Usa ka Butang nga Mas Grabe pa Kay sa AIDS
“Positibo ang pagsusi. Ikaw dunay AIDS.” Mao kadto ang mga pulong sa akong doktor nga nanagingting sa akong ulo sa dihang gibutang ko ang telepono usa ka adlaw sa miaging tuig. Kon namati lamang unta ako sa tambag sa Diyos ug gipadapat kana, malikayan ko unta kini!
GIMATUTO ako ingong usa sa mga Saksi ni Jehova sa estado sa Washington, ug gitino sa akong mga ginikanan nga ako mahibalo sa mga kinahanglanon sa Diyos. Busa daghang tawo ang natingalag dako sa dihang misugod ako sa pagkinabuhi nga sukwahi sa akong pagbansay sa bata pa.
Gipangagpas ko nga maangayan ako sa ubang mga bata sa tunghaan. Gisulayan ko ang tanang butang aron lang madawat. Buweno, walay milampos, ug sa nag-edad akog 15, giisip ko nga wala nay paglaom pa. Misulay gani ako, apan wala molampos, sa paghikog.
Nagtuo nga makapaarang-arang kini sa mga butang, misugod ako sa paggamit ug tabako ug marijuana. Buweno, kini wala moarang-arang. Wala magdugay, midesider ako sa pagbiya sa organisasyon ni Jehova aron sa pagpangitag kalipay sa laing dapit. Akong gipahibalo ang akong mga higala sa tunghaan nga dili na ako usa sa mga Saksi ni Jehova, ug daw nalipay sila niana.
Usa ka Imoral, Dili Malig-ong Kinabuhi
Sa ulahi nakakita akog trabaho ug apartment usab diha sa pobreng lugar, nga tapokanan sa tanang mga palahubog ug mga pampam. Gisultihan nila ako kon unsa ka sayon nga makuwartahan ang mga kalaki. Uban sa ilang tabang, wala magdugay nga nahanas ako sa maong trabaho. Ako nahimo gikan sa usa ka tawo nga gustong maangayan sa tanan ug malipayon ngadto sa usa ka tawo nga gipahimuslan sa tanan ug dili gayod malipayon.
Gusto kong magbag-o, mopauli sa balay ug magsugod na usab sa sinugdan. Gimingaw ako sa akong mga ginikanan ug sa akong kinabuhi niadto. Busa nangayo ako ug tabang kang Jehova diha sa pag-ampo. Ang malisod nga bahin mao ang pagduol sa akong mga ginikanan ug sa pagpangayo sa ilang pasaylo. Sa mapasalamaton, nakita nila ang ilang mga kasingkasing nga mapasayloon nako.
Nakigkita nako ang Kristohanong mga ansiano, ug gipahayag nako ang akong tinguha sa pagbalik sa kongregasyon. Dili masayon kadto alang nila ug nako. Dili lamang may mga problema ako sa dili maayong mga epekto sa pag-abuso sa droga kondili natakdan ako sa seryosong sakit nga napasa sa sekso. Gisultihan ako sa akong doktor nga kon nalangan pa akog usa ka bulan, namatay na unta ako. Pagkadako sa kagubot ang akong nasudlan!
Sa kadugayan, nakabalik ako, ug naminyo pa gani ako sa usa ka batan-ong babaye gikan sa silingang kongregasyon. Malaomon ang mga butang. Apan, wala gihapon nako pabilhi ang gugma ni Jehova. Gibuhat gihapon nako ang mga butang sa akong kaugalingon inay mosalig kaniya alang sa kusog.
Wala dangtig duha ka tuig sa ulahi, gidiborsiyohan ako ug gipalagpot na usab tungod sa imoralidad. Nalangkit ako sa ubang kalibotanong mga tawo. Sa sinugdan daw inosente kadto, apan ang Kasulatanhong pasidaan nakitang matuod: “Ang daotang panag-uban makadaot sa maayong pamatasan.”—1 Corinto 15:33.
Hilabihang Pagkaunlod na Usab sa Kadaotan
Pinaagi sa pagbalhin sa layo, abi nakog dili nako kaayo masakitan ang akong pamilya. Wala akoy problema sa pagpangitag trabaho ug dapit nga kapuy-an sa San Francisco, California. Gitanyagan ako sa negosyanteg droga ug trabaho sa pag-apod-apod ug mga droga. Usa usab ako sa iyang piniling grupo kinsa makatilaw, nga walay bayad, sa tanang bag-ong ‘mga droga nga may ngalan’ nga moabot. Ako karon dunay bag-ong matang sa popularidad. Ang tanan nga nakaila nako (ug daghan) nahibalo nga ako dunay mga droga. Moduol sila nako diha sa mga dalan, sa mga bar, ug bisan sa trabahoan, nga may paliton gikan nako.
Gawas pa, wala usab ako maglangan sa paglangkit sa imoralidad; sayon ra kanako nga ako maangayan. Ug nagustohan gayod ako. Nakakat-on ako sa paggamit sa ubang tawo pinaagi sa sekso aron makuha ko ang mga butang nga akong gusto. Daghang tuig nga nagkinabuhi ako niining paagiha.
Mahinumdoman pa nako ang usa ka higayong taas kaayo ang akong hilanat ug luya kaayo. Ang akong doktor wala mahibalo kon unsay akong deperensiya. Sa milabay ang panahon kini nawala. Wala ako masayod kon unsa ang mitakboy nako hangtod na lamang sa tulo ka tuig sa ulahi.
Niining higayona, nagkaproblema usab ako sa mga demonyo, kas-a giatake gayod ako. Akong gibati nga gustong mosulod sa akong lawas ang demonyo. Dako kaayong paningkamot ang pagpagula sa mga pulong gikan sa akong baba. Misulay ako hangtod sa kataposan nakasinggit ako, “Tabangi ako Jehova!” Ang demonyo mihawa dayon.
Handurawa lang ang akong gibati! Dinhi nagkinabuhi ako sa hingaping imoral nga kinabuhi ug naghunahuna lamang sa akong kaugalingon, ug may kaisog pa nga nangayo kang Jehova ug panabang! Naulaw kaayo ko. Nganong dahomon nako nga tabangan ako ni Jehova? Gibati ko ang hilabihan nga depresyon. Tuyo nga gipameligro nako ang akong kinabuhi, nagtinguha nga may mopatay nako.
Usa ka Tinguha nga Magbag-o
Usa ka adlaw, samtang nakigparti uban sa mga higala, nahisgotan nako ang bahin sa mga kalihokan sa kalibotan. Sa dihang ilang gipangutana ako kon unsay akong hunahuna sa umaabot, nakita ko ang akong kaugalingon nga nagsulti kanila bahin sa katuyoan sa Diyos alang sa yuta ug sa katawhan niini. Sila nahibulong. Apan usa ka tawo nasuko kaayo nako ug gitawag akong maut! Husto siya. Nagsubay ako ug dobleng kinabuhi. Apan, sulod sa akong kasingkasing, ako nahibalo nga si Jehova mao lamang ang atong kaluwasan ug nga ang iyang organisasyon mao lamang ang dapit nga kadangpan.
Niining higayona ang akong kinabuhi ug ang mga kinabuhi niadtong anaa sa akong palibot misugod sa pagbag-o. Kadaghanan sa akong mga higala natakdan sa AIDS. Malisod ang pagtan-awg mga tawo nga himsog niadto ug anam-anam nga nagakaluya ug unya namatay. Gibati ko nga walay mahimo sa paglipay kanila. Ilabinang makapasubo sanglit may nahibaloan ako ug mas maayong paagi sa kinabuhi. Niadtong yugtoa ako nahibalo nga gusto kong mobalik sa gugma ni Jehova. Apan sa unsang paagi?
Misugod ako sa pag-ampo kang Jehova sa pagpangayog tabang. Malisod kadtong buhaton. Gibati ko ang dakong kaulaw ug kahugaw. Usa ka adlaw nakadawat akog tawag sa telepono. Gikan kadto sa akong iyaan, si kinsa wala na nako makita kapin sa siyam ka tuig. Buot niyang moduaw ug makigkita nako. Bisan pa nga dili siya parehas sa pagtuo sa akong mga ginikanan, gisultihan nako siya nga gusto kong magbag-o sa akong kinabuhi ug mobalik sa pagkahimong usa sa mga Saksi ni Jehova. Nakita niya ang akong katim-os ug gustong motabang.
Ang Hataas nga Dalan sa Pagbalik
Gidapit ako sa akong iyaan sa pag-ipon ug puyo uban niya hangtod nga makatigayon na ako. Dihang gipangutana niya ako kon kana makatabang ba, mitindog lang ako didto ug mihilak. Nahibalo ako nga mao kini ang sulbad nga akong gikinahanglan, busa gitalikdan ko ang akong mga kauban kanhi. Ang misunod nga mga bulan dili masayon, apan masaligon ako nga tabangan ako ni Jehova sa paglatas niini. Nagtuo ako nga ang Malaquias 3:7 aplikado dinhi: “‘Bumalik kamo kanako, ug ako mobalik nganha kaninyo,’ nagaingon si Jehova sa mga panon.”
Nakigkita ako sa mga ansiano human dayon sa akong pagbalhin. Gisultihan nako sila sa tanang butang bahin sa akong kaugalingon ug nga buot kong moalagad kang Jehova. Sila nahibalo ug ako nahibalo nga ang pagpabalik kanako dili madali sa bisan unsang paagi. Duna akoy dili maayong rekord. Bisan pa, determinado ako niining higayona. Kada adlaw ug kada gabii nag-ampo ako kanunay kang Jehova sa iyang tabang. Maoy akong hunahuna nga huyang ako nga pagkatawo. Sa akong panaghap tingali huyang gayod ako. Apan kon madawat nimo ang tabang ni Jehova, katingalahan nga ikaw mahimong malig-on.
Nakagamit akog mga droga sa daghan nang katuigan aron sa pagsagubang sa adlaw-adlawng kinabuhi. Karon walay na ako niana. Nahadlok ako. Mahadlok ako sa pundok sa mga tawo, ug sa literal nagkasakit ako kon magdugay ako sa ilang taliwala. Sa samang panahon, naningkamot usab ako sa paghunong sa pagtabako human nga naanad sa pagtabakog mga upat ka kaha sa usa ka adlaw. Ang butang nga nakatabang nako sa paglatas niini mao ang pag-ampo ug sa kanunayng pagpahinumdom nako sa akong kaugalingon nga ang akong mga buhat sa pagtul-id nakapahimuot kang Jehova. Nakahatag usab kanakog paglipay ug kalinaw ang pagtambong sa mga tigom sa regular. Bisan pa nga dili ako makasulti kang bisan kinsa tungod kay gipalagpot man ako, gibati ko gihapon ang gugma ug kainit sa akong umaabot nga espirituwal nga mga igsoong lalaki ug babaye didto.
Sa ulahi, mga usa ka tuig human sa akong pagbag-o sa akong kinabuhi, nakita ni Jehova nga maayo ang pagpalihok sa iyang mga alagad sa pagdawat kanako pag-usab ngadto sa iyang organisasyon. Siya nahibalo sa eksaktong panahon sa pagdawat kanakog balik. Dili niya tugotan nga sulayan ka nga sobra sa imong maantos. Wala magdugay human niini, nakadawat akog tawag sa telepono sa doktor nga nagsulti kanako nga ako dunay AIDS. Sa dayag, ang gipamulong sa Galacia 6:7 matuod: “Ayaw palimbong: ang Diyos dili mabiaybiay. Kay bisan unsay igapugas sa tawo, mao usab kanay iyang pagaanihon.”
Sa sinugdan mihilak ako. Ang tanang matang sa hunahuna misulod sa akong kaisipan. Ang mga panan-awon sa nangagi milupad sa atubangan sa akong mga mata. Akong nakita mismo kon unsay gihimo niining sakita ngadto sa usa ka tawo, maingon man sa reaksiyon sa uban diha sa mga biktima. Pagkabuang ko gayod sa paghunahuna nga ang kalibotan dunay butang nga ikatanyag! Ug pagkausik sa bililhong panahon!
Katagbawan Bisag Dunay AIDS
Nahibalo ako nga dunay mga batan-on nga anaa sa samang kahimtang nako niadto, nga gustong maangayan sa kalibotanong mga kauban. Palihog, ayaw patonto sa pagtuo nga ang nahitabo kanako diha sa kalibotan dili mahitabo kanimo kon imong isalikway ang tambag sa Diyos. Ang mga lit-ag ni Satanas hayan lahi, apan ang mga resulta managsama ra.
Hinunoa, nakakat-on usab ako nga bisan unsa ka pa ka daotan o bisan unsa pa ka dako sa sayop nga imong nahimo, tabangan ka gihapon ni Jehova nga Diyos ug pasayloon ka kon ikaw sinserong mopahimuot kaniya ug kon ikaw modangop kaniya diha sa kinasingkasing nga pag-ampo.
Kon unsa may mahitabo nako kini wala na makatugaw nako. Siyempre, masubo ako matag karon ug unya, apan makatigayon ra ako niini. Ang butang nga nakapabalaka nako karon mao ang pagpahimuot kang Jehova. Siya mao ang akong tinuod nga tuboran sa kalipay ug paglipay. Ako nahibalo nga kon buhaton nako ang tanang butang aron ako makapahimuot kaniya, ako atimanon ug higugmaon niya.
Mapasalamaton kaayo ako nga ako nakabalik na taliwala sa katawhan ni Jehova kay kon mamatay man ugaling ako sa dili pa niya mabindikar ang iyang kaugalingon diha sa Armageddon, ako may paglaom sa pagkabanhaw. Tuohi ako, ang pagkinabuhi nga walay gugma ug kahimuot ni Jehova mas grabe pa kay sa pagkabaton ug AIDS.—Tinampo.
[Blurb sa panid 13]
Gipangagpas ko nga ako maangayan sa ubang mga batan-on