Dayega si Jah Pinaagig Pagkuhag mga Suskrisyon
1 Pagkadakong kalipay sa pagdawat sa kada bag-ong gula sa Ang Bantayanang Torre! Nagatagana kini ug maayong espirituwal nga pagkaon ug tambag, ug padayong nagabantay sa mga hitabo sa kalibotan samtang kini nagatuman sa tagna sa Bibliya. Busa atong mas pa gayong mapabilhan ang atong kahigayonan sa pagdayeg kang Jehova.—Amos 3:7; Heb. 13:15.
2 Sa pagkakaron niining tuiga sa pag-alagad, ang Ang Bantayanang Torre nagpasiugda sa mga ulohan sama sa “Ang Bulawanong Lagda ba Kinaraan Na?” ug “Kalinaw Mahitabo Kaha Pinaagi sa Disarmamento?” Kapin na sa usa ka gatos ka tuig, kining magasina nagtuboy sa Gingharian sa Diyos ingong tinuod nga sulbad sa mga suliran sa katawhan. Uban sa Pagmata!, kining magasina nagapabantay sa mga magbabasa sa pagkasabot sa presente-adlaw nga mga hitabo nga nagatimaan sa “kataposang mga adlaw.”—2 Tim. 3:1-5.
MGA SUSKRISYON NAGASUPLAY UG ESPIRITUWAL NGA PAGKAON
3 Sa Abril ug Mayo atong itanyag ang mga suskrisyon sa Ang Bantayanang Torre o kaha ang Pagmata! Ang kada membro ba sa imong banay adunay personal nga suskrisyon? Kon mao, nan imo gayong ikarekomendar nga ang uban mosuskriber usab. Mahimong masiboton sa pagtanyag sa mga suskrisyon sama sa imong pagtanyag sa indibiduwal nga mga magasin sa adlaw sa magasin.
4 Ayawg hukmi daan kon ang usa ka tawo gusto kahang mosuskriber, apan tugoti nga mosanong ang tawo sa imong tim-os, madasigong presentasyon. Usa ka sister miugmad ug mas positibong tinamdan pinaagig pagbanaag sa panultihon: “Ayawg hukmi ang usa ka basahon pinaagi sa tabon niini.” Siya nakakat-on sa pagkahimong mas sama kang Jehova, kinsa walay pinalabi. (Buh. 10:34) Imo bang gitanyag ang mga suskrisyon ngadto sa imong mga estudyante sa Bibliya, mga rota sa magasin, kaubanang mga trabahante, mga silingan, ug mga paryente?
5 Sagad ang mga tagbalay moingon nga sila walay kuwarta nianang panahona. Kon mahitabo kana ug kon ang maong tawo mahinangpon, sulati ang ‘subscription slip’ dihadiha sa unang duaw ug unya mobalik sa ulahi alang sa kontribusyon. Paneguroa sa pagbalik sa gikasabotan nga panahon.
IMPORMAL NGA PAGPAMATUOD
6 Ang impormal nga pagpamatuod nakahupot ug dugang pasiugda niining mga adlawa. Kini ekselenteng paagi sa pagkontak niadtong wala sa balay sa dihang mamalaybalay kita. Ug komosta man ang imong mga kaubanan sa trabaho? Sa usa ka bulang kampanya sa suskrisyon, ang usa ka igsoong lalaki mihukom sa inantigong pagpamatuod ngadto sa iyang kaubanan sa trabaho. Iyang gihimong tumong nga makakuhag napulo ka suskrisyon. Apan, siya natingala nga nakareport ug 68 ka suskrisyon sa maong bulan!
7 Sa mga balay nga dumilian ang mga suskrisyon, kita makaingon sama niini: “Bisan tuod dili mo gustong mosuskriber niining higayona, ako nagatuo nga nalipay ka sa ulohan nga ato pa lamang nahisgotan. Maimo kini uban niining kaubanang magasin sa ₱5.00 lamang.”
8 Ang salmista miawhag kanato: “Dayega si Jah, kamong katawhan.” (Sal. 147:1) Atong buhaton kini pinaagig masibotong pagtanyag sa mga suskrisyon sa Abril ug Mayo.