job. Sa miaging artikulo, atong nakat-onan kon nganong gitugotan sa Diyos ang pag-antos ug kon sa unsang paagi ta makalahutay. Ug niini nga artikulo, nakat-onan nato nga makahatag tag maayong tambag kon likayan nato ang gihimo sa tulo ka nagpakaaron-ingnong higala ni Job ug sundogon nato ang maayong ehemplo ni Elihu. Puwede nimong i-review ang imong mga nakat-onan sa basahon sa Job ilabina kon naa kay kinahanglang tambagan. Ug kon taudtaod na sukad nimo ning nabasa, puwede nimong himoong tumong nga basahon nig balik. Dili gyod ka magmahay kon imo nang himoon, kay daghan pang nindot nga mga leksiyon ang imong makat-onan niini.