Ang Abilidad sa mga Hormone sa Pagkontrolar sa mga Proseso sa Lawas

Aron moobra ang imong lawas, ang imong dugo nagkinahanglag eksaktong gidaghanon sa mga electrolyte, sama sa calcium. Pero kada adlaw, dili parehas ang gidaghanon sa electrolyte nga imong ginapasulod sa imong lawas. Unsay himoon sa lawas aron kanunayng eksakto ang gidaghanon sa electrolyte niini?

Ang himsog nga lawas magkontrolar sa gidaghanon sa mga electrolyte pinaagi sa paggama, pagpondo, ug pagpagawas ug mga hormone ngadto sa dugo. Ang mga hormone maoy mga kemikal nga motabang sa pagkontrolar sa lainlaing obra sa lawas. Bisag ang diyutay ra nga hormone dakog epekto sa imong lawas. Ang Encyclopedia Britannica nag-ingon nga ang pagpagawas ug mga hormone “dili kay sinulagma lang; kini organisado ug kontrolado nga proseso.”

Pananglitan, ang mga parathyroid gland diha sa liog makabantay ug ginagmayng kausaban sa gidaghanon sa calcium diha sa dugo. Kasagaran, dunay upat niini nga mga glandula (gland) ug ang matag usa samag gidak-on sa lugas sa bugas humay.

Sa dihang kini nga mga glandula makamatikod nga mius-os ang gidaghanon sa calcium sa normal nga lebel niini, magpagawas ni dayon ug hormone, usahay sulod lang sa pipila ka segundo. Kini nga hormone magsignal sa imong mga bukog sa pagpagawas sa napondo nga calcium ngadto sa dugo. Kini nga hormone magsignal sab sa imong mga kidney nga hunongon ang pagsala ug calcium gikan sa dugo. Mosignal pod ni sa imong gamayng tinai nga padaghanon ang calcium nga i-absorb niini gikan sa imong gikaon.

Pero kon daghan ra kaayog calcium diha sa dugo, ang laing glandula, nga gitawag ug thyroid, magpagawas ug lahi nga hormone. Kini nga hormone magsignal sa mga bukog sa pag-absorb ug pagpondog mas daghang calcium. Magsignal sab ni sa mga kidney sa pagsala ug pagtangtang ug mas daghang calcium kay sa kasagarang ginatangtang niini.

Kini nga mga hormone maoy duha lang sa kapig 100 ka hormone nga gigamit sa lawas sa pag-adjust o pagkontrolar sa lainlaing proseso nga gikinahanglan aron maayo ang pag-obra niini.

Unsay imong hunahuna? Ang abilidad ba sa imong mga hormone sa pagkontrolar sa lainlaing proseso sa imong lawas resulta sa ebolusyon? O gidisenyo kini?