Nasangkapan Alang sa Misyonaryong Pag-alagad sa mga Tuig 1990
USA ka espesyal nga panahon ang nagsugod alang sa misyonaryong pag-alagad. Uban sa mga pultahan sa kahigayonan nga nabuksan diha sa daghang mga nataran, ang tanang matinumanong mga Saksi ni Jehova maikagong nagpadayon ngadto sa mas dako pa nga buluhaton.
Busa uban sa dulot nga pagpaabot nga ang 24 ka mga estudyante sa ika-89 nga klase sa Watchtower Bible School of Gilead mitambong sa ilang programa sa graduwasyon sa Septiyembre 9, 1990. Ang tumatambong nga kapin sa 5,000 ka dinapit nga mga bisita ug mga membro sa pamilyang Bethel nga nagtigom alang sa graduwasyon niining bag-ong mga misyonaryo, kinsa nakadawat na ug mga asaynment ngadto sa napulo ka nasod. Gikan sa Assembly Hall sa mga Saksi ni Jehova sa Jersey City, New Jersey, ang entirong programa nadungog usab niadtong nagtigom didto sa Brooklyn Bethel, Watchtower Farms, ug sa Watchtower Educational Center sa Patterson, New York.
Sa untop nga alas 10:00 s.b., si Theodore Jaracz, usa ka membro sa Nagamandong Lawas sa mga Saksi ni Jehova ug tsirman sa maong adlaw, mitawag sa pangbukas nga awit. Sunod niini, ang pag-ampo gitanyag ni Arthur Worsley sa pamilyang Bethel sa Brooklyn. Ang tsirman dayon mipunting sa Buhat 10:33, diin ang Romanong senturyong si Cornelio nag-ingon kang Pedro: “Kaming tanan ania karon sa atubangan sa Diyos aron sa pagpatalinghog sa tanang butang nga gisugo kanimo ni Jehova nga isulti.” Hinumdoman nga ang makasaysayanhong mga hitabo nga nahitabo sa mga adlaw ni Pedro maoy sa pagbukas sa dalan alang sa maayong balita nga imantala ngadto sa katawhan sa tanang mga nasod.
Si Philip D. Wilcox, gikan sa Watchtower Farms, mihatag sa unang pito ka makapadasig nga mga pakigpulong. Naghisgot sa Filipos 4:7, ingong iyang tema “Tugoting ang Kalinaw sa Diyos Motabang Kaninyo sa Inyong Asaynment.” Siya miingon: “Si Jehova nga Diyos mao ang Tuboran sa tanang matuod nga kalinaw. Siya nagatagamtam ug kalinaw diha sa usa ka bug-os, o absoluto, nga diwa ug wala makasinati ug bisan unsang makapasubong kabalaka, kahadlok, o kahigwaos sa hunahuna. Busa, adunay kahilom ug kalinaw nga nagalibot sa madan-agong presensiya ni Jehova diha sa iyang trono, ingon sa gipaila sa lunhaw-esmeraldang balangaw nga nakita ni Juan sa panan-awon. (Pinadayag 4:2, 3) Ang iyang kalinaw mikaylap saylo pa sa iyang kaugalingon ngadto sa tanang kinsa nagtugot niini nga motabang kanila. Magtugot ka ba niini?” Si Igsoong Wilcox naglatid sa duha ka hinungdanong tabang, ang pag-ampo ug kaandam sa paghulat kang Jehova. (Miqueas 7:7; Filipos 4:6) Walay tugotan sa Diyos nga makahatag kanatog dumalayong kasakit, siya nag-ingon.
Si Lloyd Barry, usa ka membro sa Nagamandong Lawas, misunod sa temang “Pahiyom Kanunay.” Siya nagsugod sa pag-ingon nga, “Ang pagkatawa maoy maayong medisina.” Iyang nahinumdoman kanang pulonga tungod kay balik niadtong 1955 mao kana ang ulohan sa hapin alang sa unang gula sa magasin nga Pagmata! nga makita diha sa Hapones nga pinulongan. Apan unsang matanga sa pagkatawa? Dili ang hagakhak, walay salabotang “katawa sa buangbuang.” (Ecclesiates 7:6) Hinuon, kini maoy mangayaon, relaks nga katawa sa mga misyonaryo ug sa uban nga mosanong sa pagdapit ni David nga kanunayng “magkalipay kang Jehova.” (Salmo 32:11) Si Igsoong Barry miingon nga bisan pa sa grabeng mga pagsulay, si Job mapahiyomon kanunay, kay siya nahibalo nga siya naghupot sa pagkamaunongon ngadto sa Diyos. Ang mga misyonaryo nga madasigon bisan pa sa masulayong mga kasinatian sama kang Job makadawat sa mas dakong panalangin sa kataposan. (Job 29:24; 42:12) Ang mamumulong mihinapos: “Magmapuliki, magmapahiyomon, ug kamo usab makaani sa walay kataposang pahiyom sa pag-uyon ni Jehova.”
Ang sunod nga mamumulong mao si Richard E. Abrahamson, kinsa nagpili sa temang “Ang Inyong Pagkamakataronganon Ipaila sa Tanang mga Tawo,” pinasukad sa Filipos 4:5. Sumala sa Gregong kahulogan, ang pulong “pagkamakataronganon” naghatag sa diwa nga “magpahiangay.” Ang pipila ka mga misyonaryo adunay mga problema tungod lamang sa personal nga mga kagustohan. Ang usa nakurat sa paagi nga ang kaubang misyonaryo naghiwa ug usa ka piraso sa keso diha sa lamesa. Human sa 22 ka tuig sa misyonaryong pag-alagad, ang usa nga nakurat miingon nga ang kadaghanang mga kasamok nagsugod sa mga butang nga walay pulos sama sa kon giunsa paghiwa sa usa ang keso. Ang mamumulong mitambag: “Pagtuon nga mopahiuyon, sama sa usa ka kahoy panahon sa bagyo. Adunay daghang kaayohan sa pagpahiangay, nga mas makaarang sa pag-antos sa mga pagsulay ug magpabilin diha sa gitudlong buluhaton sa usa uban ang kalinaw sa hunahuna.”
Si Milton G. Henschel, sa Nagamandong Lawas, naghisgot sa temang “Usa ka Dakong Pultahan nga Motultol Ngadto sa Buluhaton Nabuksan.” Si Igsoong Henschel miingon nga si Jesus nahigugma sa mga tawo, naluoy kanila, ug nagtudlo kanila sa daghang butang. Gikan sa Efeso si apostol Pablo misulat sa mga taga Corinto: “Ang usa ka dakong pultahan nga motultol ngadto sa buluhaton nabuksan nganhi kanako, apan may daghang mga kaaway.” (1 Corinto 16:8, 9) Bisan pa niini nga pagsupak, si Pablo nga gitudloan sa awditoryom sa tunghaan ni Tyrannus sa duha ka tuig, sa ingon ang mensahe sa Gingharian nailhan sa tibuok distrito sa Asia. (Buhat 19:9, 10) Ang nabuksan nga pultahan mitultol sa kalamposan sa iyang pagsangyaw. Ang kongregasyon sa Efeso nagalihok pa gihapon sa kataposan sa unang siglo.—Pinadayag 2:1-7.
Si Jack D. Redford, usa ka instruktor sa Gilead, mihisgot sa temang “Padayon sa Pagsuta Kon Unsa Ikaw.” (2 Corinto 13:5) Ang mga misyonaryo sa Gilead nagbukas ug bag-ong mga natad ug nagpalig-on sa mga kongregasyon nga natukod na, nag-antos ug dako ug misukol sa paon nga giandam ni Satanas sa pagpatalikod kanila. Ug ang mga bag-ohan padayong miduyog sa ranggo. Uban ang duha ka dayag nga kasinatian, ang instruktor nag-ilustrar kon unsa ka hinungdanon ang pagsuta sa pagtuo sa usa. Usa ka misyonaryo nawad-an sa pribilehiyo human nga siya sa pagkamapahitas-on midumili sa pahamangnong tambag mahitungod sa sayop nga dalan. Sa pagtandi, ang lain nagpabilin sa iyang asaynment uban ang kalipay, bisan pag sa iyang unang tulo ka bulan didto, siya nagniwang kaayo tungod sa sakit nga nakaingon usab sa pagkawala sa iyang buhok ug sa iyang pandungog. Siya atua gihapon didto human sa 42 ka tuig ug, pinaagi sa mga pagtuon sa Bibliya, nakatabang sa 156 ka mga tawo nga mabawtismohan. Si Igsoong Redford mihinapos: “Sukli ang Yawa, ug siya mokaratil sa pagdalagan gikan kaninyo. Ayaw subda ang iyang paon. Padayon sa pagsuta kon unsa gayod kamo. Si Jehova magaatiman kaninyo.”
Sunod, ang lain nga instruktor, si Ulysses V. Glass, mihisgot sa temang “Ang Kaalam Anaa sa mga Mapainubsanon.” (Proverbio 11:2) Iyang gigamit ang usa ka relo nga gipaandar sa baterya sa adlaw sa pag-ilustrar nga ang Pulong sa Diyos “magpainit” kanato. “Apan,” gipasiugda niya, nga ang “kahibalo lamang dili mohatag ug kaalam. Ang pagkamapainubsanon sa bahin nato gikinahanglan usab sa Diyos.” (Miques 6:8) Ang pagkamapainubsanon ang moagak kanato sa pagkahadlok sa Diyos, ug “ang pagkahadlok kang Jehova maoy sinugdanan sa kaalam.” (Proverbio 9:10) Matuod, angay kitang mobatig garbo sa atong kaugalingon; ang pagtunglo-sa-kaugalingon malaglagon. Si Jehova naghatag ug linaing abilidad sa uban, sama sa iyang gihimo sa pagtukod sa tabernakulo, apan ang pagkamatinumanon diha sa pagkamapainubsanon ang kinahanglang ugmaron. “Sulod sa termino,” Si Igsoong Glass miingon sa klase, “kamo nagpakita ug ebidensiya sa pagkakasaligan ug pagtahod. Ipakita ang samang pagkamatinumanon diha sa inyong asaynment, ug ang Diyos magapanalangin kaninyo.”
Si Albert D. Schroeder, sa Nagamandong Lawas, mihisgot sa pangunang pakigpulong nga nag-ulohang “Bug-os nga Nasangkapan alang sa Misyonaryong Pag-alagad sa mga tuig 1990.” Siya misugod: “Ang mga tuig 1990 aduna nay dahunog sa pagsugod. Daghang Sidlakanhong mga nasod sa Uropa ang nauyog. Pipila ka bulan ang miagi ang Pader sa Berlin gibuksan. Ang The New York Times nagdala ug usa ka pangunang ulohan: ‘Agosto 1990, ang Bulan nga Nakauyog sa Kalibotan.’ Busa, kamong migraduwar nagakinabuhi sa usa ka panahon sa pag-uyog. Ang inyo bang lima ka bulan nga pagtuon nag-andam na kaninyo alang niana? Sigurado gayod!” Siya dayon mihisgot sa pila ka makatabang nga mga bahin sa New World Translation of the Holy Scriptures—With References ug kon sa unsang paagi ang pagtuon niana naghimo sa Pulong sa Diyos nga buhi. Ang laing kusganong instrumento nga nagsangkap sa mga estudyante mao ang “All Scripture is Inspired of God and Beneficial,” karon anaa na sa iyang 1990 rebisadong edisyon. Ang pinakabag-o nga publikasyon Mankind’s Search for God usa usab ka kusganong tabang alang sa mga misyonaryo. Si Igsoong Schroeder mihinapos: “Busa karon, mga igsoon, pasalamati si Jehova alang sa iyang kahibulongan, bililhong edukasyon nga inyong nabatonan—usa nga solido ug dili matarog. Lakaw kamo uban sa panalangin ni Jehova ug pagbaton ug bug-os nga pagsalig kaniya ug sa atong kahibulongang Lider, si Jesu-Kristo. Ang mga pulong nga anaa sa Kasulatan tinuod nga inspirado ug magagiya ug magamando kaninyo diha sa misyonaryong buluhaton.”
Ang mga pangumosta sa 11 ka mga nasod gibasa. Ang mga estudyante midawat sa ilang mga diploma, ug usa kanila mibasa sa usa ka kinasingkasing nga sulat ngadto sa Nagamandong Lawas ug sa pamilyang Bethel.
Ang hapon nga sesyon nag-apil ug usa ka minubong pagtuon sa Ang Bantayanong Torre, gidumala ni David L. Walker, usa ka membro sa Watchtower Farms Committee. Dayon ang mga estudyante migamit sa makapadasig nga tema “Ang Gahom sa Pag-ampo diha sa Pagsangyaw” sa pagdrama sa mga kasinatian sa kanataran. Usa ka lokal nga kongregasyon ang nagpresentar ug usa ka makapadasig nga drama Gipagawas Aron sa Pagpalambo sa Matuod nga Pagsimba, gibase sa pagbalik ni Ezra sa Jerusalem aron sa pagpalambo sa matuod nga pagsimba. Si Igsoon Frederick W. Franz, ang presidente sa Eskuelahan sa Gilead, mitapos pinaagi sa usa ka makapatandog nga pag-ampo.
[Hulagway sa panid 24]
Ika-89ng Klase nga Migraduwar sa Watchtower Bible School of Gilead
Sa lista sa ubos, ang mga laray giihap gikan sa atubangan paingon sa likod, ug ang mga ngalan gilista gikan sa wala paingon sa tuo sa matag laray. (1) Ahr, K.; Johnston, L.; Ng Ying Kin, V.; Sukkau, A.; Rodriguez, A.; Myklebust, N. (2) Ahr, H.; Verbeek, P.; Verbeek, K.; DeBolt, S.; DeBolt, S. (3) Sukkau, W.; Ayala, L.; Ayala, S.; Jenson, R.; Ng Ying Kin, J.; Myklebust, T. (4) Rodriguez, C.; Ferlisi, G.; Ferlisi, L.; Tank, J.; Jenson, K.; Tank, J.; Johnston, P.