Ang Tunghaang Gilead Nagpadala sa Ika-100 nga Klase Niini
ANG Watchtower Bible School of Gilead adunay hinungdanong bahin sa tibuok-yutang pagwali sa Gingharian sa Diyos sa modernong kapanahonan. Sukad magsugod ang Tunghaang Gilead sa pagbansay sa mga misyonaryo niadtong 1943, ang mga graduwado niini nag-alagad na sa kapin sa 200 ka nasod. Sa Marso 2, 1996, ang ika-100 nga klase migraduwar.
Ang mga estudyante nagtungha sulod sa yugto dihang miulan ug kapin sa duha ka metros nga niyebe sa nahimutangan sa Edukasyonal nga Sentro sa Watchtower sa Patterson, New York. Dili ikatingala, nag-ulan ug niyebe sa adlaw sa ilang graduwasyon. Bisan pa niana, ang awditoryum napuno, ug ang sobrang mga mamiminaw namati sa Patterson, Wallkill, ug Brooklyn—2,878 ka tawo ang tanan.
Si Theodore Jaracz, usa ka membro sa Teaching Committee sa Nagamandong Lawas, nag-alagad ingong tsirman. Tapos sa usa ka mainitong pag-abiabi sa mga dinapit nga mitambong gikan sa daghang nasod, gidapit niya ang tanan sa pagtindog ug pag-awit sa awitonon numero 52. Ang awditoryum milanog sa pagdayeg kang Jehova samtang ilang giawit ang “Ngalan sa Among Amahan,” gikan sa librong Pag-awit ug mga Pagdayeg Kang Jehova. Kanang maong awit, dinuyogan sa komento sa tsirman mahitungod sa paggamit sa edukasyon sa pagdayeg kang Jehova, mao ang mipatigbabaw sa programa nga misunod.
Kasulatanhong Tambag Gikan sa mga Tigulang
Ang unang bahin sa programa gilangkoban sa mugbong mga pakigpulong sa ubay-ubayng dugay nang mga alagad ni Jehova alang sa migraduwar nga klase. Si Richard Abrahamson, usa ka membro sa kawani sa hedkuwarter kinsa misugod sa iyang bug-os-panahong pag-alagad niadtong 1940, miawhag sa klase: “Padayon nga Magpatul-id.” Gipahinumdoman niya sila nga sila nakasinati na ug daghang yugto sa pagtul-id diha sa ilang kinabuhi ingong mga Kristohanon, lakip sa ilang lima ka bulan nga pagtungha sa Gilead. Busa nganong kinahanglan silang padayong magpatul-id?
Ang mamumulong misaysay nga ang pulong nga gigamit ni apostol Pablo sa 2 Corinto 13:11 “nagpasabot ug progresibong proseso, usa ka mapinadayonong pagpasakop sa paghulma o paglunsay ni Jehova sa usa, usa ka diyutayng pagpasibo, aron ang usa makakab-ot sa mas taas nga mga sukdanan ni Jehova.” Sa ilang langyawng mga asaynment, ang migraduwar nga klase moatubang ug bag-ong mga hagit sa ilang pagtuo. Kinahanglang makakat-on sila ug usa ka bag-ong pinulongan, mopasibo sa usa ka lahing kultura ug mga kahimtang sa pagkinabuhi, ug mopahaom sa lainlaing matang sa teritoryo. Kinahanglang makiglabot usab sila sa lainlaing personalidad diha sa ilang mga puy-anan sa mga misyonaryo ug sa ilang bag-ong mga kongregasyon. Kon mainampingon nilang ipadapat ang mga prinsipyo sa Bibliya sa tanan niining mga kahimtanga, uban ang pagkaandam nga magpatul-id, nan, sumala sa gisulat ni apostol Pablo, sila usab ‘makapadayon sa pagmaya.’
Si John Barr, usa sa lima ka membro sa Nagamandong Lawas nga miambit sa programa, mikuha sa iyang tema gikan sa 1 Corinto 4:9. Iyang gipahinumdoman ang iyang mga mamiminaw nga ang mga Kristohanon maoy talan-awon sa mga manulonda ug sa mga tawo. “Ang pagkasayod niini,” siya miingon, “dakog ikadugang sa kahinungdanon sa paagi sa kinabuhi sa usa ka Kristohanon, ilabina sa dihang iyang maamgohan nga pinaagi sa iyang gisulti ug gibuhat, siya adunay dakong epekto niadtong nagatan-aw, makita ug dili makita. Ako nagtuo nga kini maoy usa ka butang nga angay hinumdoman ninyong tanan minahal nga mga igsoong lalaki ug babaye sa ika-100 nga klase sa Gilead samtang mangadto kamo sa lagyong mga suok sa yuta.”
Si Brader Barr midasig sa 48 ka estudyante sa pagbutang sa hunahuna, samtang sila nagatabang sa samag-karnerong mga tawo sa pagkat-on sa kamatuoran, nga “motugbaw ang kalipay taliwala sa mga anghel sa Diyos tungod sa usa ka makasasala nga maghinulsol.” (Lucas 15:10) Sa paghisgot sa 1 Corinto 11:10, iyang gipakita nga ang tinamdan sa usa maylabot sa teokratikanhong mga kahikayan mag-apektar dili lamang sa atong mga igsoong lalaki ug babaye kinsa atong makita kondili sa mga manulonda nga dili nato makita. Pagkamakabenepisyo ang pagbutang sa hunahuna niining mas sangkad nga punto de bista!
Ang laing membro sa Nagamandong Lawas, si Gerrit Lösch, mismo usa ka graduwado sa Tunghaang Gilead, naghisgot sa mga kasulatan sama sa Salmo 125:1, 2; Zacarias 2:4, 5; ug Salmo 71:21 sa pagpakita nga si Jehova ‘nagalibot sa iyang katawhan.’ Nagtagana siyag panalipod alang kanila sa tanang kiliran. Itagana ba sa Diyos ang maong panalipod panahon lamang sa dakong kasakitan? “Dili,” mitubag ang mamumulong, “kay si Jehova maoy usa ka ‘paril sa kalayo,’ usa ka panalipod sa iyang katawhan. Sa tapos-gubat nga tuig sa 1919 ang nahibilin sa espirituwal nga Israel mahinamong nangandoy sa pagsangyaw sa maayong balita sa Gingharian sa tibuok kalibotan ingong pamatuod sa tanang kanasoran. Sila maoy mga hawas sa mahulagwayong Jerusalem sa kalangitan. Si Jehova nagagarantiya ug langitnong panalipod niining maong mga hawas ingong usa ka pundok sa panahon sa kataposan. Kinsa gayod ang makapahunong kanila? Wala.” Pagkamakapadasig kanila ug sa tanan nga suod nga nakig-uban kanila diha sa pagbuhat sa kabubut-on sa Diyos!
Si Ulysses Glass, ang tigulang nga membro sa pakultad sa tunghaan, nagdasig sa klase nga ‘taposon pagkulit ang ilang luna diha sa tibuok-kalibotang organisasyon ni Jehova.’ Ang usa ka niche o luna maoy usa ka kahimtang o usa ka kalihokan nga sa linain angayan sa katakos o kinaiya sa usa ka tawo. “Kamong umaabot nga mga misyonaryo nakakaplag na sa inyong luna diha sa tibuok-kalibotang organisasyon sa mga Saksi ni Jehova,” siya mipahayag. “Apan, bililhon man tuod kini karon, mao lamang kini ang sinugdanan sa inyong kinabuhi ingong usa ka misyonaryo.” Kinahanglang magkugi sila mismo aron magamit pag-ayo ang ilang mga katakos ug mohaom ngadto sa linaing mga asaynment nga gihatag ni Jehova ug sa iyang organisasyon kanila.
Ang kataposang pakigpulong niining bahina sa programa gihatag ni Wallace Liverance, usa ka membro sa pakultad sa Gilead kinsa nag-alagad sulod sa 17 ka tuig sa Bolivia. “Sulayan ba ninyo ang Diyos?” gipangutana niya ang mga estudyante. Unsaon nila paghimo kana? Ang nasod sa Israel misulay sa Diyos sa sayop nga paagi. (Deuteronomio 6:16) “Dayag, ang pagsulay sa Diyos pinaagi sa pagreklamo o pagbagulbol o tingali sa pagpakita ug kakulang sa pagtuo sa iyang paagi sa pagdumala sa mga butang maoy sayop,” matod sa mamumulong. “Inig-abot ninyo sa inyong bag-ong asaynment, pakigbisogi kanang maong kiling,” siya miawhag. Nan, unsa ang hustong paagi sa pagsulay sa Diyos? “Maoy pinaagi sa pagtuo sa iyang gisulti, pinaagi sa pagbuhat sa kon unsa gayod ang iyang gisulti, ug unya itugyan ang sangpotanan sa iyang mga kamot,” misaysay si Brader Liverance. Ingon sa makita sa Malaquias 3:10, gidapit ni Jehova ang iyang katawhan: “Sulayi ninyo ako, palihog.” Siya misaad nga kon sila matinumanong magdala sa ilang ikapulo ngadto sa tipiganan sa templo, siya magapanalangin kanila. “Nganong dili ninyo isipon ang inyong misyonaryong asaynment sa samang paagi?” misukna ang mamumulong. “Si Jehova buot nga magmalamposon kamo niana, busa sulayi siya. Pabilin sa inyong asaynment. Himoa ang mga pagpasibo nga buot niyang himoon ninyo. Lahutay. Tan-awa kon dili ba kamo niya panalanginan.” Pagkamaayong tambag alang sa tanan nga nag-alagad kang Jehova!
Human sa usa ka awit ang programa nausab gikan sa mga diskurso ngadto sa usa ka serye sa makapahimuot nga mga interbiyo.
Praktikal nga mga Pahayag Gikan sa Kanataran
Si Mark Noumair, usa ka bag-ong membro sa pakultad sa Gilead, nagdapit sa mga estudyante sa pag-asoy sa mga kasinatian nga ilang nabatonan diha sa pagsangyaw sa kanataran samtang nagtungha. Kini nagpasiugda sa bili sa pagpakitag inisyatibo diha sa ministeryo ug paghatag sa mamiminaw ug praktikal nga mga ideya nga ilang magamit.
Panahon sa ilang semestre sa tunghaan, ang mga estudyante niining maong klase sa Gilead sa linain nakabenepisyo pinaagi sa pagpakig-uban sa mga membro sa Komite sa Sangang Buhatan gikan sa 42 ka nasod, nga didto usab sa Edukasyonal nga Sentro sa Patterson alang sa linaing pagbansay. Daghan kanila ang migraduwar sa Gilead mga katuigan kanhi. Nalakip sa programa, ang mga interbiyo gihimo uban sa mga hawas sa ika-3, ika-5, ika-51, ug ika-92 nga mga klase, maingon man sa Gilead Extension School sa Alemanya. Pagkamakabenepisyo ang ilang mga komento!
Ilang giasoy kon unsay gibati sa mga misyonaryo samtang ilang nakita nga ang gidaghanon sa mga magdadayeg ni Jehova diha sa ilang mga asaynment miuswag gikan sa pipila ngadto sa tinagpulo ka libo. Ilang giasoy ang bahin nga ilang nahimo sa pagdala sa maayong balita ngadto sa nagkatagkatag nga mga puloy-anan sa Kabukirang Andes ug sa mga balangay sa tuboran sa Subang Amazon. Ilang gisaysay ang pagsangyaw ngadto sa mga tawo nga dili makamaong mobasa ug mosulat. Ilang giasoy ang ilang kaugalingong pakigbisog sa pagkat-on sa bag-ong mga pinulongan ug kon unsay realistikong dahomon sa mga graduwado mahitungod sa kon unsa sila ka dugay nga makasangyaw ug makapakigpulong sa pinulongan sama sa Ininsek. Gipasundayag gani nila ang sampol nga mga pasundayag sa Kinatsila ug Ininsek. Ilang gipasiugda nga ang mga misyonaryo labing epektibo sa dihang sila makahibalo dili lamang sa pinulongan kondili sa panghunahuna usab sa katawhan. Ilang giasoy ang mahitungod sa kasagarang malisod nga mga kahimtang sa pagkinabuhi sa kabos nga mga nasod ug miingon: “Angayng ilhon sa mga misyonaryo nga kining kahimtanga kasagarang nahitabo tungod kay ang mga tawo gipahimuslan. Labing maayo ang mahimo sa usa ka misyonaryo kon mobati siya sama sa gibati ni Jesus—may kaluoy siya sa katawhan, kinsa samag mga karnero nga walay magbalantay.”
Human sa usa ka awit ang programa mipadayon uban ang diskurso ni A. D. Schroeder, usa ka membro sa Nagamandong Lawas. Nakapribilehiyo siya nga mahimong usa sa orihinal nga mga instruktor sa Tunghaang Gilead sa dihang gibuksan kini niadtong 1943. Ingong haom nga panghinapos sa programa, iyang gihisgotan ang ulohang “Paghimaya Kang Jehova Ingong Soberanong Ginoo.” Ang madanihong paghisgot ni Brader Schroeder sa ika-24ng Salmo nagpasilsil diha sa tanang nanambong kon unsa ka dako ang pribilehiyo nga himayaon si Jehova ingong Soberanong Ginoo.
Human sa pag-apod-apod sa mga diploma, ug sa usa ka kataposang awit, si Karl Klein sa Nagamandong Lawas mitapos uban sa kinasingkasing nga pag-ampo. Pagkapraktikal ug makapabaskog sa espirituwal nga programa kadto!
Sa mga adlaw human sa graduwasyon, ang 48 ka membro sa ika-100 nga klase misugod sa pagbiyahe ngadto sa misyonaryong mga asaynment sa 17 ka nasod. Apan wala lamang sila magsugod sa ilang ministeryo. Sila aduna nay igong talaan sa bug-os-panahong Kristohanong ministeryo. Sa dihang nagpalista sila sa Gilead, sila, sa aberids, maoy 33 anyos ang edad ug nakagugol nag kapin sa 12 ka tuig sa bug-os-panahong ministeryo. Ang uban kanila nahimong mga membro sa tibuok-yutang pamilyang Bethel sa Watch Tower Society. Ang uban nag-alagad ingong nagapanawng mga magtatan-aw. Ang ubay-ubayng estudyante nag-alagad na sa usa ka matang sa langyawng pag-alagad—sa Aprika, Uropa, Amerika del Sur, sa kaislahan sa dagat, ug taliwala sa langyawg-pinulongang mga pundok sa ilang pinuy-anang mga nasod. Apan karon sila miduyog sa daghang ubang mga misyonaryo nga nalipay nga makaingon, ‘Moalagad kami bisan asa sa kalibotan diin kami gikinahanglan.’ Ang ilang kinasingkasing nga tinguha mao ang paggamit sa ilang mga kinabuhi sa pagbayaw kang Jehova.
[Kahon sa panid 27]
Mga Estadistika sa Klase:
Mga nasod nga gihawasan: 8
Mga nasod nga giasaynan: 17
Mga estudyante: 48
Aberids nga edad: 33.75
Aberids nga tuig sa kamatuoran: 17.31
Aberids nga tuig sa bug-os-panahong ministeryo: 12.06
[Hulagway sa panid 26]
Ika-100 nga Migraduwar nga Klase sa Watchtower Bible School of Gilead
Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.
(1) Shirley, M.; Grundström, M.; Genardini, D.; Giaimo,J.; Shood, W.; Phair, P.; Buchanan, C.; Robinson, D. (2) Pine, C.; Kraus, B.; Racicot, T.; Hansen, A.; Beets, T. Berg, J. Garcia, N.; Fleming, K. (3) Whinery, L.; Whinery, L.; Harps, C.;Giaimo, C.; Berg, T.; Mann, C.; Berrios, V.; Pfeifer, C. (4) Randall,L.; Genardini, S.; Kraus, H.; Fleming, R.; D’Abadie, S.; Shirley, T.; Stevenson, G.; Buchanan, B. (5) Robinson, T.; Garcia, J.; Harps, P.; Racicot, D.; D’Abadie, F.; Phair, M.; Stevenson, G.;Shood, D. (6) Beets, L.; Pfeifer, A.; Berrios, M.; Pine, J.; Mann,L.; Randall, P.; Grundström, J.; Hansen, G.