Pagkalingaw sa Musika Unsa ang Yawi?

ANG dayag nga imoralidad ug pagsimbag diyosdiyos gibuhat sa karaang kalibotan. Busa, nasabtan ni apostol Pablo nga gikinahanglan nga ihatag ang ugdang kaayong tambag bahin sa Kristohanong kagawian. Sa kongregasyon sa Efeso siya misulat: “Busa, kini akong ginasulti ug ginapamatud-an diha sa Ginoo, nga wala na kamo magagawi ingon nga ang kanasoran nagagawi usab diha sa kawalay kapuslanan sa ilang mga panghunahuna, samtang sila anaa sa kangitngitan ang panghunahuna, ug nahibulag sa kinabuhi nga iya sa Diyos, tungod sa kaburong nga anaa kanila, tungod sa pagkadili-mobati sa ilang mga kasingkasing.”—Efeso 4:17, 18.

Dili ba kana usab ang maayong kabatbatan sa kahimtang karong adlawa? Kini nag-apil sa natad sa musika. Ang kinadak-an sa modernong musika nagabanaag sa estilo nga ‘bulag sa diyosnong kinabuhi.’ Kadaghanan ang mga pulong sa awit nagapadayag sa ‘dili-mobati nga kasingkasing,’ nga walay kalulot o kahangawa.

Apan si Pablo nagpadayon pa sa iyang tambag nga miingon: “Kay nahabol na ang ilang pagsabot sa matarong ug daotan, gitugyan nila ang ilang kaugalingon ngadto sa pagkaunodnon ug maikagong gipangagpas ang karera sa kalaw-ayan sa tanang matang.”​—Efeso 4:19, The Jerusalem Bible.

Kining ‘maikagong pagpangagpas sa karera sa kalaw-ayan’ gibanaag sa kadaghanan sa musika karong adlawa. Ang mga pulong sa awit ug ang musikal nga tuyo nagatagbaw sa kaliwatan nga nahunob sa sekso, kabangisan, mga droga, ug kalingawan. Unsay pag-isip sa mga Kristohanon sa maong mga bisyo? Matikdi ang mga pulong ni Pablo: “Karon dili kana ang paagi nga inyong nakat-onan gikan kang Kristo, gawas kon kamo napakyas sa pagkadungog kaniya sa tukma sa dihang kamo gitudloan kon unsa ang kamatuoran diha kang Jesus.”​—Efeso 4:20, 21, JB.

Gikinahanglan ang “Espirituwal nga Rebolusyon”

Sa unsang paagi mapadapat nato kining tambaga kon bahin sa musika nga nagabanaag sa espiritu sa kalibotan? Sa pagkaagi nga, kon kita nagbaton sa “hunahuna ni Kristo,” nga mao, kon kita nagbaton sa iyang tinamdan sa hunahuna, dili nato buot mamati sa musika nga “yutan-on, mananapon, demonyohanon.”—1 Corinto 2:16; Santiago 3:15.

Apan tingali mangutana ka, ‘Sa unsang paagi mausob nako ang akong gusto sa musika?’ Sa makausa pa si Pablo mitabang, kay siya miingon: “Kinahanglang inyo nang hunongon ang inyong daang pagkinabuhi; kinahanglang inyo nang isalikway ang inyong daang pagkatawo, nga madaot sa pagpangagpas sa hinandurawng mga kailibgon. Ang inyong hunahuna kinahanglang mabag-o pinaagi sa rebolusyon sa espiritu.”​—Efeso 4:22, 23, JB.

Anaa ang tubag, usa ka pagbag-o sa hunahuna pinaagi sa rebolusyon sa espiritu. Nalangkit niini dili lamang ang atong gusto sa musika. Nagkinahanglan kini sa pag-edukar pag-usab, pagpataas sa mga sukdanan ug mga prinsipyo. Nagkahulogan kini sa pag-usob sa atong paagi sa paghunahuna, sa laing hugpong sa mga sukdanan. Ug naglangkit kini sa pagtan-aw sa mga butang gikan sa punto de vista sa Diyos ug ni Kristo. Sumala sa tin-aw nga pagpahayag niini ni Pablo: “Kon kaha kamo nagakaon o nagainom o nagabuhat sa bisan unsa, buhata ninyo ang tanang butang alang sa himaya sa Diyos.”​—1 Corinto 10:31.

Kadaghanan sa modernong musika dili magahimaya sa Diyos. Sa kasukwahi, kini nagasalikway sa mga prinsipyo nga gibarogan sa mga Kristohanon ug alang niana daghan ang andam magpakamatay diha sa mga bilanggoan ug sa mga kampo konsentrasyon. Busa, nganong isipon natong sakripisyo kon usbon nato ang atong gusto sa musika aron dili mahimong ‘mahigugmaon sa kalibotan o sa mga butang sa kalibotan’?—1 Juan 2:15-17.

Maayong Musika—Unsa ang Yawi?

Kon, tungod sa atong pagtahod sa mga prinsipyo sa Kasulatan, isalikway nato ang makadaldal sa kadaotan nga musika, unsay atong ikapuli niana? Aw, nganong dili susihon ang bag-ong mga paagi sa musika? Basin sila mas makalingaw ug makapalig-on kay sa atong kinaham nato sa nangagi. Pananglitan, ang kanhing musikero sa rock miingon niini bahin sa mga kausaban nga gihimo niya:

“Kinahanglang manlimbasog ako nga mobalhin gikan sa tingog sa easy rock ngadto sa dalawatong popular nga matang sa musika ug mas lalom klasikal nga musika. Apan sa nakaamgo ako nga sila mas dakog unod ug dili na ako makapahiuyon sa espiritu sa kadaghanang modernong musika, kadto nahimong mas sayon ug mas makapahamuot. Kadto sa hinanali nahimong anindot. Nakaamgo ako sa nalaktawan nako tungod sa kanhi kong pag-ayad sa kapiliang mga matang sa musika.”

Nagkadaiya kaayo ang klasikal nga musika, ingon man ang banikanhon ug pila ka modernong musika, nga may nindot nga kananoy, hinlong mga pulong, ug dili mopahayag sa pilosopiya nga supak sa prinsipyo sa Bibliya. Ang yawi mao ang pagkaplag ug pagkalingaw sa musika nga dili mag-impluwensiya sa kadaotan sa atong hunahuna, musika nga ‘matarong, maputli, maayong pamation, maayog kinaiya, ug dalayegon.’—Filipos 4:8.

Ang Bahin sa Musika Diha sa Kinabuhi sa Kristohanon

Alang sa pipila, usa ka paagi sa pagkalingaw sa maayong musika maoy pinaagi sa pag-awit o pagtuon sa pagtugtog ug instrumento. Mabatonan ang dakong kalingawan gikan sa solo ug ginuropong mga pasundayag kauban sa pamilya ug sa mga higala. Hinuon, sama sa tanang butang, gikinahanglan ang katimbang. Ang kalingawan o pasatiempo dili angay kabuangan sa kinabuhi sa usa ka Kristohanon. Kon ugaling kana mahitabo, bisan ang maayong musika, tungod sa paghingapin, dili maayog mga epekto. Unya ang Kristohanon mameligro nga mahimong ‘mahigugmaon sa kalingawan inay sa Diyos.’​—2 Timoteo 3:4.

Ang musika maoy dimalaksing bahin sa atong pagsimba kang Jehova. Sa karaang Israel, si Asap ug iyang mga igsoong lalaki miawit: “Magpasalamat kang Jehova, kamong katawhan; sangpita ang iyang ngalan, ipahibalo ang iyang mga binuhatan taliwala sa mga katawhan! Pag-awit ngadto kaniya, paglaylay ngadto kaniya, paghunahuna kamo sa tanan niyang katingalahang mga buhat.” Oo, ang musika makadayeg sa Diyos ug makapahimuot kaniya.​—1 Cronicas 16:8, 9.

Ang mga awit sa Gingharian nga gigamit sa mga Saksi ni Jehova diha sa ilang mga Kingdom Hall gibase sa mga teksto, mga salmo, mga pag-ampo, ug mga pagtulon-an sa Bibliya. Dili ba usab kita malingaw sa dulot niining sagradong musika? Ug dili ba nato ipakita ang atong kalipay pinaagi sa pag-awit niining mga awit uban ang pagbati ug kasibot? Bisan sa mga okasyon gawas sa Kristohanong mga tigom, dili ba nato mapasadya ang atong mga kinabuhi pinaagi sa nindot nga mga komposisyon niining mga awita nga gitawag Kingdom Melodies?

Sa maong mga komposisyon alang sa orkestra, ang tanang musikero maoy mga Saksi ni Jehova. Ang pipila propesyonal nga nagatugtog sa mga orkestra. Ang uban, apil ang kanhing musikero sa rock nga gikutlo sa ibabaw, maoy abilidarang mga batan-on nga nagakalingaw sa daghang matang sa desenteng musika. Wala sila mobati nga naalkansi tungod sa pagsalikway sa musika nga nagabanaag sa yutan-on, demonyohanong mga tinamdan. Ang maayo nilang panig-ingnan nagapakita nga kita, usab, kon magpamando sa mga prinsipyo sa Bibliya sa atong pagpili, makakaplag ug dakong kalingawan sa musika, sekular man ug sagrado.​—Efeso 5:18-20.

[Kahon sa panid 28]

“Ang musikang rock may pandani lamang, linuog nga pandani, sa seksuwal nga kailibgon​—dili gugma, dili eros, kondili seksuwal nga kailibgon nga wala maugmad ug wala maedukar. . . . Nasayod ang mga batan-on nga ang rock nakabaton sa kompas sa seksuwal nga relasyon.”​—The Closing of the American Mind, ni Allan Bloom.