‘Pagkabayo sa Kawsa sa Kamatuoran’

“Ug sa imong kahimayaan magpadayon ka ngadto sa kalamposan; magkabayo ka sa kawsa sa kamatuoran ug pagkamapaubsanon ug pagkamatarong, ug ang imong tuong kamot magatudlo kanimo sa mga butang makalilisang.”​—SALMO 45:4.

ANG magbabalak-mag-aawit maikagon nga mosugod sa iyang awit. Kusog kaayo ang pagdahom sa pag-abot sa usa ka maayong kagamhanan diha sa mga kamot sa dili-mahiphipan, matarong nga magmamando. Siya dili makahilom. Kay dili na makapugong sa iyang kaugalingon, ang salmista mipatugbaw niining mga pulonga: “Ang akong kasingkasing napalihok sa maayong butang. Ako nagaingon: ‘Ang akong mga buhat maoy mahitungod sa usa ka hari.’ Hinaot ang akong dila mahimong dagang sa usa ka mahanasong magkokopya.” (Salmo 45:1) Ang orihinal nga magbabalak-mag-aawit dugay nang patay. Apan ang iyang matagnaong awit buhi gihapon, ug ang gahom niini labi pang dako karon.​—Itandi ang Colosas 3:16.

1, 2. (a) Unsang mensahe ang nakapalipay sa salmista? (b) Nganong ang mao mismong mensahe magapalihok kanato?

² Unsa ang “maayong butang” nga nakapalihok sa kasingkasing sa salmista? Kini may kalabotan sa maayong balita sa Gingharian sa Diyos! “Maayo” kaayo ang mensahe sa Gingharian nga angayan kining “igawali sa tibuok gipuy-ang yuta ingong usa ka pamatuod sa tanang nasod” sa dili pa moabot “ang kataposan” niining mga nasora. (Mateo 24:14) Karong adlawa, ang “maayong” tema sa Mesiyanikong Gingharian sa Diyos nagpalihok ba sa imong kasingkasing? Angay. Ngano man? Kay ang Hebreohanong berbo nga gihubad “napalihok” (ra·chashʹ) nagkahulogang madasigong lihok, sama sa nagbolobolo, nagabukal nga tubig. Ang berbo nagkahulogan usab sa pagkabug-os. Ug hinumdomi, ang atong Pangulo, si Jesu-Kristo, miingon: “Gikan sa kadagaya sa kasingkasing, [ang] baba nagasulti.” (Lucas 6:45) Busa, ikaw ba, sama sa salmista, dunay kasingkasing nga nagaawas sa “maayong butang”? Kon mao, nan walay makapugong kanimo sa pag-awit niining kinalabwang kamatuoran: Si Jesu-Kristo nagamando sa Gingharian sa Diyos!

Pagpakaylap sa Awit sa Kamatuoran

³ Sa unsang paagi kining harianong awit makakaylap? Pinaagi sa balaang espiritu, ang dila sa salmista nahimong “dagang” diha sa mga kamot ni Jehova. (Itandi ang 2 Samuel 23:2.) Ang iyang sinulat nga mga pulong sa awit giawit aron madungog sa tanang karaang magsisimba ni Jehova. Kita karong adlawa makalaban sa kamatuoran sa Gingharian sa Diyos sa duha ka susamang paagi. Nahauna, pinaagi sa atong mga pulong nga madungog sa katilingbanong pagsangyaw ug, ikaduha, pinaagi sa atong mga pulong nga mabasa diha sa atong mga basahon. Busa, dihang atong ipanagtag ang gibase-sa-Bibliya nga mga basahon, kita nagapahayag sa gipamulong na sa dila sa dinasig nga mga tawong balaan. (2 Timoteo 3:16; 2 Pedro 1:20, 21) Ug karong adlawa ang pinatik nga mensahe sa Gingharian gisirkular sa dakong gidaghanon ug diha sa daghang pinulongan ug sa gikusgon nga wala mahanduraw sa salmista. Ikaw ba regular nga nagapakig-ambit sa pagpahayag niana, ilabina sa pagpanagtag sa mga magasing Bantayanang Torre ug Pagmata!?

4. (a) Sa unsang paagi si Kristo Jesus nahimong “matahom pa kay sa mga anak sa mga tawo”? (b) Sa unsang paagi ginasundog sa dinihogang magbalantay nga matang ang ‘grasya sa mga ngabil ni Kristo’?

⁴ Ang pagpatim-aw sa Hari ni Jehova nagdasig sa salmista sa pagsulat: “Ikaw matahom pa kay sa mga anak sa mga tawo. Ang grasya gibubo ibabaw sa imong mga ngabil. Tungod niana ang Diyos nagpanalangin kanimo sa panahong walay katinoan.” (Salmo 45:2) Sukad sa adlaw sa pagdihog kaniya sa espiritu sa Diyos, ang mga ngabil ni Jesus kanunay nagwali sa Gingharian, hangtod ang tawhanong mga ahente ni Satanas temporaryong nagpahilom kaniya. Tungod sa pagkamaunongon ni Jesus, siya gipanalanginan niadto ni Jehova sa walay kataposan pinaagi sa pagbanhaw kaniya gikan sa mga patay ug pagbayaw kaniya labaw sa tanang ubang linalang. (Filipos 2:8-11) Sukad sa langitnong paghimaya kang Jesus, sa dihang siya nahimong ‘ang tukmang hulagway sa pagkamao sa Diyos,’ siya matahom pa kay sa labing binayaw nga magmamando, tawhanon o manulondaanon. (Hebreohanon 1:3, 4) Karon, ingong naentronong Hari, si Jesus nagahatag ug gahom sa mga ngabil sa dinihogang ‘magbalantay’ nga matang ug sa ilang mga kauban sa pag-awit nga maisogon sa maayong balita sa Gingharian. Bisan pa niana, kini usab usa ka awit sa gubat.

5, 6. (a) Unsay ipasabot sa kang Kristo nga ‘pagkabayo sa kawsa sa kamatuoran’? (b) Sa unsang paagi gigamit sa magbalantay nga matang ang Bantayanang Torre ug Pagmata!?

⁵ Ang salmista sunod mitawag ngadto sa nagamandong Hari: “Ibakos ang imong pinuti diha sa imong paa, Oh kusganon, uban ang imong pagkahalangdon ug imong himaya. Ug sa imong himaya magpadayon ngadto sa kalamposan; magkabayo ka sa kawsa sa kamatuoran ug sa pagkamapaubsanon ug sa pagkamatarong, ug ang imong tuong kamot magatudlo kanimo sa mga butang makalilisang.” (Salmo 45:3, 4) Sukad sa 1914 si Kristo nagakabayo sa kabayong iggugubat, nga andam alang sa aksiyon. (Pinadayag 6:1, 2) Siya nasangkapan sa usa ka pinuti​—ang simbolo sa gubat ug sa awtoridad usab ug sa gahom gikan sa Diyos aron sa paglaglag sa masupakong mga nasod. Si Kristo nakiggubat na kang Satanas ug sa iyang mga demonyo, nga nagtambog kanila gikan sa mga langit ug naglimite kanila nganhi sa silinganan sa yuta.​—Pinadayag 12:1-13.

⁶ Ugaling, sa dili pa ipasig-uli ang kalinaw, ang mga butang labi pang makalilisang kay niini igapahinabo sa tuong kamot sa Hari sa dihang siya ‘magkabayo tungod sa kamatuoran’ panahon sa Armageddon aron sa paglaglag sa tanang kaaway sa Diyos sa yuta. (Salmo 45:4; Pinadayag 16:14, 16; 19:17, 18) Si Kristo nagpaisog sa dinihogang magbalantay nga matang sa pag-awit usab niining pasidaana. Unsay gigamit sa “magbalantay” sa pagpadako sa iyang tingog? Sa panguna ang mga panid sa magasing Bantayanang Torre​—ang magasing ilado sa pagpahayag sa natukod nga Gingharian ni Jehova. Ang magbalantay nga matang, sama sa usa ka panon sa mopaak nga mga tanga-dulon, nahupong sa samang espiritu nga nagatukmod kang Kristo sa “pagkabayo tungod sa kamatuoran.” (Pinadayag 9:7-11) Sa epektibong paagi, sila nagagamit sa mga magasin nga giandam ilalom sa pagdumala sa “magbalantay”​—Ang Bantayanang Torre ug Pagmata!​—“tungod sa kamatuoran.”​—Mateo 24:45; itandi ang Pinadayag 9:16-19.

‘Pagkabayo Dapig sa Kamatuoran’

7. Sa unsang agresibong paagi ang mga magasing Bantayanang Torre ug Pagmata! nagapasiugda sa kamatuoran sa Bibliya?

⁷ Sulod sa kapin sa usa ka gatos ka tuig, ang Bantayanang Torre nagalaban sa ‘kawsa sa kamatuoran sa Gingharian.’ Kini mahanasong nagagamit sa Pulong sa Diyos ingong pinuti sa paglaksi sa mga hut-ong sa kasaypanan nga naglimin sa bakak relihiyosong mga pagtulon-an. (Itandi ang Efeso 6:17; Hebreohanon 4:12.) Ang magasing Pagmata! nagapasiugda usab sa kawsa sa kamatuoran. Kon mahitungod sa mga panghitabo karon, ang Pagmata! nagalaslas sa tabil nga nagtabon sa nagatamay-sa-Bibliya siyentipikanhong mga teoriya ug sa peligrosong sosyal ug moral nga mga hilig. Unsay atong mahimo sa pagpahimutang niining mga magasina diha sa mga kamot sa daghan pang katawhan aron sila makadungog sa moluwas-kinabuhing mensahe sa Gingharian?

8, 9. Sa unsang paagi ang pagpadapat sa prinsipyo sa Efeso 5:16 nganha sa pagbasa sa Bantayanang Torre ug Pagmata! makatabang kanimo nga “mapalihok” sa pag-apil sa pagsangyaw uban sa magasin? Paghatag ug mga panig-ingnan.

⁸ Ang tanang nahigugma sa kamatuoran angay “mapalihok” tungod sa mensahe nga nasulod sa mga magasing Bantayanang Torre ug Pagmata! (Salmo 45:1) Sa unsang paagi? Nganong dili nimo sila basahon inigkadawat nimo niana nila? ‘Dili ko mobasag sekular nga magasin o libro hangtod mabasa nakog una ang atong mga magasin,’ si Lillian miingon sa iyang kaugalingon napulo ka tuig kanhi. Siya nagatuman gihapon sa maong hukom. (Mateo 6:33) Unsay imong mahimo tapos sa imong pagbasa niana nila? Ipakigsulti ang sulod niana nila sa uban​—sa pamilya ug kaubang membro sa kongregasyon. Kini angay magdasig usab kanimo sa kadasig sa pagsangyaw uban sa mga magasin aron makapahayag ka sa imong mga silingan mahitungod sa maayong mga butang imong nabasa. Pihong buot nimong makig-ambit sa pagtanyag sa magasin diha sa pagsangyaw, nga magdala kanila ngadto sa mga balay sa mga silingan. Kini ikatandi sa paagi nga si apostol Pablo “bug-os nagpamatuod.”​—Buhat 20:20, 21.

⁹ Si Peter ug ang iyang asawang si Petra nagaalagad ingong mga misyonaryo sa usa ka Aprikanhong nasod sulod na sa miaging upat ka tuig. Ang mga magasing Bantayanang Torre ug Pagmata! maoy usa sa ilang pangunang mga tinubdan sa espirituwal nga kabaskog. “Ang Bantayanang Torre nagatabang kanamo nga magpabiling igmat sa espirituwal diha sa among teritoryo,” matud ni Petra. “Kami nagakuhag pagdasig ug kusog gikan sa matag isyu sa Ang Bantayanang Torre ug Pagmata!,” midugang si Peter, “ug inig-abot sa mga magasin, alang kanamo kana maorag among nadawat ang usa ka sulat gikan sa balay.” (Itandi ang Salmo 46:1.) Nabatonan ba nimo ang samang dulot nga pagpabili sa atong mga magasin ug maikagon ka bang mobasa kanila sama kang Peter ug Petra? Kanang matanga sa espiritu modasig kanimo sa pagtanyag nga regular sa mga magasin sa uban aron sila makabasa usab.

10. Unsang matang sa tinamdan ang gikinahanglan alang sa epektibong pagsangyaw uban sa magasin, ug unsang mga kaayohan ang ikapatungha niini?

¹⁰ Ang mga magmamantala sa Gingharian angay magbaton ug positibong tinamdan bahin sa pagsangyaw uban ang magasin. Ang mga tawo nga sinsero sa relihiyon mahinangop gihapon sa gibase-sa-Bibliya nga impormasyong nasulod sa atong mga magasin. (Itandi ang Buhat 10:15, 30-33.) Ngano? Tungod kay sila dili makakuha niana gikan sa ubang tinubdan. Kapin sa 45 anyos kanhi sa Sweden, si Lars nakabaton sa usa ka pundok sa mga magasing Bantayanang Torre gikan sa usa ka empliyado. “Makataronganon kini,” iyang giingnan ang iyang asawa tapos sa pagbasa niana nila. “Ang ginasulti sa Bibliya, ginasulti sa Ang Bantayanang Torre.” Ang nabasa ni Lars nagtukmod kaniya ngadto sa bawtismo​—Marso 1940. Palandonga ang laing panig-ingnan. Duha ka payunir nga ministro gikan sa habagatang Tinipong Bansa miingon:

“Ang usa ka babaye nahibalag sa buluhatong pagmagasin. Siya ang tesorera sa usa ka dakong Baptist nga simbahan ug usa usab ka seryoso kaayong estudyante sa Bibliya. Sa iyang nabasa ang serye bahin sa temang Armageddon sa mga isyu sa Bantayanang Torre sa Enero 1 ngadto Pebrero 15, 1985, siya nalipay. Sa nangagi siya nakagugol ug daghang oras sa pagdukiduki sa maong ulohan ug walay resulta gawas sa kasulatang makita sa Pinadayag 16:16. Siya nangutana sa iyang ministro: ‘Unsa ba ang Armageddon? Makasaysay ka ba niana?’ Siya mitan-aw kaniya ug miingon, ‘Kana lalom nga ulohan,’ ug dayon milakaw. Siya nag-ingon nga ang Bantayanang Torre, sa laing bahin, nagtubag sa tanan niyang pangutana ug kadto ang bugtong tinubdan nga iyang nakaplagan uban sa kinahanglanong mga kasulatan bahin sa ulohang Armageddon.”

11. (a) Nganong ieskedyul ang pagsangyaw uban sa magasin, ug unsa ka subsob? (b) Ang pagsangyaw uban sa magasin makatabang ba sa buluhaton sa pagtuon sa Bibliya? Ipatin-aw. (c) Sa unsang paagi ikaw makapahimutang sa Bantayanang Torre ug Pagmata!? Tan-awa ang kahon.

¹¹ Makaeskedyul ka ba labing menos usa ka adlaw alang sa buluhatong pagmagasin sa kada semana, nga magahimo niini nga bahin sa naandan nimong kalihokang espirituwal? (Itandi ang Filipos 3:16.) “Ang mga magmamantala, ug mga payunir usab, wala magagugol ug igong panahon sa buluhaton sa magasin,” mipahayag ang sangang buhatan sa Watch Tower Society sa Nigeria. Apan angay bang ang pagsangyaw uban sa magasin karon maglandong sa buluhatong paghimog disipulo? Sa kaatbang, ang mga taho gikan sa mga sangang buhatan sa Sosyedad sa Australia ug Brazil nagapakitang ang pagpahimutang ug mga magasin mamahimong pangunang lakang sa pagpasugod sa daghang pagtuon sa Bibliya. “Gikan sa akong unang mga napahimutang nga magasin, nasugdan ang tulo ka pagtuon,” matud sa usa ka Australianong igsoong babaye. Sa unsang paagi makaarang ka sa pagpahimutang ug mga magasin nga mahimong motultol sa usa ka pagtuon sa Bibliya? Tan-awa ang kahon nga nag-ulohang “Pagpahimutang sa mga Magasin” alang sa mga sugyot.

Nakasulay Ka ba sa Maong mga Sugyot?

12. Unsang mga sugyot ang nakitang mapuslanon alang sa usa ka magmamantala?

¹² Ang Atong Ministeryo sa Gingharian sa Mayo 1984, may upat ka panid nga pasukip bahin sa pagsangyaw uban sa magasin. Nakasulay ka ba sa mga sugyot nga gihatag niana? Ang mga magmamantala sa Gingharian maayong magbasa pag-usab sa maong pasukip ug ipadapat ang tambag niana sa pagsangyaw sa kanataran. Usa ka igsoong babaye sa Tinipong Bansa naghimo niana; ang mga resulta nakapahimuot ug nakapahibulong kaniya. Siya misulat:

“Akong gipadapat ang mga punto nga gilaraw sa Mayo 1984 nga pasukip sa Ministeryo sa Gingharian bahin sa pagpahimutang sa mga magasin, ug kini malamposon! Sa kataposan sa 1983 ako nakapahimutang lamang ug 36 ka magasin sa tibuok tuig! Ako masulob-on, dili tungod sa mga numero sa taho, apan tungod kay ako napakyas sa pagpaabot sa maong mohatag-kinabuhing impormasyon ngadto sa mga kamot sa mga tawong nagkinahanglan niana. Ako miampo kang Jehova mahitungod niana ug mihukom nga labaw pang maningkamot sa pagpahimutang sa Bantayanang Torre ug Pagmata! Akong gigamit ang mga sugyot mahitungod sa pagbutang ug personal nga tumong alang sa mga mapahimutang nga magasin, nga mogamit ug mubo nga presentasyon nga magpasiugda sa usa lamang ka magasin, nga regular mogawas sa pagsangyaw sa kanataran sa adlaw sa pagmagasin, ug pagbatog positibong tinamdan. Karon sa dihang mobalibad ang tagbalay sa regular nga tanyag, ako moingon: ‘Aw, kon maohon ibilin ko lamang kanimo ang kinaulahiang mga isyu sa Ang Bantayanang Torre ug Pagmata! sa 40 cents.’ Kining mga puntoha mosaler. Sa miaging upat ka bulan, ako nakaaberids ug 14 ka magasin sa matag bulan!”

13. Unsang tambag nga gipatik sa 1888 ang praktikal gihapon karong adlawa?

¹³ Sa Disyembre 1888 nga isyu sa Zion’s Watch Tower, ubos sa ulohang “Usa ka Sugyot Ngadto sa mga Mangangani,” kining tambaga gihatag: “Ang labing dakong kalisdanan sa bahin sa daghan maorag mao nga, kay ang ilang mga kasingkasing puno kaayo sa maayong balita, sila matental sa pagsultig daghan kaayo mahitungod sa Plano sa Diyos.” Kanang tambaga mapadapat pa ba? Sa gipangutana kon unsay mahimo sa mga magmamantala sa pagpauswag sa mapahimutang nga mga magasin, ang usa ka magtatan-aw sa sirkito sa Pransiya mitubag: “Muboa ang presentasyon. Mahimong deretso sa punto.”

14, 15. Sa unsang paagi ang mga hulagway sa Bantayanang Torre ug Pagmata! gamiton sa pagsangyaw? Paghatag ug mga panig-ingnan.

¹⁴ Sa daghan sa mga pinulongan nga niana ginapatik ang mga magasin, ang matahom nga mga ilustrasyon diha sa upat ka kolor nakadugang sa pagkamadanihon sa mensahe sa Gingharian samtang kini makaabot sa nagkalainlaing matang sa mga tawo. Sa Enero 8, 1987 nga isyu, ang Awake! miduyog sa The Watchtower sa pagkaimprenta diha sa upat ka kolor sa kadaghanang dagkong pinulongan. Nakagamit ka ba sa mga ilustrasyon ug mga hulagway diha sa mga magasin ingong mga puntong igsusulti? Daghan ang nakasulay, uban ang maayong sangpotanan. Si Theresa, usa ka misyonaryo sa Halayong Silangan sukad sa 1976, nakasulay niana. Siya nagapanagtag ug 260 ka magasin sa usa ka bulan. “Akong gamiton ang mga hulagway sa pagpasiugda sa pangunang punto sa akong presentasyon,” matud niya. “Sa daghang panahon ako lamang ipakita ang hapin ngadto sa tagbalay ug hisgotan ang topiko, ug ang magasin halos mapahimutang sa kaugalingon.”

¹⁵ Si Kay, usa ka misyonaryo sa nasod sa Suriname, may susamang kasinatian. Siya ug ang iyang bana tua didto sulod sa diyes anyos, ug ilang nakitang epektibo kaayo ang mga hulagway sa dihang magasangyaw, ilabina niadtong sakop sa Hindu nga pagtuo. Ngano? Si Kay mipatin-aw:

“Ang Hindu nga relihiyon maoy usa ka relihiyon sa hulagway. Sa usa ka balay, akong gipangutana ang usa ka babaye: ‘Mahimo bang masayran ang ngalan sa inyong mga diyos diha sa inyong mga hulagway.’

“‘Kini siya si Shiva,’ mitubag siya.

“‘Aw, kinsa man ang labaw nga diyos?’ ako sunod nangutana. Walay tubag. ‘Mahimo bang atong basahon ang Jeremias 10:10-12? Kinsa ang Diyos nga makaangkong mao ang Maglalalang? Si Jehova lamang. Kami nahibalong gusto mog mga hulagway. Dili ba kining mga hulagwaya sa Ang Bantayanang Torre ug Pagmata! matahom ug makaiikag? Dili ba nimo gustong masayran kon unsay kahulogan niini?’”

Nganong dili sulayan ang paglanggikit sa mga hulagway sa inyong estoryahay sa sunod panahong ikaw magasangyaw uban sa magasin?

¹⁶ Samtang nag-alagad sa Hong Kong, si Gene nag-aberids ug kapin sa 300 ka magasing mapahimutang kada bulan. Giunsa niya paghimo kadto? Siya misaysay:

“Una, pag-ampo alang sa panalangin ni Jehova diha sa imong pagsangyaw uban ang magasin. Ikaduha, magmapositibo, mapahiyomon, ug mahigalaon. Ikatulo, magmapailin-ilinon ug mahimong mauyonon, ug mangitag butang gikauyonan uban sa tagbalay. Ikaupat, pagpedidog igong magasin alang sa tibuok bulan. Ako may dakong pedido, sanglit kini nagahatag kanakog ekstrang panukmod. Ikalima, paggahin ug usa ka gabii sa usa ka semana alang sa buluhaton sa magasin, sanglit mas daghang tawo ang anaa sa balay sa maong panahon ug relaks ang pangisip. Ikaunom, sugdi ang ruta sa magasin, bisan pag kana diyutay ra.”

Sa Unsang Paagi Makasugod Ka sa Usa ka Ruta sa Magasin?

17. (a) Sa unsang bahin sa atong pagsangyaw uban sa magasin nga ikapadapat ang Buhat 15:36? (b) Sa kanasoran nga dili maayo ang serbisyo sa koreyo, unsa ang usa ka paagi nga ang mga magmamantala makapahimutang ug mga magasin?

¹⁷ “Ang paghupot ug tukmang mga rekord kon diin napahimutang ang mga magasin ug unya pagbalikduaw sa regular maoy usa ka paagi sa pagpauswag sa mapanagtag nga magasin,” matud ni Ollie, kinsa nagaalagad sa Aprikanhong nasod sa Burkina Faso. “Ako may 15 ka tawo sa akong ruta sa magasin. Sanglit ang Burkina Faso maoy sangang buhatan nga walay imprentahan ug dili piho ang paghatod sa sulat, ang mga Saksi kadaghanan magdawat sa ilang mga magasin alang sa pagpanagtag nga hugponghugpong, tingali upat o lima ka isyu sa usa ka panahon.” Matuod ba usab kana sa inyong nasod? Kon mao, unsay mahimo sa pagbuntog niining hagita sa pagpahimutang sa magasin? “Makakupot kag mga kopya sa matag isyu sa imong mga kamot ug paabanikohon ang mga magasin ug papilia ang tawong interesado sa usang buot niyang basahon,” misugyot si Ollie. “Kasagaran, iyang kuhaon kanang tanan.”

‘Padayong Mapalihok sa Maayong Butang’

18. Unsang mga bahin sa bag-ong mga taho sa pagsangyaw sa kanataran ang dalayegon ilabina, ug sa unsa kita makahatag ug labaw nga pagtagad?

¹⁸ Kamong mga magmamantala sa Gingharian nakatabang sa pagpauswag pag-ayo sa gidaghanon sa mga suskrisyong nabatonan sa duha ka magasin. Kamo pagadayegon tungod sa inyong kadasig sa pagpakaylap sa maayong balita niining paagiha. Dalayegon usab ang pag-uswag sa katibuk-ang gidaghanon sa mga magasin nga napahimutang. Hinuon, basin kita makahatag ug dugang pagtagad sa atong indibiduwal nga mapahimutang nga magasin. Tungod sa labi pang bug-os nga pagkobre sa teritoryo, mius-os ang mapahimutang nga magasin sa matag magmamantala. Sanglit kita nagakinabuhi sa halalom sa panahon sa kataposan, kita ba labi pang ‘mapalihok sa maayong butang’ sa Gingharian pinaagi sa pagsangyaw uban sa magasin?​—Salmo 45:1; 1 Pedro 4:7.

19. Sa unsang duha ka paagi kita makalaban sa kamatuoran sa Gingharian?

¹⁹ Si Kristo sa Gingharianong kahimayaan nagakabayo paingon sa kalamposan sa pagbalaan sa balaang ngalan sa iyang Amahan ug pagbayaw sa Iyang unibersohanong pagkasoberano. (Pinadayag 6:2) Atong gamiton ang atong mga dila ug ang pinatik nga panid sa pagpahayag sa iyang pag-abot. Hinaot kita sa pagkamaunongon magpatugbaw sa atong mga tingog uban sa dinihogang magbalantay nga matang samtang kini moduyog kang Kristo sa paglaban sa kamatuoran sa natukod nga Mesiyanikong Gingharian sa Diyos. Oo, atong ipanagtag nga kaylap ang Bantayanang Torre ug Pagmata!​—mga magasin nga magatuman sa bililhong papel samtang ang atong Hari ‘magakabayo sa kawsa sa kamatuoran.’​—Salmo 45:4.

Nahinumdom Ka Ba?

◻ Unsa ang “maayong butang” nga magapalihok sa imong kasingkasing?

◻ Ang kang Kristo nga ‘pagkabayo sa kawsa sa kamatuoran’ mopatunghag unsang sangpotanan?

◻ Sa unsang diwa ang Bantayanang Torre ug Pagmata! nagaalagad sa “kawsa sa kamatuoran?”

◻ Sa unsang paagi kita makahatag ug labaw nga pagtagad sa pagsangyaw uban sa magasin?

3. Unsang duha ka pangunang paagi ang gigamit sa pagpakaylap sa maayong balita sa Gingharian karong adlawa?

16. Unsang mga sugyot gikan sa usa ka magmamantala sa Hong Kong ang tingali imong makaplagang mapuslanon?

[Kahon/Letrato sa panid 18]

PAGPAHIMUTANG SA MGA MAGASIN

Nakasulay Ka Ba?—

◆ Balay-balay nga pagsangyaw

◆ Pagsangyaw sa kadalanan

◆ Pagsangyaw sa mga dapit sa negosyo

◆ Pagsangyaw sa ruta sa magasin

◆ Pagsangyaw sa magabii

◆ Dihang balibaran ang tanyag nga libro

◆ Dihang magahimog mga balikduaw

◆ Magaduaw sa kanhing mga estudyante sa Bibliya

◆ Dihang magabiyahe o magapamalit

◆ Dihang makigsulti sa mga paryente, mga kauban sa trabaho, mga silingan, mga kauban sa tunghaan, o mga magtutudlo