Ang Dakong Kalipay sa Paghatag—Ikaw ba Nakatagamtam na Niini?
ANG lawak nga gisalosalohan gipangitngitan. Gipahinayan ang musika. Mihunong ang mga mananayaw. Gipahayagan ang pundok sa maanindot nga pagkaputos nga mga kahon. Adunay dagkong mga kahon ug gagmayng mga kahon. May kuwadradong kahon ug lingin nga mga kahon, may kolor rosas ug kolor asul, kolor salapi ug kolor bulawan. Kining tanan may maanindot nga mga ribon ug mga laso. Mainampingong gibuksan sa ginerbiyos nga mga kamot sa naghinamhinam nga kinasal nga babaye ang matag usa, samtang ang naulawng kinasal nga lalaki hilom nga mitabang.
Dihay mga toaster ug mga blender alang sa kosina; mga pinggan ug mga kubyertos, mga mantel sa lamesa ug kaparis nga mga serbilyeta alang sa komedor. Dihay nagkalainlaing mga toalya ug daghang mga labakara, ug mga habol ug mga punda nga molungtad sa tibuok nga kinabuhi. Dihay mga orasan alang sa matag lawak sa balay ug mga libro sa pagluto nga nasudlan ug daghang mga resipe sa pagtagbaw sa panabor sa palakaon ug maayo.
Samtang gibuksan ang mga regalo maduggan ang “mga ooh” ug “mga aah” ug ang kinasingkasing nga mga ekspresyon sa pasalamat sa bag-ong kinasal. Ilang natagamtam ang kalipay sa pagdawat gikan niadtong nahibalo sa kalipay sa paghatag.
Ang mga kasal, mga anibersaryo, sa mga panahon sa Pasko, mga komplianyo, ug uban pang mga selebrasyon maoy mga batasan sa katilingban diin ang paghatag ug regalo gipaabot ug gidawat ingong bahin sa mga rituwal. Apan tungod kay gipaabot kini sa kadaghanang mga nasod, mohatag usahay kini ug kalisod sa tighatag nga makawala hinoon sa kalipay sa paghatag. Apan, adunay kinabubut-ong paghatag, ang paghatag sa panahong wala kini paabota. Kini makahatag kalipay sa dumadawat, gamay man o dako ang gasa, ug mohatag kinig dakong kalipay sa tighatag.
Sa pagkatinuod, kadtong mga sapian makaarang sa paghatag ug daghan. Pananglitan, ang ika-19ng siglong industriyalista sa Amerika si Andrew Carnegie mahimo unta nga unang bilyonaryo sa iyang nasod. Hinunoa, iyang gihatag ang iyang 90 porsiento sa iyang bahandi sa kapin sa 18 ka tuig. Dihang gipasidan-an siya sa iyang sekretaryo nga nagkahurot na ang iyang puhonan, siya malipayong mitubag, “Nalipay ako sa pagkadungog niana undo, sige lang.” Nakakita usab kadtong panahona kang John D. Rockefeller, ang usa sa labing sapiang tawo sa kalibotan, nga nakahatag ug $750 milyones sa iyang tibuok kinabuhi. Nasulat usab nga ang mag-aawit nga si Elvis Presley “nanghatag ug dinosenang mga Cadillac” ug nalipay kaayo sa pagbuhat niini.
Dili Usa ka Bag-ong Kustombre
Ang paghatag ug mga gasa maoy usa ka kustombre nga halos sama ka karaan sa tawo. Gikan sa unang mga panahon kini nakadula ug importanteng bahin sa mga kinabuhi sa mga tawo. Gihatagan sa tigulang nga ulipon ni Abraham si Rebecca ug mga alahas tapos nakakita sa ebidensiya nga gitudlo siya ni Jehova nga mahimong asawa alang kang Isaac. Gihatagan usab ug “piniling mga butang ang iyang igsoong lalaki ug ang iyang inahan.” (Genesis 24:13-22, 50-33) Sa dihang natapos ang mga kasakit nga giantos ni Job, siya gihatagan sa iyang mga igsoong lalaki ug babaye ug mga kaila kanhi—ang tagsatagsa mihatag ug “usa ka buok salapi ug ang tagsatagsa usa ka buok singsing nga bulawan.”—Job 42:10, 11.
Dihang ang wala-nganling rayna sa Sheba mipanaw ngadto sa Jerusalem aron sa pagduaw kang Haring Solomon, siya natandog sa hinatag sa Diyos nga kaalam ug mipahayag nga malipayon ang mga ulipon ni Solomon tungod kay makadungog ug makapahimulos gikan niining labing maalamon sa tanang mga tawo. Natandog kaayo siya nga tungod niana iyang gihatagan si Solomon ug mga gasa nga 120 ka talentong bulawan (balor ug mga $50,000,000) ug mga mahalong mga bato ug mahal kaayong lanang balsamo. Tingali nakuhaan ug dako ang bahandi sa iyang gamayng gingharian pinaagi sa paghatag ug dakong kantidad, apan sa walay duhaduha iyang natagamtam ang kalipay sa paghatag. Si Solomon usab nakatagamtam ug kalipay, kay iyang gihatagan siya ug gasa nga labaw ug kantidad sa mga bahandi nga iyang nahatag kaniya.—2 Cronicas 9:12; American Translation, Moffatt.
Ang unang mga Kristohanon mihatag o miamot alang sa ilang kabos nga mga igsoon. Si apostol Pablo misulat bahin sa mga Kristohanon sa Macedonia ug sa Acaya, kinsa, bisan kabos, mihatag saylo sa ilang katakos sa paghatag ngadto sa ilang mga igsoon nga nanginahanglan sa Judea. “Gikalipay kaayo nila ang paghimo niini,” miingon si Pablo.—Roma 15:26, 27.
Mga Gasa nga “Nagasulti”
Karon, dayag nga ang paghatag ug gasa padayon nga nahimong tawhanong paagi sa pagtukod ug paglig-on sa bugkos sa gugma ug panaghigalaay, sa pagpahibalo sa uban nga kita nagatagad.
Adunay mga gasa gikan sa usa ka kapikas sa kaminyoon nga ihatag ngadto sa lain, aron lamang sa pag-ingong, “Gimahal ko ikaw”—usa ka yanong kahon sa karmelitos o pungpong sa mga bulak. Adunay mga gasa gikan sa mga anak ngadto sa mga ginikanan. Ug unsang mahigugmaong mga ginikanan nga dili maghatag kanunay sa ilang mga anak? Adunay mga gasa sa paghupay sa nasubong kasingkasing, sa paglipay sa nasakit nga kalag, sa pag-ingong “hinaot nga mamaayo ka sa madali,” sa pagpahayag ug apresasyon sa gipakitang kalulot ug pagkamaabiabihon, o ang yanong pag-ingon, “Nalingaw kaayo ako.”
Adunay mga gasa alang sa kabos, sa mga biktima sa katalagman nga dili nato makita ug nga dili gayod kita makadawat ug mga ekspresyon sa pasalamat. Ang usa ka bukag sa prutas alang sa masakiton, tanom alang sa dili makalakaw, usa ka buok alahas alang sa suod nga higala—dakog kahulogan ang gamayng mga butang. Ang paghatag nga may kalipay nga gikan gayod sa kasingkasing. Kini mao ang mga gasa nga labing kalipayan.
Sa tanang mga okasyon sa paghatag, walay sama nianang makita sa tibuok-kalibotang pasundayag sa panahon sa Pasko. Kini maoy pagpatuyang nga paghatag ug gasa nga nakagamot usab sa halayong mga dapit. Kini maoy selebrasyon nga gikahadlokan sa kadaghanan ug mahinamong ginapaabot sa uban. Kini magkahulogan sa kalainan tali sa pinansiyal nga katalagman ug sungay sa kabuhong. Bisan pang may pagbayloay ug mga gasa tali sa mga higala, kining rituwala mahimong makapasuod o makapalayo kanila. Kining daw sukwahi nga pagpanghatag sa panahon sa Pasko maoy tagdon sa sunod nga artikulo.
[Letrato sa panid 2]
Ang mga dulaan makalingaw, APAN IKAW MAO ANG LABING MAAYONG GASA SA IMONG ANAK!