Mga Batan-on Nangutana. . .

Sa Unsang Paagi Mabuntog Ko ang Bisyo sa Masturbasyon?

“ANG akong sinumbagan dili ingon nga nagabatibatig sumbag sa hangin,” misulat ang Kristohanong apostol Pablo. (1 Corinto 9:26) Gipakasama niya sa bangga sa boksing ang pakigbisog sa pagpugong sa iyang mga tinguha. Ang boksingero kansang sinumbagan makaigo lamang sa hangin sa taudtaod mapildi sa away. Busa, aron malamposong makigbugno sa bisyo sa masturbasyon, ang usa ka tawo kinahanglang masayod kon unsaon sa pagpuntiriya sa iyang paningkamot, o “mga sumbag.”a

“Andama ang Imong Hunahuna sa Paglihok”

Ang bugno batok sa masturbasyon ginabugno diha sa atong kaisipan. Busa, ang Bibliya nagasugyot: “Andama ang inyong mga hunahuna sa paglihok; magmapugnganon sa kaugalingon.” (1 Pedro 1:13, New International Version) Pananglitan, basin duna kitay makita nga makapagana sa sekso. Ang kaisipan makiling nga palandongon kanang mga hunahunaa ug moturok ang mainitong pagbati. (Mateo 5:28) Kon mahitabo kana, ang atong mga lawas makiling ngadto sa seksuwal nga buhat. Kon ang atong mga kaisipan magdugay sa pagpalandong nianang daotang hunahuna, kining kinaiyahan sa lawas mouswag ngadto sa tag-as pang mga ang-ang sa kahinam. Sa kataposan, ang lebel sa pagkapukaw mahimong mosangko sa masturbasyon. Apan ang kaisipan kinahanglang manlimbasog ug maghikling sa imoral nga hunahuna. Kon kini himoon, nan ang pagkapukaw sa dili madugay maawop ug mahuwas ang kagil-as tungod sa kahigwaos sa lawas.

Hinuon, ang paghikling sa daotang mga hunahuna lisod ilabina kon nagainusara sa magabii. Ang usa ka 17-anyos nga batang lalaki sa ingon misaysay kon unsang mga lakang ang iyang ginahimo: “Una sa tanan, maningkamot ako sa ‘pag-ilis sa ulohan’ aron ang akong kaisipan dili maghunahuna sa butang makapagana. Gawas pa, ang pag-amgo nga ang mga agda sa kadugayan maawop ra makapasayon niana.” “Ang pag-ilis sa ulohan” tingali magkinahanglan dili lamang sa paningkamot sa kaisipan. Midugang ang usa ka babayeng batan-on: “Ang labing maayong buhaton mao ang pagtimbukawas dayon ug mapuliki sa usa ka matang sa trabaho, tingali magmerienda, aron ang imong hunahuna moliso sa ubang butang.” Oo, pugsa ang imong kaugalingon sa ‘pagpadayon sa pagpalandong sa mga butang ugdang, matarong, maputli, hiligugmaon, maayong pamation, halangdon, ug dalayegon.’—Filipos 4:8.

Kon maglisod ka sa pagkatulog, paningkamoti ang pagsundog sa matinumanong si Haring David, kinsa misulat: “Sa diha nga mahinumdom ako kanimo [Diyos] sa akong higdaanan, sa mga pagtukaw sa kagabhion ako nagapalandong kanimo.” (Salmo 63:6) Ang pagpugos sa atong mga kaisipan sa pagpalandong sa Diyos ug sa iyang mga hiyas kasagaran magsumpo sa atraksiyon. “Kamong mga nahigugma kang Jehova, dumti ang daotan,” misulat ang salmista. (Salmo 97:10) Dili sayon ang pagdumot sa usa ka bisyo nga mohatag ug temporaryong unodnong kalipayan, apan padayon sa pagpalandong kon unsay pag-isip sa Diyos niining mahugawng bisyo. Ugaling, kinahanglan usab nga ikaw . . .

Mohimog Magasanta nga mga Lakang

“Masinaboton ang usa nga nakakita sa katalagman ug magtago sa iyang kaugalingon, apan ang walay kasinatian miagi ug magaantos sa silot,” misulat ang dinasig nga tawong maalamon. (Proverbio 22:3) Sumala sa orihinal Hebreohanong pulong ang “shrewd” o “masinaboton” niining kasoha nagkahulogan “kaabtik, pagkadali sa hunahuna o salabotan.” Ang ingong tawo nagahunahunang abante ug nasayod kon unsay makapagrabe sa usa ka situwasyon. Busa, kon makadiskobre ka nga ang pila ka kalihokan, mga matang sa sinina, o mga pagkaon makapalihok sa imong gana sa sekso, nan likayi gayod kana.b Likayi sama sa hampak ang bisan unsang balasahon, mga programa sa TV, o mga sine nga may mahilayong mga tema. Ampingi kon unsay ginatan-aw sa imong mga mata. “Ilikay ang akong mga mata gikan sa pagtan-aw sa butang walay kapuslanan,” miampo ang salmista. (Salmo 119:37) Ang maong unodnong mga talan-awon mapondo sa imong hunahuna ug kadaghanan mopaibabaw kon ikaw nagainusara.

Kinahanglan ilabina ang paghimog mga lakang sa ‘pagtago sa imong kaugalingon’ gikan sa umaabot nga mga suliran kon ikaw nasakit sa emosyon o luya, tingali naguol. “Ikaw ba nawad-ag kadasig sa adlaw sa kasakitan? Ang imong kusog diyutay ra,” nagapasidaan ang Proverbio 24:10. Kay nahibalong sa maong mga panahon menos, o “diyutay” ang imong resistensiya, sulayi ang paghikay sa imong mga kalihokan kutob sa mahimo nga malikayan ang pag-inusara sa tagdugayng mga panahon. Planoha ang bug-os nga eskedyul sa makapalig-ong mga kalihokan nga malangkit ang imong hunahuna sa mahagitong mga buluhaton, nga hatagan kanag gamayng higayon nga moliso ngadto sa imoral nga mga hunahuna. Unya magbantay ilabina kon unsang butang ang tugotan nimong mosulod sa imong hunahuna. Ang usa ka babaye kansang mga pagbati mas kusog sa tinong mga panahon sa bulan angay usab mogamit sa praktikal nga kaalam sa pagsagubang sa dugang mga suliran.

Bisan tuod makatabang ang pagpadapat sa nahaunang mga sugyot, ang kadaghanang tawo nga malamposong nakabugno niining daotang bisyo nakadiskobre nga ang tinuod nga solusyon nakagamot sa lig-on espirituwal nga pag-atake.

Espirituwal nga Pag-atake

Usa ka 27-anyos nga lalaki nga nakigbisog sa bisyo sukad nga siya 11 anyos nagmadaogon sa kataposan. Sa unsang paagi? Una sa tanan, nag-amping siya sa paglikay sa pornograpiya. “Unya kadto maoy pag-atake pinaagi sa paggamit sa tanan kong espirituwal nga himan,” siya misaysay. “Gibasa ko ang Bibliya, labing menos duha ka kapitulo sa kada adlaw nga walay laktaw.” Gibuhat niya kining walay pakyas sa tulo ka tuig.

Ang ubang Kristohanon nga naglisod sa pagbuntog niining bisyoha miangkon nga ang ilang nagkamenos personal nga pagtuon sa Pulong sa Diyos tinong usa ka hinungdang nakaamot. “Sa usa ka yugto, nagbaton ako sa kusog kaayong tinguha sa pagbuhat sa masturbasyon,” mitaho ang usa ka Kristohanon kansang suliran sa masturbasyon nagpadayon tapos sa pagminyo. “Diha ang pagpiot gikan sa akong trabaho ug gikan sa daghan pang ubang butang nga nagsugod pagkadaot ang personal kong pagtuon. Nakaamgo ako nga gikinahanglan ang dugang pagtuon. Kadto nakatabang, ug salamat nga nasumpo nako ang tinguha nga wala nay pagsugmat.”

“Ang pagbaton ug daghang buluhaton sa Ginoo,” sama sa buluhaton sa pagtudlo sa uban sa Bibliya, makatabang usab. (1 Corinto 15:58) Usa ka babayeng nakabuntog sa masturbasyon miingon: “Usa ka butang nga karon nagatabang gayod kanako sa paglikay sa maong bisyo mao nga ingong bug-os-panahong ebanghelista ang akong hunahuna ug kusog tanan natumong sa pagtabang sa uban nga makabatog inuyonang relasyon uban sa Diyos.”

Sa kataposan, sa pagtabang nga mahuptan ang pagpugong-sa-kaugalingon sa magabii, usa ka Kristohanon nagtambag: “Sa dili pa matulog, pagbasa sa butang maylabot sa espirituwal. Importante kaayo nga ang kataposang mahunahuna sa adlaw mao ang espirituwal. Ang pag-ampo sa maong panahon makatabang usab kaayo.”

Ang Hinungdanong Bahin sa Pag-ampo

Oo, ang malamposong pagbugno niining daotang bisyo nagakinahanglag “gahom nga labaw sa kasagaran.” Kini nagagikan sa Diyos. (2 Corinto 4:7) Pinaagi sa kinasingkasing nga mga pag-ampo, makahangyo ka sa Diyos alang niining gahoma. “Sa iyang [Diyos] atubangan ibubo ang inyong kasingkasing,” misulat ang salmista. (Salmo 62:8) Ang Diyos nagasaad nga kadtong nagaduol kaniya uban ang “kagawasan sa panulti” makakaplag nga iyang ihatag kanila “ang tabang sa hustong panahon.” (Hebreohanon 4:16) Usa ka batan-ong Kristohanong babaye nga gisamok sa maong bisyo mitaho: “Ang pag-ampo maoy dihadihang torre sa kusog. Ang pag-ampo sa panahong motungha ang tinguha tinong makatabang.” Gawas pa, sa pagbangon ug sa tibuok adlaw, ipahayag ang imong hukom ngadto sa Diyos ug hangyoa ang iyang makapalig-on nga balaang espiritu.—Lucas 11:13.

Ang sinserong mga pag-ampo mopasuod kanimo sa Diyos, ug unya ang Diyos mahimong tinuod kaayo ug personal nga Magtatabang. Kinahanglanon nga palandongon ang imong pakighigala sa Diyos ug pagtinguha nga huptang padayon ang “kagawasan sa panulti.” Hinuon, may panahong ang usa ka tawo mopugong sa pag-ampo tingali tungod sa kaulaw o tungod kay ang siya ganahan kaayo sa pagkapukaw sa sekso nga dili niya buot moundang. Kana ang panahong ang maong mga pagbati pagasuklan. Ang Bibliya nagaingon: “Magmalahutayon kamo sa pag-ampo.” Pinaagi sa pagpangaliyupo sa Diyos—nga mangayo sa tabang nianang gutloa—kasagarang hidiskobrehan sa usa ka tawo nga mahanaw ang daotang agda.—Roma 12:12.

Tabang Gikan sa Uban

Kon dili molampos ang imong personal nga paningkamot ug buot gayod nimong modaog, nan pakigsulti sa usa nga makatabang, sama sa usa ka ginikanan, o usa ka tawong sa espirituwal kuwalipikado. Usa ka batan-ong lalaki nga nagkapildi sa iyang pakigbisog sa masturbasyon nahidangat sa punto nga nawad-an sa bug-os sa paglaom. “Nakigsulti akong pribado sa akong amahan usa ka gabii bahin niana,” nagpadayag siya. “Gipugos ko gayod ang akong kaugalingon sa pagtug-an kaniya. Naghilak ako samtang nagtug-an kaniya, ako naulaw kaayo. Apan dili ko gayod hikalimtan ang iyang gisulti. Uban ang mapasaligong pahiyom sa iyang nawong, siya miingon: ‘Ikaw naghimo kanakong magarbohon kaayo kanimo.’ Nasayod siya kon unsay akong giagian aron mahidangat nianang puntoha. Walay mga pulong ang labawng nakadasig ug nakapadeterminado kanako.

“Unya gipakita kanako sa akong amahan ang pila ka kasulatan sa pagtabang nako sa pagsabot nga ako wala pa ‘mahilayo kaayo,’” nagpadayon ang batan-on, “ug unya sa dugang pang kasulatan sa pagtino nga ako nakasabot sa kaseryoso sa akong daotang buhat. Miingon siya nga ‘himoong hinlo ang papel’ hangtod sa usa ka tinong panahon, ug unya kana among hisgotan pag-usab. Giingnan niya ako dili ako maguol sa labihan kon mosugmat, nga palabyon ang taastaas nga panahon nga dili magpadaog sa sunod panahon.” Sa pagkabuntog sa bug-os sa suliran, ang batan-ong lalaki midugang: “Labi pang nakahatag nakog kaayohan ang pagkadunay laing tawo nga nasayod sa akong suliran ug nagtabang kanako.”

Ang pagpatabang sa usa ka ansiano sa Kristohanong kongregasyon nakatabang usab ug dako sa daghan. Ang mga babayeng gil-asang makighisgot sa pribadong mga suliran uban sa usa ka lalaki kasagarang nakadiskobre nga makatabang nga mosugid ngadto sa usa ka hamtong Kristohanong babaye. (Tito 2:3, 4) Ang makatabang nga kahibalo sa maong mga tawo makadugang sa imong kaugalingong paningkamot sa pagbugno sa malamposong bugno batok sa masturbasyon. Pagkatinuod ang proverbio sa Bibliya: “Ang usa ka lalaki [o babaye] sa kahibalo nagadugang sa gahom. Kay pinaagi sa mahanasong pagtultol inyong ipadayon ang inyong pakig-away, ug sa kapid-ang magtatambag adunay kaluwasan”!—Proverbio 24:5, 6.

Pagsagubang sa Pagkabughat

Tapos sa paghago nga mabuntog ang bisyo, usa ka batan-on nakaagom sa pagkabughat. Miangkon siya: “Kadto nahisamag ako gidat-ogan sa bug-at nga karga. Gibati ko ang kawalay-pulos. Unya ako nangatarongan: ‘Sobra na ang akong nabuhat. Wala na kanako ang pag-uyon ni Jehova, busa nganong lisdon ko ang akong kaugalingon?’” Bisan pa niana, ang pagkabughat wala magkahulogang ang usa napildi na sa bugno. Usa ka 19-anyos nga babaye nga nakigbisog sa bisyo sulod sa lima ka tuig misaysay: “Sa sinugdan kadto nahitabo kada gabii, apan unya ako misugod sa pagsalig kang Jehova sa dugang, ug sa tabang sa iyang espiritu ako karon mapakyas tingali sa unom lang ka beses sa usa ka tuig. Daotan kaayo ang akong bation tapos niana, apan matag panahong mapakyas ako, inig-abot sa sunod nga tentasyon, ako mas malig-on.” Busa sa inanay nagmadaogon siya sa iyang pakigbugno.

Kon mahitabo ang pagkabughat, analisaha kon unsay mitultol niana. Usa ka batan-on, sa dihang siya nabughat, miangkon: “Moampo ako nga pasayloon ako, ug akong sublion kon unsay akong gibasa o gipalandong. Sa halos tanang panahon ako makapunting sa hinungdan nganong ako nahidakin-as. Sa maong paagi ako makahunong sa pagbuhat niana ug tul-iron kana.” Pinaagi sa pagsusi sa kasubsob sa mga pagkabughat, ang indibiduwal makasubay sa iyang pag-uswag.

Ang mga Balos sa Maayong Pakigbugno

Sa dihang sa kataposan nabuntog niya ang masturbasyon, usa ka batan-ong lalaki miingon: “Nahisamag gikuha ang bug-at kaayong palas-anon.” Ang laing Kristohanong batan-on mitaho: “Sukad nga nabuntog ang suliran, ako nakabaton ug mahinlong konsensiya sa atubangan ni Jehova, ug kana dili nako ibaylo sa bisan unsa!”

Oo, ang usa ka maayong konsensiya, naarang-arang nga pagsabot sa personal nga katakos, mas maayong paggamit sa imong panahon ug emosyonal nga kusog, pagkadili lagmit makahimog seksuwal nga imoralidad, ug mas suod nga relasyon uban sa Diyos ngatanan maoy mga balos sa usa ka maayong bugno batok sa masturbasyon. “Karon nasinati ko ang dakong kalipay kay akong gibati nga ‘makakontrolar’ sa akong kaugalingon tapos sa hataas kaayong pakigbisog sa akong kaugalingon,” mipahayag ang usa ka batan-ong babaye nga nag-isip sa iyang kaugalingon nga “nagiyan” sa masturbasyon. “Karon nasayod ako sa bili sa pagdumot sa ginadumtan ni Jehova. Ang labing dakong tabang mao ang pagpalandong sa akong relasyon uban kaniya. Nasabtan ko nga binuang kaayo nga tugotang ang masturbasyon magdaot sa labing mapuslanong relasyon nga sukad akong naangkon. Tuohi ako, ang pagkadaog batok niining bisyoha takos gayod sa paningkamot.” Niining paagiha, usab, ang usa angay mosunod sa tambag ni apostol Pablo sa 1 Corinto 9:25-27, nga nagaingon, sa bahin: “Gipanton ko ang akong lawas ug giulipon kini, aron nga, tapos ako makawali sa uban, ako dili igasalikway.”

[Mga footnote]

[Kahon sa panid 23]

Sa pagbugnong malamposon sa bisyo sa masturbasyon kinahanglan nga ang usa (1) magsalikway sa erotikong mga hunahuna, (2) magpadayon sa espirituwal nga pakig-away pinaagi sa maayong mga batasan sa pagtuon, (3) moampo sa Diyos alang sa tabang sa hustong panahon, ug (4) sa pila ka kaso, makigsulti sa usa ka hamtong nga Kristohanon bahin sa suliran